16 އަހަރުން ދަށުގެ ކުދިންނަށް މެލޭޝިއާގައި ސޯޝަލް މީޑިއާ މަނާކުރަނީ!

މެލޭޝިއާގައި އުމުރުން 16 އަހަރުން ދަށުގެ ކުދިންނަށް އަންނަ އަހަރުން ފެށިގެން ސޯޝަލް މީޑިއާ މަނާކުރަން އެގައުމުން ހަމަޖައްސައިފިއެވެ.

މެލޭޝިއާގެ ކޮމިއުނިކޭޝަން މިނިސްޓަރު ފަހުމީ ފަދްޒިލް އިއްޔެ ވިދާޅުވީ މިހާރުވެސް ކުޑަކުދިނަށް ސޯޝަލް މީޑިއާ މަނާކޮށްފައިވާ އޮސްޓްރޭލިއާ އާއި އެހެން ބައެއް ގައުމުތަކުގައި މިކަން ކުރުމަށް ބޭނުންކުރާ އުސޫލުތައް ދިރާސާކުރަމުން އަންނަ ކަމަށެވެ.

އެގޮތުން އޮސްޓްރޭލިއާގައި 16 އަހަރުން ދަށުގެ ކުދިންނަށް ރަޖިސްޓްރީ ކޮށްފައިވާ އެކައުންޓްތައް ވެސް އަންނަ މަހުން ފެށިގެން ސޯޝަލް މީޑިއާ ޕްލެޓްފޯމްތަކުން ޑިއެކްޓިވޭޓްކުރާނެ އެވެ.

މިނިސްޓަރު ވިދާޅުވީ ސޯޝަލް މީޑިއާއާ ކުޑަކުދިން ދުރުކުރަން ޖެހެނީ އެ ކުދިން ސްކޭމްތަކާއި ސައިބަބުލީ އާއި ޖިންސީ ގޯނާ ފަދަ ނުރައްކާތަކުން ސަލާމަތްކުރުމަށް ކަމަށެވެ.

"އަޅުގަނޑުމެން އުންމީދުކުރަނީ ސޯޝަލް މީޑިއާ ޕްލެޓްފޯމްތަކުން 16 އަހަރުން ދަށުގެ އެއްވެސް ކުއްޖަކަށް ޔޫޒާ އެކައުންޓް ހެދުން މަނާކުރަން ސަރުކާރުން ނިންމުމަށް، އެ ޕްލެޓްފޯމްތަކުން ތަބާވެ އަންނަ އަހަރުގެ ނިޔަލަށް އެކަން ފުރިހަމަކޮށް ނިންމާނެ ކަމަށް،"

މެލޭޝިއާގެ ކޮމިއުނިކޭޝަން މިނިސްޓަރު ފަހުމީ ފަދްޒިލް

ޓިކްޓޮކް، ސްނެޕްޗެޓް، ގޫގުލް، ފޭސްބުކް، އިންސްޓަގްރާމް އަދި ވަޓްސްއެޕް ފަދަ ޕްލެޓްފޯމްތަކުން ކުޑަކުދިންނަށް ކުރިމަތިވާ ގެއްލުންތަކުގެ ވާހަކައަކީ ބާރަށް ދެކެވެމުން އަންނަ ވާހަކަތަކެކެވެ. އެހެންކަމުން ސޯޝަލް މީޑިއާ ޕްލެޓްފޯމްތަކަށް ކުޑަކުދިން ހުށަހެޅޭ ނިސްބަތް ދަށްކުރުމަށް ފިޔަވަޅުތައް އަޅާ ގައުމުތައް އަންނަނީ އިތުރުވަމުންނެވެ. އެގޮތުން ފްރާންސް، ސްޕެއިން، އިޓަލީ، ޑެންމާކް އަދި ގްރީސް ފަދަ ގައުމުތަކުން ވެސް އަންނަނީ ސޯޝަލް މީޑިއާ ބޭނުންކުރުމުގައި އުމުރު ކަށަވަރުކޮށްދޭންޖެހޭ، އޭޖް ވެރިފިކޭޝަން އެޕެއް ވެސް ޓެސްޓް ކުރަމުންނެވެ.