މަންދު ކޮލެޖުގެ ދޮރުމަތީ މަޑުކޮށްލި ތިން މީހަކު ހައްޔަރު ކޮށްފި
މަންދު ކޮލެޖުގެ ވެރިޔާ އިބްރާހިމް އިސްމާއިލް (އިބްރާ) އިސްލާމްދީނުގެ ޙުކުމްތަކާއި އަދި ކީރިތި ރަސޫލާ މުހައްމަދު ޞައްލަﷲ އަލައިހި ވަސައްލަމައަށް ނިސްބަތްކޮށް ދައްކަމުންދާ ވާހަކަތަކާއި ދެކޮޅު ހެދުމުގެ ގޮތުން މަންދު ކޮލެޖުގެ ދޮރުމަތީ މަޑުކޮށްލި ތިން މީހަކު ހައްޔަރު ކޮށްފިއެވެ.
މަޖީދީމަގުގައި ހުންނަ މަންދު ކޮލެޖުގެ ދޮރުމަތީ މިއަދު ހެނދުނު ތިންމީހަކު މަޑުކޮށްގެން ތިއްބާ އެސްއޯ ފުލުހުންވަނީ އެމީހުން ހައްޔަރުކޮށްގެން ގެންގޮސްފައެވެ.
ފުލުހުން ބުނީ، އެމީހުން ހައްޔަރު ކޮށްފައިނުވާ ކަމަށާއި އެމީހުން ފުލުހަށް ހާޒިރު ކޮށްފައި ވަނީ ފުލުހުންގެ އަމުރަށް ނުކިޔަމަންތެރިވުމުން ނަސޭހަތް ދިނުމަށް ކަމަށެވެ. އަދި އެމީހުން މިހާރު ދޫކޮށްލާފައިވާ ކަމަށްވެސް ފުލުހުން ބުންޏެވެ.
އިބްރާގެ ޓުވީޓުތަކާއެކު އެކި ފަރާތްތަކުން އަންނަނީ މަންދު ކޮލެޖް ބޮއިކޮޓް ކުރުމަށް ގޮވާލަމުން ކަން ފާހަގަކޮށްލަންޖެހެއެވެ.
މިއަދު ހައްޔަރު ކުރެވުނު ތިން މީހުންގެ ވީޑިއޯގައި ފުލުހުން އަމަލު ކުރި ގޮތައް އަންނަނީ ސޯޝަލް މީޑިއާގައި ފުލުހުންނަށް ނުރުހުން ފާޅުކުރަމުންނެވެ.
މިހާތަނަށް ސަރުކާރުން މުޒާހަރާ ކުރުމާއި، އެއްވެ އުޅުމަށް ގެންގުޅެފައިވަނީ ވަރަށް މިނިވަން ސިޔާސަތެއްކަން ފާހަގަކޮށްލަންޖެހެއެވެ. އެގޮތުން ސަރުކާރު ކޯލިޝަންގެ ހަތަރު ލީޑަރުން ކުރިމަތީ ހިމޭން މުޒާހަރާއެއްކުރުމާއި، އައިޖީއެމްއެޗް ގައި އެމްޓީޑީގެ ޕްރެޒިޑެންޓް ބޭސްފަރުވާކުރުމަށް ފުރުސަތު ދިނުމަށް ގޮވާލާ އެޕާޓީން އެއްވި އެއްވުން ފާހަގަކުރެވެއެވެ. އަދި އެޕާޓީން ވަނީ އިއްޔެ ރައީސް އޮފީސް ދޮށުގައިވެސް މުޒާހަރާކޮށްފައިކަން ފާހަގަކޮށްލެވެއެވެ.
މަންދު ކޮލެޖުގެ ވެރިޔާއި އިބްރާހިމް އިސްމާއިލް އިސްލާމްދީނާއި ރަސޫލާއާއި ގުޅޭގޮތުން ދައްކަމުންދާ ވާހަކަތަކާއި ގުޅިގެން އިއްޔެ އޭނާ ވަނީ ފުލުހަށް ހާޒިރުކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
