ކޮންގޯގެ މަޝްހޫރު 'ސްޓެޗޫ' ސަޕޯޓަރު ވޯލްޑް ކަޕްގެ ފުރަތަމަ މެޗުން ނުފެނުނީ ކީއްވެ؟

2026 ވަނަ އަހަރުގެ ފީފާ ވޯލްޑް ކަޕްގެ ގްރޫޕް 'ކޭ' ގައި ކޮންގޯ އާއި ޕޯޗުގަލް ބައްދަލުކުރި ފޯރިގަދަ މެޗު 1-1 އިން އެއްވަރުވެ، ކޮންގޯއިން ދުނިޔެ ސިއްސުވާލިއިރު، އެ ގައުމުގެ އެންމެ މަޝްހޫރު ސަޕޯޓަރު ދަނޑުމަތިން ފެނިފައެއް ނުވެއެވެ.

"ލުމުމްބާ ވިއާ" ގެ ނަމުން މަޝްހޫރުވެފައިވާ މިޝެލް ކުކާ އެމްބޯލަޑިންގާ އަކީ، މެޗު ކުރިއަށްދާ މުޅި 90 މިނެޓު ވަންދެން އެއްވެސް ހަރަކާތެއް ނެތި ބުދެއް ފަދައިން ހުއްޓި ހުރެގެން ދުނިޔޭގެ ސަމާލުކަން ހޯދާފައިވާ ސަޕޯޓަރެކެވެ.

އެމްބޮލަޑިންގާ ފުރަތަމަ އާންމުންގެ ސަމާލުކަމަށް އައީ 2025 ވަނަ އަހަރު ބޭއްވި އެފްރިކާ ކަޕް އޮފް ނޭޝަންސް (އެފްކޮން) ގައެވެ. އެ މުބާރާތުގެ ނޮކްއައުޓް ބުރަށް ކޮންގޯ ދަތުރުކުރިއިރު، ދަނޑުގެ ސަޕޯޓަރުންގެ ތެރޭގައި އެއްވެސް ހަރަކާތެއް ނެތި ބުދެއް ފަދައިން އޭނާ ހުންނަ މަންޒަރު ޓީވީތަކުން ތަކުރާރުކޮށް ދައްކަމުން ދިޔައެވެ. އޭނާގެ މި ތަފާތު އަދި ސާބިތު ސަޕޯޓުގެ ސަބަބުން، އެ މުބާރާތުގެ އެންމެ ފާހަގަކޮށްލެވޭ އެކަކަށް އޭނާ ވެގެންދިޔައެވެ. ބައެއް ކުޅުންތެރިންނަށްވުރެ ބޮޑަށްވެސް އާންމުންގެ މެދުގައި އޭނާގެ ވާހަކަ ދެކެވުނުކަން ފާހަގަކުރެވެއެވެ.

އެމެރިކާގެ ހިއުސްޓަން ސްޓޭޑިއަމްގައި ކުޅުނު މި މެޗުން އޭނާ ނުފެނުނީ، އެމެރިކާއަށް އެތެރެވުމުގައި ހުރި ހުރަސްތަކަކާ ގުޅިގެންނެވެ. ރިޕޯޓްތައް ބުނާ ގޮތުގައި، ކޮންގޯގައި ފެތުރެމުންދާ އެބޯލާ ބަލިމަޑުކަމާ ގުޅިގެން އެމެރިކާއިން އަޅާފައިވާ ދަތުރުފަތުރުގެ ހަރުކަށި ފިޔަވަޅުތަކުގެ ސަބަބުން އޭނާއަށް ވިސާ ލިބުމުގައި ވަނީ ދަތިތަކެއް ކުރިމަތިވެފައެވެ.

އަދި އޭނާއަށް މެޗު ބަލަން ނުދެވުނީ ކަރަންޓީނުގެ 21 ދުވަހުގެ މުއްދަތު ހަމަނުވާތީ ކަމަށް ރިޕޯޓްތައް ބުނެއެވެ.

އުމުރުން 49 އަހަރުގެ އެމްބޯލަޑިންގާ ބުދެއް ފަދައިން ހުއްޓި ހުންނަ ހުރުމަކީ ހަމައެކަނި ދައްކާލުމެއް ނޫނެވެ. އެއީ އެ ގައުމުގެ މިނިވަންކަމުގެ ބަތަލު އަދި ފުރަތަމަ ބޮޑުވަޒީރު ޕެޓްރިސް ލުމުމްބާގެ ހަނދާނުގައި ކުރާ ކަމެކެވެ. އޭނާ ހުންނަނީ ލުމުމްބާގެ ބިނާއެއްގައި ހުންނަ ފަދައިން އެއް އަތް މައްޗަށް ނަގައިގެންނެވެ.

ރިޕޯޓްތައް ބުނާ ގޮތުން، އޭނާ އެގޮތަށް ހުރުމަށް ވަރަށް ގިނަދުވަހު ޕްރްކްޓިސް ކުރެއެވެ. އަދި އެއީ ކޮންގޯގެ ކުޅުންތެރިންނަށް ނަފްސާނީ ހިތްވަރު ލިބޭ ކަމެއް ކަމަށް އޭނާ ގަބޫލުކުރާއިރު ލުމުމްބާ ވިއާ ވެފައިވަނީ އެ ޓީމުގެ ވަރުގަދަ ރޫހު ރަމްޒުކޮށްދޭ ނަމޫނާ ސަޕޯޓަރަކަށެވެ.

މިކަމުގެ މުހިންމުކަން ބޮޑުކަމުން، ކޮންގޯގެ ގައުމީ ޓީމުގެ ކުޅުންތެރިން ވަނީ އޭނާ ވޯލްޑް ކަޕަށް ގެންގޮސްދިނުމަށް އެދި އެ ގައުމުގެ ރައީސް ފީލިކްސް ސިސެކޭޑީގެ އަރިހުގައި ދަންނަވާފައެވެ. ރައީސްގެ ބެއްލެވުމުގެ ދަށުން މިހާރު މި މައްސަލަ ހައްލުކުރެވެމުންދާ އިރު، މިމަހުގެ 27 ވަނަ ދުވަހު އެޓްލާންޓާގައި އުޒްބެކިސްތާނާ ދެކޮޅަށް ކޮންގޯ ކުޅޭ މެޗަށް އޭނާއަށް ދެވޭނެ ކަމަށް ރިޕޯޓްތައް ބުނެއެވެ.