ކައިވެނި އޮތީ އުނދަގޫ ފައްތަރެއްގަ: ޑޭވިޑް ބެކަމް
ލިޔުންތެރިޔާ
ޝަފްރާޒް އަހްމަދު
ކައިވެނިކޮށްގެން ގިނަ ދުވަހު އުޅުމަކީ ވަރަށް ބުރަ މަސައްކަތެއް ކަމަށާއި އޭނާގެ އަމިއްލަ ކައިވެނިވެސް މިހާރު އޮތީ އުނދަގޫ ފައްތަރެއްގަ ކަމަށް އަންނަ އަހަރު ކައިވެނިކޮށްގެން އުޅޭތާ 20 އަހަރު ފުރޭ ބެކަމް އަދި ވިކްޓޯރިއާގެ ކައިވެންޏާއި ބެހޭގޮތުން ވާހަކަ ދައްކަމުން ބެކަމް ބުނެފިއެވެ.
ބެކަމް މިހެން ބުނެފައިވަނީ އޭނާއާއި ވިކްޓޯރިއާގެ ކައިވެނި ނުރޫޅި އޮތީ ހަމަ ކިރިޔާކަމަށް މީގެ ކުޑަ ދުވަސްކޮޅެއް ކުރިން އަޑުތަކެއް އަރާފަ ވަނިކޮށެވެ.
އޮސްޓްރޭލިއާގެ ޓީވީ ޝޯއެއް ކަމަށްވާ 'ދަ ސަންޑޭ ޕްރޮޖެކްޓް' އަށް ދިން އިންޓަވިއުއެއްގައި ބެކަމް މިހެން ބުނުމާއި ގުޅިގެން ވިކްޓޯރިއާ ވަނީ އޭނާގެ ފިރިމީހާ ކައިރިން ދުރަށްގޮސް ޖަރުމަން ސްޓްރެސް މެނޭޖްމެންޓް ކްލިނިކަކަށް ގޮސްފައިކަމަށް މީޑިއާތަކުން ދަނީ ރިޕޯޓް ކުރަމުންނެވެ.
މިކަމާއި ގުޅޭ ގޮތުން އާއިލާގެ ރައްޓެއްސަކާއި ހަވާލާދީކަމަށް ބުނެ އިނގިރޭސި މީޑިއާތަކުން ބުނަނީ ބެކަމްގެ މި ވާހަކަތަކާއި ހެދި ވިކްޓޯރިއާ މާޔޫސްވެފައިވާ ކަމަށާއި އެކަހަލަ ވާހަކަތަކެއް އާންމުންނަށް އިނގޭނެހެން ދައްކަން ޖެހޭ ސަބަބެއް ނޯންނާނެ ކަމަށެވެ. އަދި އެވާހަކަތައް ދެއްކީ ވިކްޓޯރިއާ އެންމެންތެރޭ ލަދު ގަންނުވާލަން ކަމަށެވެ.
މައުލޫމާތު ލިބޭ ގޮތުގައި ބެކަމް ވަނީ އޭނާގެ އަންހެނުން ވިކްޓޯރިއާގެ ފެޝަން ވިޔަފާރިއަށް ފަންޑު ކުރުން ހުއްޓާލައި ވިކްޓޯރިއާއާއި ވަކިން ވަގުތު ހޭދަކުރުމަށް އޭނާގެ އަމިއްލަ ނަމުގައި ގެއެއްވެސް ގަނެފައެވެ.
މި ހަބަރުތަކާއި ގުޅިގެން ބެކަމް އަދި ވިކްޓޯރިއާ ވަރިވާން އުޅޭކަމުގެ ވާހަކަތައް ވަނީ ވަރަށް ގަދައަށް ދެކެވެން ފަށާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
