ޓައިވާން ކައިރިއަށް ޗައިނާގެ އަސްކަރީ އުޅަނދުތައް ޖަމާވެއްޖެ
ލިޔުންތެރިޔާ
އަބްދުﷲ ހުސައިން
ނިމުނު ހަފްތާ ބަންދުގެ ތެރޭގައި ޗައިނާގެ ގިނަ އަދަދެއްގެ އަސްކަރީ އުޅަނދުފަހަރު ޓައިވާން ކައިރިއަށް ޖަމާވެފައިވާކަމަށް ޓައިވާނުގެ ދިފާއީ ވުޒާރާއިން ބުނެފިއެވެ.
މަސްދަރުތަކާ ހަވާލާދީ ރޮއިޓަރސްއިން ބުނާ ގޮތުގައި ޗައިނާއިން އަނެއްކާވެސް އަންނަނީ ހަނގުރާމަމަތީ ތަމްރީނުތަކެއް ބޭއްވުމަށް ތައްޔާރުވަމުންނެވެ. މިއީ ދާދިފަހުން ޓައިވާނުގެ ރައީސް އެމެރިކާއަށާއި ޕެސިފިކްގެ ބައެއް ގައުމުތަކަށް ކުރެއްވި ދަތުރުފުޅާ ގުޅިގެން ޗައިނާއިން ކުރިއަށްގެންދާނެކަމަށް ބެލެވުނު ތަމްރީނުތަކެކެވެ.
ޓައިވާނުގެ ދިފާއީ ވުޒާރާއިން ބުނީ އިއްޔެއާ ހަމަޔަށް ޗައިނާގެ 14 އަސްކަރީ އުޅަނދެއް ޓައިވާނާއި ކައިރިއަށް އައިސްފައިވާކަމަށެވެ. އަދި ޓައިވާނު ކަނޑުއޮޅި މަތިން ޖާސޫސީ 4 ބެލޫންވެސް ޗައިނާއިން އުދުއްސާފައިވެއެވެ. ތަމްރީނުތަކަށް ތައްޔާރީ ހާލަތަކަށް ޗައިނާއިން އައިނަމަވެސް، އެސަރަހައްދުގެ މޫސުން މި ދުވަސްވަރު ވަރަށް ގޯސްކަމުން، ތަމްރީންތައް ކުރިއަށްގެންދާނެތޯ ނުވަތަ ނޫންތޯވެސްވަނީ ސުވާލު އުފެދިފައެވެ.
މިއަހަރުގެ މިހާތަނަށް 2 ފަހަރެއްގެ މަތިން މިފަދަ ތަމްރީނުތަކެއް ޗައިނާއިން ބާއްވާފައިވެއެވެ.
ޗައިނާއިން ދެކޭ ގޮތުގައި ޓައިވާނަކީ ވަކިވެގަނެގެން އުޅޭ، އެހެންނަމަވެސް ޗައިނާގެ ޕްރޮވިންސެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
