އެޗްއާރުސީއެމްގެ މެމްބަރުކަމަށް ހަބީބް އައްޔަންކުރަން މަޖިލީހުން ފާސްކޮށްފި
ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރުސީއެމް) ގެ މެމްބަރުކަމަށް އިލެކްޝަން ކޮމިޝަން (އީސީ) ގެ ކުރީގެ ނައިބު ރައީސް އިސްމާއީލް ހަބީބް އައްޔަންކުރަން ރައްޔިތުންގެ މަޖިލީހުން ފާސްކޮށްފިއެވެ.
މިފަދައިން މަޖިލީހުން ފާސްކޮށްފައިމިވަނީ މިއަދު ކުރިއަށް ދިޔަ ޖަލްސާގައި މިކަމާއި ގޮތެއް ނިންމުމަށް ނެގި ވޯޓުގައި ބައިވެރިވެވަޑައިގެންނެވި މެމްބަރުންގެ ތެރެއިން 74 މެމްބަރުންގެ އަޣުލަބިއްޔަތުންނެވެ. ހަބީބް މިމަގާމަށް އައްޔަނުކުރަން ނުފެންނަކަމަށް ވޯޓް ދެއްވީ 3 މެމްބަރުންނެވެ.
އެޗްއާރްސީއެމްގެ ހުސްވެފައިވާ މެންބަރުކަމަށް ހަބީބް އައްޔަނުކުރުމަށް ރައީސުލްޖުމްހޫރިއްޔާ މަޖިލީހަށް ނަން ފޮނުވާފައިވާއިރު، ހިއުމަން ރައިޓްސް ކޮމެޓީން ހަބީބާއި އިންޓަވިއު ކުރުމަށްފަހު ހަބީބް އައްޔަންކުރަން ފެންނަކަމަށް ކޮމިޓީން ފާސްކުރީ އިއްޔެއެވެ.
ކޮމެޓީގައި ވާހަކަ ދައްކަވަމުން މުގައްރިރު ނިލަންދޫ ދާއިރާގެ މެންބަރު ފާތިމަތު ސައުދާ ވިދާޅުވީ ކޮމެޓީން ހަބީބް އާއި އިންޓަވިއުކުރުމަށްފަހު އާއްމު ކޮމެޓީން ފާސްކޮށްފައިވާ މިންގަޑުގައިވާގޮތުގެ މަތިން މެންބަރުން ދެއްވާފައިވާ މާކްސްތަކުގެ އެވްރެޖް 75 އިންސައްތައަށްވުރެ މަތިން އޭނާ އަށް ލިބިފައިވާކަމަށެވެ.
އެހެންކަމުން ހަބީބަކީ އެޗްއާރްސީއެމެގް މެންބަރުކަމުގެ މަސްއޫލިއްޔަތު އަދާކުރުމަށް ގާބިލް ފަރާތެއްކަމަށް ކަނޑައަޅާ އެފަރާތް އެޗްއާރްސީއެމްގެ މެންބަރުކަމަށް އައްޔަނުކުރުމަށް ފެންނަ ކަމަށް ވޯޓް ދިނުމަށް ހުޅުވާލުމުން، ކޮމިޓީގެ ބައްދަލުވުމުގައި ތިބި ހުރިހާ މެމްބަރުންވެސް ވަނީ ފެންނަ ކަމަށް ވޯޓް ދެއްވާފައެވެ.
އީސީ އަށް ޚިދުމަތްކުރާތާ، 21 އަހަރަށްފަހު އެކޮމިޝަނުން މިއަހަރުގެ މާޗު މަހު ހަބީބް ވަކިވެވަޑައިގަތީ ކޮމިޝަންގެ މެމްބަރު ކަމުގައި ދެ ދައުރު ހަމަވުމުންނެވެ. ގާނޫނުގައި އޮންނަ ގޮތުން، އީސީގެ މެންބަރު ކަމުގައި ފުރިހަމަ ކުރެވޭނީ ގިނަވެގެން ދެ ދައުރުކަމަށްވާއިރު، ހަބީބު ވަނީ ފަސް އަހަރުގެ ދެ ދައުރު ފުރިހަމަ ކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
