ހިތަދޫ އުތުރުގެ ބައި-އިލެކްޝަން: ކުރިމަތިލުމުގެ މުއްދަތު އިތުރުކޮށްފި
ލިޔުންތެރިޔާ
އަހުމަދު ހަމީދު އާދަމް
ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި ވާދަކުރަން ބޭނުންވާ މީހުންނަށް ހުޅުވާލި ފުރުސަތުގެ މުއްދަތު އިތުރުކޮށްފި އެވެ.
އިލެކްޝަންސް ކޮމިޝަނުން ދެންމެ ބުނީ ހިތަދޫ އުތުރު ދާއިރާގެ ބައި-އިލެކްޝަންގައި ވާދަކުރުމަށް ކުރިމަތިލުމަށް ހުޅުވާލާފައިވާ މުއްދަތު މެއި ދެވަނަ ދުވަހުގެ 3:00 ގެ ނިޔަލަށް އިތުރުކޮށްފައިވާ ކަމަށެވެ.
އުތުރު ދާއިރާގެ ރައްޔިތުންގެ މަޖިލީހުގެ ބައި-އިލެކްޝަން ބާއްވަން ޖެހުނީ އެ ދާއިރާގެ ކުރީގެ މެންބަރު މުހައްމަދު ސިނާންގެ ގޮނޑި ގެއްލިފައިވާ ކަމަށް ކަނޑައެޅުމާއި ގުޅިގެންނެވެ. ސުޕްރީމް ކޯޓުން އެ ނިންމުން ނިންމީ އޭނާގެ މައްޗަށް ސާބިތު ދަރަންޏެއް އޮތް ކަމަށް ސާބިތުވުމުންނެވެ.
ބައި އިލެކްޝަންގައި ޕީއެންސީން ވާދަކުރާނެ ކެންޑިޑޭޓަކަށް މި ފަހަރުވެސް ހަމަޖެހުނީ ސިނާން އެވެ. ކެންޑިޑޭޓަކު ކަނޑައަޅަން އެ ޕާޓީން ވަނީ ޕްރައިމަރީއެއް ބާއްވާފަ އެވެ. ޕްރައިމަރީގައި ސިނާންއާ ވާދަކުރީ ހިތަދޫ މޫލެކެޑެ ދާއިރާގެ ކައުންސިލަރު އަހުމަދު ސައީދު އެވެ. ނަމަވެސް ސިނާން ވަނީ ޕީއެންސީގެ އެތެރޭގެ އިންތިހާބު ފަސޭހަކަމާއެކު ކާމިޔާބު ކޮށްފަ އެވެ.
އެ ގޮނޑިއަށް އެމްޑީޕީން ވެސް ވާދަ ކުރާނެ އެވެ. އެ ޕާޓީން ނެރޭނެ ނެރެނީ އައްޑޫ ސިޓީގެ ކުރީގެ މޭޔަރު ސޯދިގް (ސޯބެ) އެވެ. ސޯބެ ނޫން މީހަކު ކުރިމަތިނުލުމުން ޕްރައިމަރީއެއް ނެތި އެމްޑީޕީން ވަނީ ޓިކެޓް ދީފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
