ދިރާގުގެ ޑިރެކްޓަރުންގެ ބޯޑުގެ ޕަބްލިކް ޑިރެކްޓަރގެ މަގާމަށް ކުރިމަތިލުމުގެ ފުރުސަތު

ދިރާގުގެ ޑިރެކްޓަރުންގެ ބޯޑުގައި އާންމު ހިއްސާދާރުން ތަމްސީލުކުރާނެ "ޕަބްލިކް ޑިރެކްޓަރު" ގެ މަގާމަށް ކުރިމަތިލުމުގެ ފުރުސަތު އާންމު ހިއްސާދާރުންނަށް ހުޅުވާލައިފިއެވެ.

ދިރާގުން ނެރުނު ނޫސް ބަޔާނެއްގައި ބުނެފައިވާ ގޮތުން، މި މަގާމަށް ކުރިމަތިލުމުގެ ފުރުސަތު ހުޅުވާލާފައިވަނީ މިމަހު 5 ވަނަ ދުވަހުން ފެށިގެންނެވެ. ޕަބްލިކް ޑިރެކްޓަރަކީ ކުންފުނީގެ މެޖޯރިޓީ ހިއްސާދާރުން ފިޔަވައި އެހެން ހިއްސާދާރުންގެ މެދުގައި ނެގޭ ވޯޓަކުން ހޮވޭ، އާންމު ހިއްސާދާރުން ތަމްސީލުކުރާ ފަރާތެކެވެ.

މި މަގާމަށް ހޮވޭ ފަރާތެއްގެ ދައުރަކީ، އެ ފަރާތެއް އިންތިހާބުކުރާ އަހަރީ އާންމު ޖަލްސާއިން ފެށިގެން، އޭގެ ފަހުން ބާއްވާ ދެވަނަ އަހަރީ އާންމު ޖަލްސާގެ ނިޔަލަށެވެ. މި އިންތިހާބު ބޭއްވުމަށް ހަމަޖެހިފައިވަނީ 2026 ވަނަ އަހަރުގެ އޭޕްރީލް މަހު ބާއްވާ ދިރާގުގެ 37 ވަނަ އަހަރީ އާންމު ޖަލްސާގައެވެ.

މި މަގާމަށް ޝަރުތުހަމަވާ އާންމު ހިއްސާދާރުން، "ޕަބްލިކް ޑައިރެކްޓަރުކަމަށް އެދޭ ފޯމު" އާއި އެކު ހުށަހަޅަންޖެހޭ ލިޔެކިޔުންތައް 12 މާރިޗު 2026 ވާ ބުރާސްފަތި ދުވަހުގެ 15:00 ގެ ކުރިން ހުށަހަޅަންޖެހެއެވެ. ފޯމު ހުށަހަޅާނީ ދިރާގު ހެޑް އޮފީހުގެ ކޮމްޕެނީ ސެކްރެޓަރީއަށް އެޑްރެސްކޮށް ސިޓީ އުރައެއްގައެވެ. ނުވަތަ [email protected] އަށް އީމެއިލް މެދުވެރިކޮށްވެސް ހުށަހެޅޭނެއެވެ. އެޕްލިކޭޝަން ފޯމު ދިރާގުގެ އޭ.ޖީ.އެމް ޕޭޖުންނާއި ހެޑް އޮފީހުން ލިބެން ހުންނާނެއެވެ.

ހުށަހަޅާ އެޕްލިކޭޝަންތައް އިވެލުއޭޓްކޮށް ޝޯޓްލިސްޓް ކުރުމުގެ މަސައްކަތް ކުރިއަށްގެންދާނީ ބޯޑުގެ އާރް.އެން.ޖީ (RNG) ކޮމިޓީންނެވެ. މި މަރުހަލާގައި ކުރިމަތިލާ ފަރާތްތަކާ އިންޓަވިއު ކުރުމަކީވެސް އެކަށީގެންވާ ކަމެއް ކަމަށް ދިރާގުން ބުނެއެވެ. ކޮމިޓީން ޝޯޓްލިސްޓް ކުރާ ނަންތައް ބޯޑުގެ ހުއްދައާއެކު އަހަރީ އާންމު ޖަލްސާގެ ނޯޓިސްގައި ހިމަނައި، ވޯޓަށް ހުށަހެޅޭނެއެވެ.

މި މަގާމަށް ހޮވޭނީ އެންމެ ގިނަ ވޯޓު ލިބޭ ފަރާތެކެވެ. ވޯޓު ދިނުމުގެ ފުރުސަތު ޖަލްސާގައި ބައިވެރިވާ ހިއްސާދާރުންނަށް ލިބޭއިރު، ކޮންމެ ހިއްސާއަކަށް ވޯޓެއްގެ އުސޫލުން ވޯޓުލެވޭނެއެވެ.

ދިރާގަކީ މިންތީގެ ހަމަހަމަކަމަށް އިސްކަންދޭ ކުންފުންޏަކަށް ވާތީ، ޝަރުތުހަމަވާ އަންހެން ހިއްސާދާރުން މި މަގާމަށް ކުރިމަތިލުމަށް އެ ކުންފުނިން ވަނީ ބާރުއަޅައި ހިތްވަރުދީފައެވެ.