ސުއަރޭޒްގެ ލަނޑުތަކާއެކު ބާސެލޯނާ ސަލާމަތްވެއްޖެ

މެޗުގެ އެންމެ ފަހު ވަގުތުކޮޅުގެ ތެރޭގައި ރެލިގޭޝަން ޒޯނުގައި އޮތް ރަޔޯ ވަލެކާނޯ ކޮޅަށް ޖެހި ދެ ލަނޑާއެކު ބާސެލޯނާ ސްޕެނިޝް ލީގުގައި ކުޅުނު މެޗުން ހަނި ގޮތަކަށް މޮޅުވެއްޖެއެވެ.

11 ވަނަ މިނެޓުގައި ސުއަރޭޒް ޖެހި ލަނޑާއެކު ބާސެލޯނާ މެޗުގެ ކުރި ހޯދި ނަމަވެސް ވަލެކާނޯގެ މެދުތެރެއަށް ކުޅޭ ޕޯޒޯ ވަނީ މެޗުގެ 35 ވަނަ މިނެޓުގައި ލަނޑެއް ޖަހައި ނަތިޖާ އެއްވަރުކޮށް ދީފައެވެ.

ފުރަތަމަ ހާފުގެ ކުޅުން 1-1 ގައި އޮވެ ނިމުނު އިރު ދެވަނަ ހާފް ފަށާއިގެން މާގިނައިރުތަކެއް ނުވެ ވަލެކާނޯ ވަނީ ލަނޑެއް ޖަހައި ކުރި ހޯދާފައެވެ. މި ލަނޑު އެޓީމަށް ކާމިޔާބު ކޮށްދިނީ ގާސިއާއެވެ.

ވަލެކާނޯގެ ދެވަނަ ލަނޑާއެކު ބާސެލޯނާވަނީ ގިނައިރު ބޯޅަ ގެންގުޅެ ހަމަލާތަކެއް އުފައްދަން މަސައްކަތް ކޮށްފައެވެ. ވިސްނުންތެރިކަމާއެކު ކުޅެމުން އައި ބާސެލޯނާގެ މަސައްކަތް ކާމިޔާބުވާގޮތްވީ 87 ވަނަ މިނެޓުގައި ޑެމްބެލޭ ލަނޑެއް ޖަހައި ނަތީޖާ އެއްވަރުކޮށްދިން ހިސާބުންނެވެ.

މެޗުގެ ފަހު ވަގުތުގައި ޑިފެންޑަރު ޕީކޭވެސް އެންމެ ކުރިއަށް އަރުވައިގެން ކުޅުނު ބާސެލޯނާގެ މޮޅުވި ލަނޑު ޖަހައިދިނީ 90 ވަނަ މިނެޓުގައި މި މެޗުގައި މޮޅު ކުޅުމެއް ދެއްކި ސުއަރޭޒްއެވެ.

މި މޮޅާއެކު 4 ޕޮއިންޓުގެ ފަރަގަކާއެކު ބާސެލޯނާ އޮތީ ލީގު ތާވަލުގެ އެއްވަނައިގައެވެ. އެއީ 11 މެޗު ކުޅެގެން ލިބުނު 20 ޕޮއިންޓާއެކުއެވެ. ދެވަނައިގަ އޮތް އެޓްލެޓިކޯ މެޑްރިޑަށް ލިބިފައިވަނީ 20 ޕޮއިންޓެވެ.