މޮރީނިއޯގެ ސްޓައިލަކީ ބަސް ޕާކު ކުރުން: ޑާވިޑް ލުއިޒް

މެންޗެސްޓާ ޔުނައިޓެޑުން ޗެލްސީއާއި އިދިކޮޅަށް ޕްރިމިއަރ ލީގުގައި އެންމެ ފަހުން ކުޅުނު މެޗުގައި މޮރީނިއޯގެ އަމާޒަކަށްވީ މުޅި ޓީމު ފަހަތަށް ބާލުވައިގެން ކައުންޓާ އެޓޭކަށް ކުޅުވުން ކަމަށް ޗެލްސީގެ ޑިފެންޑަރު ޑާވިޑް ލުއިޒް ބުނެފިއެވެ.

ޗެލްސީގެ ވެބްސައިޓަށް ދިން އިންޓަވިއުއެއްގައި ލުއިޒް ބުނެފައިވަނީ އެ މެޗުން ޔުނައިޓެޑް މޮޅުވިނަމަ އެވާނީ އެޓިމަށް ހައްގު ނޫން މޮޅެއް ކަމަށެވެ. ސަބަބަކީ މުޅި މެޗުގައިވެސް ބޯޅަ ކޮންޓްރޯލް ކޮށްގެން މޮޅަށް ކުޅެފައިވަނީ ޗެލްސީއިން ކަމަށް ވުމުންނެވެ.

"ފުރަތަމަ ހާފް އެއްކޮށް ޑޮމިނޭޓް ކޮށްފައިވަނީ އަހަރުމެން، އިތުރު ލަނޑުތަކެއް ޖެހުންނަމަ އިތުރަށް ފުރިހަމަވީސް. ނަމަވެސް މިއީ އިނގިރޭސި ލީގް، އެއްވެސް މެޗަކީ އެހާ ފަސޭހައިން މޮޅުވެވޭނެ މެޗެއް ނޫން. ހާއްސަކޮށް ވަރުގަދަ ކުލަބަކާއި އިދިކޮޅަށް ކުޅޭއިރު'' ލުއިޒް ބުންޏެވެ.

ޗެލްސީ އަދި ޔުނައިޓެޑް ކުޅުން މެޗު އެއްވަރުވެ ސިޓީ އަދި ލިވަޕޫލް ކުޅުނު މެޗުތަކުން އެޓީމުތައް މޮޅުވުމުގެ ސަބަބުން ޗެލްސީވަނީ ތާވަލުގެ ތިންވަނަ އަށް ވެއްޓިފައެވެ.

ސިޓީ އަދި ލިވަޕޫލްއަށް 23 ޕޮއިންޓު ލިބިފައިވާއިރު ތާވަލުގެ އެއްވަނަ ސިޓީއަށް ލިބެނީ ލަނޑުގެ ތަފާތުންނެވެ.