ފަޔާ ޓްރަކަށް ދިމާވި މައްސަލަ ޙައްލުކޮށް ފުވައްމުލައް އެއާޕޯޓު އޮތީ އޮޕަރޭޝަނުގައި: މެނޭޖަރު
ފުވައްމުލަކު އެއާޕޯޓުގެ ފަޔާ ޓްރަކަށް ރޭ ދިމާވި މައްސަލަ ޙައްލުކޮށްފައިވާ ކަމަށާއި، އެކަމުގެ ސަބަބުން އެއާޕޯޓުގެ އޮޕަރޭޝަނަށް އަސަރުކޮށްފައިނުވާ ކަމަށް ފުވައްމުލަކު އެއާޕޯޓުގެ މެނޭޖަރު ހުސައިން ޝަރީފު ވިދާޅުވެއްޖެއެވެ.
ރޭ އެ އެއާޕޯޓުގެ ފަޔާ ޓްރަކަށް ގެއްލުމެއް ލިބި، އެ އެއާޕޯޓަށް ޖައްސަން އައި ފްލައިޓެއް އައްޑޫއަށް ރީޑައިރެކްޓް ކުރިކަމަށް ބުނެ ޚަބަރު ފެތުރުނެވެ.
އެކަމާ ގުޅިގެން "ވޮއިސް" އިން ސުވާލުކުރުމުން މެނޭޖަރު ހުސައިން ވިދާޅުވީ، އެއާޕޯޓުގެ ފަޔާ ޓްރަކަށް މައްސަލައެއް ދިމާވި ނަމަވެސް ރޭ އެކަން ޙައްލުކޮށްފައިވާ ކަމަށެވެ. އަދި އެކަމާ ގުޅިގެން ފެތުރެނީ ދޮގު ވާހަކަތަކެއް ކަމަށާއި، އެއާޕޯޓުގެ އޮޕަރޭޝަނަށް އެކަމުގެ ސަބަބުން ބުރޫ އަރާފައިނުވާ ކަމަށް ވެސް ހުސައިން ވިދާޅުވިއެވެ.
ހުސައިން ވިދާޅުވި ގޮތުގައި މިއަދުގެ މިހާތަނަށް ވެސް އެ އެއާޕޯޓުގެ އޮޕަރޭޝަން ދަނީ ކުރިޔަށެވެ.
ފާހަގަކުރެވޭ ގޮތުގައި، މި މަހުގެ ކުރީކޮޅު ވެސް ފުވައްމުލަކު އެއާޕޯޓުގެ ފަޔާ ޓްރަކުގެ ބެލްޓް ފަޅައިގެން ގޮސް، ގާތްގަޑަކަށް އެއް ދުވަހަށް އެ އެއާޕޯޓު ބަންދު ކުރެވުނެވެ. އަލުން އެ އެއާޕޯޓުގެ އޮޕަރޭޝަންތައް ފަށައިފައިވަނީ އައްޑޫން ފުވައްމުލަކަށް ފަޔާ ޓްރަކެއް ގެންގޮސްގެންނެވެ.
ފުވައްމުލައް އެއާޕޯޓް މިހާތަނަށް ހިންގަމުން އައިސްފައިވަނީ ރީޖަނަލް އެއާޕޯޓުންނެވެ. މިދިޔަ އަހަރުތަކުގައި އެއާޕޯޓްގެ ބައެއް ތަކެއްޗަށް ބެލިފައިނެތުމުން ބައެއް ކަހަލަ އާލާތްތައް ބައުވެ މައްސަލަ ދިމާވެފައިހުރިކަން އެމްއޭސީއެލުން ވަނީ މީގެ ކުރިން ފާހަގަކޮށްފައެވެ. ފުވައްމުލަކު އެއާޕޯޓްގެ ބަލަދުވެރި ފަރާތަކީ މިހާރު އެމްއޭސީއެލްއެވެ.
ފުވައްމުލަކަކީ ލޯކަލް ޓޫރިޒަމް ވަރަށްބޮޑަށް ކުރިއަރަމުން އަންނަ ރަށެކެވެ. ފުވައްމުލައް އެއާޕޯޓް ފަޔަރ ޓްރަކަށް ކުއްލިއަކަށް ދިމާވި ކަމަކުން އެއާޕޯޓް ބަންދުވުމާއެކު އެ ސިޓީއަށް ފުރަންގޮސް ތިބި ދަތުރުވެރިންނާއި އަދި މާލެ އައުމަށް ދަތުރަށް ތައްޔާރުވަމުންދިޔަ ގިނަ އަދަދެއްގެ ބަޔަކު ނުފުރިފައި ތިއްބެވެ.
ކައިރި ހިސާބުތަކުން ލޯންޗުގައި ފުވައްމުލަކަށް ދަތުރުކޮށް އުޅުނު ނަމަވެސް، ދުރުހިސާބުތަކުން ފުވައްމުލަކަށް ދިއުމަށް ރައްޔިތުން ބޭނުންކުރަނީ މޯލްޑިވިއަންއެވެ. ފުވައްމުލައް އެއާޕޯޓަށް ހަމައެކަނި ދަތުރުތައް ބާއްވަނީވެސް މޯލްޑިވިއަނުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
