ސަރުކާރުން ހިލޭ ދޫކުރާ ކާޑު ބަހަން ފެށޭވަރު ވާނީ ރޯދަމަހުގެ ފުރަތަމަ ހަފުތާގައި: މޭޔަރު އާޒިމް
ކުރިއަށް އޮތް ރޯދަ މަހާއި ދިމާކޮށް، ސަރުކާރުން ހިލޭ ދޫކުރުމަށް ހަމަޖެހިފައިވާ ކާޑު ބަހަން ފެށޭވަރު ވާނީ ރޯދަމަހުގެ ފުރަތަމަ ހަފުތާގައި ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
ބެހުމަށް ހަމަޖެހިފައިވާ ކާޑު އަދި ނުލިބޭކަން ފާހަގަކުރައްވަމުން އާޒިމް ވިދާޅުވީ ކާޑު ބެހުމަށް ނިންމާފައި ވަނީ މާލޭގައި ސްޓޭޝަންތަކެއް ގާއިމުކޮށްގެން ކަމަށާއި ކޮންމެ ގޭބިސީއަކަށް ހަނޑޫ އަދި ފުށް، ކޮންމެ ވައްތަރަކުން 10 ކިލޯގެ ކާޑު ބެހުމަށް ނިންމާފައިވާ ކަމަށެވެ.
"އަދި އަޅުގަނޑުމެންނަކަށް އެއެއް ނުލިބޭ، ރޯދަމަހުގެ ފުރަތަމަ ހަފުތާގައި ބަހަން ފެށޭވަރު ވާނީ،"
އާޒިމް ވިދާޅުވިއެވެ.
އާޒިމް ވިދާޅުވީ، ކާޑު ބަލައި ދާ ކޮންމެ މީހަކު ވެސް އެމީހެއްގެ އައިޑީކާޑު ގެންދަން ޖެހޭނެ ކަމަށާއި، ކާޑު ދޫކުރުމުގައި ބަލާނީ ކޮންމެ ގޭބިސީއެއްގެ ވެސް ކަރަންޓު މީޓަރު ނަންބަރަށް ކަމަށެވެ.
މީހުން ދިރިއުޅޭ ކޮންމެ ގޭބިސީއަކަށް ރޯދަމަހު 10 ކިލޯގެ ފުށް ބަސްތާއަކާއި ހަނޑޫ ބަސްތާއެއް ދިނުމަށް ސަރުކާރުން ނިންމާފައިވާކަން ރައީސް ޑރ. މުހައްމަދު މުއިއްޒު އިއުލާނު ކުރައްވާފައިވަނީ ޗައިނާއަށް ކުރެއްވި ރަސްމީ ދަތުރުފުޅު ނިންމަވައިލެއްވުމަށްފަހު މާލެ ވަޑައިގެން ދެއްކެވި ވާހަކަފުޅުގައެވެ. އެގޮތުން ރައީސް ޑރ.މުއިއްޒު ވިދާޅުވީ، މީހުން ދިރިއުޅޭ ކޮންމެ ގޭބިސީއަކަށް 10 ކިލޯ ހަނޑުލާއި 10 ކިލޯ ފުށް ދިނުމަށް މިއަހަރު ސަރުކާރުން ނިންމާފައިވީ ނަމަވެސް އަންނަ އަހަރު އެ އަދަދު އިތުރު ކުރައްވާނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
