ހަޅުތާލު ކޮށްގެން ހައްޔަރު ކުރި އެއް ޓެކްސީ ޑްރައިވަރު ދޫކޮށްލައި، އަނެއް ދެމީހުން ބަންދަށް
ލިޔުންތެރިޔާ
ޚަދީޖާ އަރުފާ
ހުޅުމާލެ ފަޅިން ބްރިޖަށް އަރާ ހަލިމަގު (ހައިވޭ) ބަންދުކޮށް, އިހުތިޖާޖު ކުރުމުގެ ސަބަބުން ފުލުހުންގެ ބެލުމުގެ ދަށަށް ގެނެވުނު ޓެކްސީ ޑްރައިވަރުންގެ ތެރެއިން އެކަކު، ޝަރުތުތަކާއެކު ދޫކޮށްލައި އެމްޑީޕީގެ އަނެއް ދެމީހުން ބަންދު ކޮށްފިއެވެ.
ސަރުކާރުން ޓެކްސީގެ ޚިދުމަތް ފަށާތީ، ބުދަ ދުވަހުގެ ރޭ ޓެކްސީ ޑްރައިވަރުން ކުރި އިހުތިޖާޖުގެ ތެރެއިން، ހުޅުމާލެ ފަޅިން ބްރިޖަށް އަރާ ހަލިމަގު (ހައިވޭ) ބަންދުކޮށް، އާންމު ދަތުރުފަތުރަށް ދަތިވާގޮތަށް ޢަމަލުތަކެއް ހިންގާފައިވެއެވެ.
އެގޮތުން، އެ ސަރަހައްދު ހަތަރުފުރޮޅުލީ އުޅަނދުތަކަށް ބަންދުކޮށް، ޓެކްސީތައް ބޭނުންކޮށްގެން މަގު ބަންދުކޮށް މުޒާހަރާ ކުރިއަށް ގެންގޮސްފައިވެއެވެ. މި ސަބަބާހުރެ އެ މަގުން ދަތުރުކުރެވެނީ ހަމައެކަނި ސައިކަލުތަކަށެވެ.
މިކަމާއި ގުޅިގެން ފުލުހުން ބުނީ، ހުޅުމާލޭގައި ބައެއް ޓެކްސީ ޑްރައިވަރުން ކުރިއަށް ގެންދިޔަ އިހުތިޖާޖުގެ ތެރެއިން، އާންމު ދަތުރުފަތުރަށް ހުރަސް އަޅައި ހުޅުމާލޭގެ މަގުތައް ބްލޮކް ކޮށްފައިވާ މައްސަލައާ ގުޅިގެން ތިން މީހަކު ފުލުހުންގެ ބެލުމުގެ ދަށަށް ގެނެސް، ހަތަރު ފުރޮޅުލީ 22 އުޅަނދު ޓޯ ކޮށްފައިވާކަމަށެވެ.
އެގޮތުން ހައްޔަރު ކޮށއފައިވަނީ، މުޙައްމަދު ޝާމިން، މއ.ވިރާޙު، ކ.މާލެ، އަޙްމަދު ޝަބީން، ސަންރޭ، ލ.ދަނބިދޫ، އަދި ނޫމާން އަޙްމަދު، ހޮލިޑޭ ވިލެޖު، ހދ.ކުމުންދޫ، އެވެ.
މި މައްސަލައާ ގުޅިގެން ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، މުޙައްމަދު ޝާމިން އާއި އަޙްމަދު ޝަބީން 5 ދުވަސް ވަންދެން ބަންދުގައި ބޭތިއްބުމަށް ކޯޓުން ވަނީ އަމުރުކޮށްފައެވެ. އަދި ނޫމާން އަޙްމަދު ޝަރުތު ކުރުމަށްފަހު ވަނީ ދޫކޮށްލާފައެވެ.
ފުލުހުން ބުނާ ގޮތުގައި މި މައްސަލަ ދަނީ ތަޙުޤީޤު ކުރަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
