ސިއްރު ހެއްކާއި ބެހޭގޮތުން ކުރީގެ ރައީސް މައުމޫން ކުރެއްވި ޓްވީޓް ގެއްލިއްޖެ

ކުރީގެ ރައީސް މައުމޫން އަބްދުލް ގައްޔޫމް ސިއްރު ހެކި ބަހަކީ އިސްލާމީ ޝަރީއަތުގައި އޮންނަ އެއްޗެއް ނޫން ކަމުގައި ވިދާޅުވެ ކުރެއްވި ޓްވީޓް އެމަނިކުފާޏުގެ ޓްވިޓާ ފީޑުން ޑިލީޓް ކޮށްލައްވައިފިއެވެ.

ކީރިތި ގުރުއާނުގައި ވެސް ކީރިތި ރަސޫލާގެ ސުންނަތުގައިވެސް އަދި އެއްވެސް އިމާމެއްގެ ބަސް ފުޅުގައިވެސް ސިއްރު ހެކިބަހުގެ ވާހަކައެއް ނެތް ކަމުގައި މައުމޫން ކުރެއްވި ޓުވީޓުގައި ލިޔުއްވާފައިވެއެވެ.

އެ ޓުވީޓް ޑިލީޓް ކުރައްވާފައިވަނީ ގިނަ ބައެއްގެ ފާޑު ކިޔުންތައް އަމާޒުވުމާއި ގުޅިގެންކަމަށް ގަބޫލު ކުރެވެއެވެ. އެގޮތުން ރާއްޖޭގައި އެންމެ ފުރަތަމަ ސިއްރު ހެކިބަހަށް ބަރޯސާވެ ޝަރީއަތްތައް ހިންގަން ފެށުނީ މައުމޫނުގެ ވެރިކަމުގަ ކަމަށާއި މިހާރު މިވާހަކަތައް މިގޮތަށް ދައްކަވަނީ ކީއްވެގެން ކަމާމެދު ގިނަ އަދަދެއްގެ ބަޔަކު ވަނީ ސުވާލު އުފައްދާފައެވެ.

މައުމޫން މިމޭރުމުން ޓްވީޓް ކުރައްވާފައިވަނީ ނިމިދިޔަ ރިޔާސީ އިންތިހާބާއި ގުޅޭގޮތުން ރައީސް ޔާމީން ސުޕްރީމް ކޯޓަށް ހުށަހަޅުއްވާފައިވާ ދުސްތޫރީ މައްސަލައިގަ ސިއްރު ހެކިވެސް ހުށަހަޅުއްވާފައިވާތީ ކަމަށް ގަބޫލު ކުރެވެއެވެ.

ސިއްރު ހެކިވެރިންނާއި މެދު އަމަލު ކުރައްވާނެ ގޮތެއް ނިންމަވާނީ ބަހުސް ކުރެއްވުމަށް ފަހުގައި ކަމަށް މި މައްސަލައިގެ ރިޔާސަތު ބަލަހައްޓަވާ ޑރ. އަހުމަދު އަބްދުﷲ ދީދީ ވަނީ ވިދާޅުވެފައެވެ.