މެލޭޝިއާގެ ކުރީގެ ބޮޑުވަޒީރުގެ އަނބިކަނބަލުން އަވަހާރަވުމާ ގުޅިގެން ރައީސް ޑރ.މުއިއްޒު ތައުޒިޔާ ވިދާޅުވެއްޖެ
މެލޭޝިއާގެ ކުރީގެ ބޮޑުވަޒީރު ޑރ. މަހާތީރު މުޙައްމަދުގެ އަނބިކަނބަލުން ޑރ. ސިޓި ޙަސްމާ މުޙައްމަދު ޢަލީގެ ހަނދާނުގައި ރައީސް ޑރ. މުޙައްމަދު މުޢިއްޒު ތަޢުޒިޔާގެ މެސެޖެއް ފޮނުއްވައިފިއެވެ.
ޑރ. ސިޓި އަވަހާރަވީ ޢުމުރުފުޅުން 100 އަހަރުގައެވެ. ރައީސް ފޮނުއްވި މެސެޖުގައި ޑރ. ސިޓި ޙަސްމާގެ ޚިދުމަތްތަކަށް ތަޢުރީފުކުރައްވައި އެ ކަމަނާއަކީ މެލޭޝިއާގައި ފުރަތަމަ ފަހަރަށް ޑޮކްޓަރުކަމުގެ ދާއިރާއަށް ވެދެވަޑައިގެންނެވި އަންހެން ބޭފުޅުންގެ ތެރެއިން ބޭފުޅެއް ކަމަށް ވިދާޅުވެފައިވެއެވެ. މައިންގެ ޞިއްޙީ ޙާލަތު ރަނގަޅުކުރެއްވުމާއި ރަށްފުށު ސަރަޙައްދުތަކުގައި ދިރިއުޅޭ އަންހެނުންގެ ފެންވަރު ކުރިއެރުވުމަށް އެ ކަމަނާ ކުރެއްވި މަސައްކަތްތައްވެސް ރައީސް ފާހަގަކުރައްވާފައިވެއެވެ.
މީގެ އިތުރުން މިންތީގެ ހަމަހަމަކަން ޤާއިމުކުރެއްވުމާއި ޢާއިލާތަކުގެ ދިރިއުޅުމުގެ ފެންވަރު މަތިކުރެއްވުމުގެ ގޮތުން އެ ކަމަނާގެ އިސްނެންގެވުމާ އެކު ކުރިއަށް ގެންދެވި ކާމިޔާބު މަޝްރޫޢުތަކަށްވެސް ރައީސްގެ މެސެޖުގައި އަލިއަޅުއްވައިލައްވާފައިވެއެވެ. މި ހިތާމައިގެ ދަނޑިވަޅުގައި ޝުކުރުވެރިކަމާއި ޤަދަރާ އެކީ އެ ކަމަނާގެ ހަނދާނުގައި ދެމިހުންނާނެ ކަމަށް ރައީސް ވިދާޅުވެފައިވެއެވެ.
ރައީސް ވަނީ ދިވެހި ސަރުކާރާއި ރައްޔިތުންގެ ނަމުގައި ޑރ. މަހާތީރަށާއި އެ މަނިކުފާނުގެ ޢާއިލާއަށް ތަޢުޒިޔާ ފޮނުއްވައި ކެތްތެރިކަން ދެއްވުން އެދި ދުޢާ ކުރައްވާފައެވެ.
ޑރ. ސިޓި ޙަސްމާގެ ޖަނާޒާ ބާއްވައި ފަސްދާނުލައްވާފައި ވަނީ މެލޭޝިއާގެ ވެރިރަށް ޕުތުރަޖާޔާގެ ޤަބުރުސްތާނެއްގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
