ވީނުވީއެއް ނޭނގި ގެއްލުނު މެލޭޝިޔާގެ އެމްއެޗް-370 ހޯދުމުގެ މަސައްކަތް އަލުން ފަށަނީ

މީގެ 11 އަހަރު ކުރީން ގެއްލުނު މެލޭޝިއާ އެއަރލައިންސްގެ ފްލައިޓް އެމްއެޗް370 ފްލައިޓް ހޯދުމުގެ މަސައްކަތް އަންނަ ޑިސެމްބަރު މަހުގެ 30 ވަނަ ދުވަހު އަލުން ފެށުމަށް ނިންމާފައިވާ ކަމަށް މެލޭޝިއާގެ ކަމާބެހޭ ފަރާތްތަކުން ބުނެފިއެވެ. މި ފްލައިޓް ގެއްލުނު އިރު 239 މީހުން އޭގައި ތިއްބެވެ.

މި އަލަށް ފަށާ މަސައްކަތް 55 ދުވަހަށް ކުރިއަށްދާނެ ކަމަށް މެލޭޝިއާގެ ކަމާބެހޭ ފަރާތްތަކުން ބުނެއެވެ. މި އަހަރު މާޗް މަހުވެސް މި މަސައްކަތް ފެށި ނަމަވެސް، މޫސުން ގޯސްވުމުގެ ސަބަބުން މެދުކަނޑާލެވުނެވެ. މެލޭޝިއާގެ ދަތުރުފަތުރުގެ މިނިސްޓްރީން ބުދަ ދުވަހު ބުނީ، މިއީ މި ހިތާމަވެރި ހާދިސާގައި ގެއްލިފައިވާ ފަރާތްތަކުގެ އާއިލާތަކުގެ ސުވާލުތަކަށް އެދެވޭ ޖަވާބެއް ހޯދައިދިނުމަށް ކުރާ މަސައްކަތް ކަމަށެވެ.

ބޯއިން 777 މަރުކާގެ ފްލައިޓް އެމްއެޗް370 ގެއްލުނީ 2014 ވަނަ އަހަރުގެ މާރިޗު 8 ވަނަ ދުވަހު، ކުއަލަލަމްޕޫރުން ބެއިޖިންގ އަށް ދަތުރުކުރަނިކޮށެވެ. މިއީ ދުނިޔޭގެ ތާރީޚުގައި އެންމެ ބޮޑަށް ހޯދުމުގެ މަސައްކަތް ކުރެވުނު އެއް ހާދިސާއެވެ. ކުއަލަލަމްޕޫރުން ފުރިތާ ގަޑިއެއްހާ އިރު ތެރޭގައި އެއަރ ޓްރެފިކް ކޮންޓްރޯލްއާ އެ ފްލައިޓަށް ގުޅުން ކެނޑުނެވެ. ރާޑަރުން ދެއްކި ގޮތުގައި އެ ފްލައިޓް އޭތި އަސްލު ދަތުރުކުރަމުންދިޔަ މިސްރާބު ވަނީ ބަދަލުކޮށްފައެވެ.

މިފަހަރު އެ ބޯޓު ހޯދުމުގެ މަސައްކަތުގައި ހަރަކާތްތެރިވަނީ "އޯޝަން އިންފިނިޓީ" ކިޔާ އެކްސްޕްލޮރޭޝަން ކުންފުންޏެވެ. މި ކުންފުންޏާއެކު އެއްބަސްވެފައިވަނީ "ހޯދައިފިނަމަ ފީ ދެވޭ، ނުފެނިއްޖެ ނަމަ ނުދެވޭ" އުޞޫލުންނެވެ. އެގޮތުން ފްލައިޓްގެ ބައިތައް ފެނިއްޖެނަމަ 70 މިލިއަން ޑޮލަރު ދޭނެ ކަމަށް ދަތުރުފަތުރުގެ މިނިސްޓަރ ލޯކް ސިއެވް ފޫކް ކުރިން ވިދާޅުވެފައިވެއެވެ.

މީގެ ކުރިންވެސް ފްލައިޓް އެމްއެޗް370 ހޯދުމަށް ގިނަ މަސައްކަތްތަކެއް ކުރެވިފައިވެއެވެ. އޭގެ ތެރޭގައި 26 ގައުމަކުން 60 އުޅަނދާއި 50 މަތިންދާބޯޓު ބައިވެރިވި ބައިނަލްއަގްވާމީ، މަސައްކަތެއް ހިމެނެއެވެ. ދެމަސް ދުވަހުގެ އެ މަސައްކަތް ނިމުނީ 2017 ގައެވެ. އަދި 2018 ވަނަ އަހަރު އޯޝަން އިންފިނިޓީން ތިން މަސް ދުވަސް ވަންދެންވެސް ވަނީ ބޯޓު ހޯދުމުގެ މަސައްކަތް ކޮށްފައެވެ.

އެމްއެޗް370 ގެ ހާދިސާއަކީ މަތިންދާބޯޓު ދަތުރުފަތުރުގެ ތާރީޚުގައި އަދިވެސް ހައްލުނުވެ ހުރި އެންމެ ބޮޑެތި ސިއްރުތަކުގެ ތެރޭގައި ހިމެނޭ އެއް ސިއްރެވެ. މި ހާދިސާގެ ސަބަބުން ގެއްލިފައިވާ ފަރާތްތަކުގެ އާއިލާތަކަށް އަދިވެސް އެކަމުން އަސަރުކުރަމުންދާ ކަމަށާއި، އެތައް ބަޔަކު ވަނީ އެކަމުގެ ޖަވާބު ހޯދުމަށް އާ މަސައްކަތެއް ފެށުމަށް ގޮވާލާފައެވެ.

މި ހާދިސާގެ ސަބަބުން ވަނީ ގިނަ ބަހުސް ތަކެއްވެސް ކުރެވިފައެވެ. އޭގެ ތެރޭގައި، ބޯޓުގެ ޕައިލެޓް ގަސްތުގައި ބޯޓު ވެއްޓުވާލީ ކަމަށް ނުވަތަ ބޯޓު ހައިޖެކް ކުރެވުނީ ކަމަށް ބުނާ ވާހަކަތައް ހިމެނެއެވެ.

2018 ވަނަ އަހަރު ހިންގި ތަހުގީގެއްގައި ހާމަވެފައިވާ ގޮތުގައި، ބޯޓު އޭގެ މިސްރާބުން އެއްކިބާކުރުމަށްޓަކައި ބޯޓުގެ ކޮންޓްރޯލްތަކަށް ގަސްތުގައި ބަދަލު ގެނެސްފައިވާ ކަމަށް ބެލެވެއެވެ. ނަމަވެސް އެކަމުގެ ފަހަތުގައިވާ ސަބަބާ ބެހޭ ގޮތުން އެއްވެސް ނިމުމަކަށް އާދެވިފައިނުވެއެވެ.

ތަހުގީގުކުރާ ފަރާތްތަކުން އެ ދުވަސްވަރު ބުނެފައިވަނީ، "މިކަމުގެ ހަގީގީ ޖަވާބު ޔަގީންކަމާއެކު ލިބޭނީ ބޯޓުގެ ހަލާކުވެފައިވާ ބައިތައް ފެނިގެންނެވެ."