މެދުއިރުމައްޗާއި ރާއްޖެއާ ދެމެދު ކުރާ ވައިގެ ދަތުރުތައް ހުއްޓުމަކަށް އަތުވެއްޖެ
ލިޔުންތެރިޔާ
އަބްދުﷲ ހުސައިން
މެދުއިރުމަތީގެ މަޝްރަހް ހޫނުވެ، ވައިގެ ސަރަހައްދު ބަންދުކުރުމާ ގުޅިގެން ރާއްޖެއިން މެދުއިރުމައްޗަށް ކުރާ ވައިގެ ދަތުރުތައް ހުއްޓުމަކަށް އަތުވެއްޖެއެވެ.
އެމެރިކާ އަދި އިސްރާއީލުން އިސްވެ، އީރާނުގެ ވެރިރަށް ތެހެރާނަށް މިއަދު ދިން ހަމަލާތަކާއެކު، އީރާނުންވެސް އެމެރިކާގެ ބޭސްތަކަށް ދިން ހަމަލާތަކާ ގުޅިގެން މުޅި މެދުއިރުމަތި ވަނީ ހުއްޓުމަކަށް އައިސްފައެވެ. ހާއްސަގޮތެއްގައި މެދުއިރުމަތީގެ ވައިގެ ދަތުރުތައް ވަނީ މުޅިން ހުއްޓުމަކަށް އައިސްފައެވެ.
މިކަމާ ގުޅިގެން މެދުއިރުމަތިން މިއަދު ރާއްޖެ އަންނަން އޮތް އަދި ރާއްޖެއިން ފުރަން އޮތް ފްލައިޓްތައްވެސް ވަނީ ކެންސަލްކޮށްފައެވެ. މިކަން ވެލާނާ އިންޓަރނޭޝަނަލް އެއާޕޯޓް ހިންގާ ވީއައިއޭއިން ވެސް ވަނީ ބުނެފައެވެ. ބައެއް މީޑިއާތަކާ ވާހަކަދައްކަވަމުން އެމްއޭސީއެލްގެ މެނޭޖިން ޑިރެކްޓަރު އަހުމަދު ޝަރީފު މުހައްމަދު ވަނީ މެދުއިރުމަތީގެ ބޮޑެތި ހުރިހާ ސަރަހައްދުތަކަކަށް ކުރާ ދަތުރުތައް ހުއްޓުމަކަށް އައިސްފައިވާކަމަށް ވިދާޅުވެފައެވެ. އެގޮތުން ދަތުރުތައް ހުއްޓުމާ ގުޅިގެން ދިމާވާ ކަންކަން ހައްލުކުރުމަށް ރިސޯޓްތަކާއި އެއާލައިންތަކާ ގުޅިގެން މަސައްކަތް ކުރަމުން އަންނަކަން ޝަރީފް ވަނީ ފާހަގަކުރައްވާފައެވެ.
ޔޫރަޕް އަދި މެދުއިރުމަތީގެ ގިނަ ޤައުމުތަކަކުން ރާއްޖެއަށް ފަތުރުވެރިން ގޮވައިގެން އަންނަ ބޮޑެތި ގިނަ ފްލައިޓްތައް އަންނަނީ މެދުއިރުމަތީގެ ޤައުމުތަކުގެ އެއާޕޯޓްތައް މެދުވެރިކޮށެވެ. މީގެ ތެރޭގައި ޤަތަރު އެއާވޭސް، އެމިރޭޓްސް އެއާލައިން، ފާހަގަކޮށްލެވެއެވެ.
މެދުއިރުމައްޗަށް ނިސްބަތްވާ އެއާލައިންތަކުގެ އިތުރުންވެސް އޭޝިއާ އަދި ޔޫރަޕްގެ ބައެއް އެއާލައިންތަކުންވެސް ޤަތަރު އަދި ޔޫއޭއީ މެދުވެރިކޮށް ރާއްޖެއަށް ފަތުރުވެރިން ޒިޔާރަތްކުރެއެވެ. މީގެ ތެރޭފައި ލުފްތަންސާ، ސްރީލަންކަން، ތުރުކީގެ ޤައުމީ އެއާލައިން ފާހަގަކޮށްލެވެއެވެ.
މެދުއިރުމަތީގެ މަޝްރަހް ހޫނުވެ، ހާއްސަ ގޮތެއްގައި ގަލްފްގެ ޤައުމުތަކުގެ ވައިގެ ސަރަހައްދު ބަންދުކުރުމަކީ ރާއްޖެއަށް ޒިޔާރަތްކުރާ ފަތުރުވެރިންގެ ނިސްބަތް ދަށްވެގެންދާނޭ ކަމެއްކަމަށް އެއާލައިންތަކުގެ އޭޖެންޓުން ވަނީ ފާހަގަކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
