އެމްއެންޔޫގެ 2026 ވަނަ އަހަރުގެ ދަސްވެނިވުމުގެ ރަސްމިއްޔާތު ފަށައިފި
ލިޔުންތެރިޔާ
ސްޓާފް ރައިޓަރ
ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) ގެ 2025 ވަނަ އަހަރުގެ ދެވަނަ ޓާމްގައި ކިޔަވާ ނިމުނު ދަރިވަރުންގެ ދަސްވެނިވުމުގެ ރަސްމިއްޔާތު މިއަދު ފަށައިފިއެވެ.
އެމްއެންޔޫ އިން މިކަން އިއުލާންކޮށްފައިވަނީ އެ ޔުނިވަރސިޓީން މިއަދު ނެރުނު ރަސްމީ ބަޔާނެއްގައެވެ. އެގޮތުން، އެމްއެންޔޫ އިން މައުލޫމާތު ދޭގޮތުގައި، މި ރަސްމިއްޔާތު ކުރިއަށް ދާނީ 4 ސެޝަނަކަށް ބަހައިލައިގެން އެ ޔުނިވަރސިޓީގެ "އޭ ބްލޮކް" އޮޑިޓޯރިއަމްގައެވެ.
މިއަދު ހެނދުނު ކުރިއަށްދިޔަ ފުރަތަމަ ސެޝަނުގައި ދަސްވެނިވީ ސްކޫލް އޮފް ނާރސިންގްގެ 128 ދަރިވަރުންނެވެ. މި ރަސްމިއްޔާތު ޝަރަފުވެރިކޮށްދިނީ މާލެ ސިޓީ ގްރޫޕް އޮފް ހޮސްޕިޓަލްސްގެ ޗީފް އެގްޒެކެޓިވް އޮފަސަރު، އިބްރާހިމް ޢަބްދުއްރައްޒާޤު ހަލީމެވެ. މި ރަސްމިއްޔާތުގައި ޔުނިވަރސިޓީގެ ޗާންސެލަރ ޑރ. މަޙްމޫދު ޝައުގީއާއި، ވައިސް ޗާންސެލަރާއި، ޔުނިވަރސިޓީގެ އިސްވެރިންނާއި ދަސްވެނިވި ދަރިވަރުންގެ ބެލެނިވެރިން ބައިވެރިވިއެވެ.
މީގެ އިތުރުން، ރަސްމިއްޔާތު ފެށުމުގެ ގޮތުން މަރުޙަބާގެ ބަސް ވިދާޅުވީ ޔުނިވަރސިޓީގެ ވައިސް ޗާންސެލަރ އައިޝަތު ޝެހެނާޒް އާދަމް އެވެ. ވައިސް ޗާންސެލަރ ވާހަކަދައްކަވަމުން ވިދާޅުވީ، ޝަރަފުވެރި މެހެމާން ފަދަ ޚިދުމަތްތެރި ބޭފުޅަކު ރަސްމިއްޔާތަށް ވަގުތު ދެއްވުމަކީ ތައުލީމަށާއި ޤައުމީ ޔުނިވަރސިޓީގެ ހަރަކާތްތަކަށް ދެއްވާ އަހައްމިއްޔަތުކަމުގެ ރަމްޒެއް ކަމަށެވެ. އަދި މާލެ ސިޓީ ގްރޫޕް އޮފް ހޮސްޕިޓަލްސް އާއި ޔުނިވަރސިޓީއާ ދެމެދު އޮތް ގުޅުމުގެ ސަބަބުން ކްލިނިކަލް ތަމްރީނުތަކާއި ފަންނީ ދާއިރާއިން ކުރިއަށް ދިއުމަށް ބޮޑެތި އެހީތެރިކަމެއް ލިބެމުންދާކަން ފާހަގަކޮށް، އެމަނިކުފާނަށް ޝުކުރު އަދާކުރެއްވިއެވެ.
ވައިސް ޗާންސެލަރ ދަސްވެނިންނަށް އިލްތިމާސްކުރެއްވީ އިސްލާމީ އަހްލާޤާއި އޯގާތެރިކަމާއެކު މުޖުތަމައުއަށް ހިދުމަތް ކުރުމަށެވެ. އަދި އުނގެނުމަކީ އަޚްލާޤީ ޒިންމާއެއްކަން ފާހަގަކުރައްވައި، ކާމިޔާބީގެ އަސްލަކީ މުވައްޒަފުންނާއި ދަރިވަރުން ގުޅިގެން ކުރާ މަސައްކަތެއްކަން ވައިސް ޗާންސެލަރ ފާހަގަކުރެއްވިއެވެ.
އެމްއެންޔޫގެ ދަސްވެނިވުމުގެ އިތުރު ސެޝަންތަކެއް މިއަދާއި މާދަމާވެސް ކުރިއަށްދާނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
