އަޝްކަރީ މަތިންދާ ބޯޓް ޖެއްސުން: މިއީ ސްޕެއާ ހިފައިގެންއައި ބޯޓެއް

ރާއްޖެއަށް އައި އިނގިރޭސިވިލާތުގެ އަސްކަރީ މަތިންދާ ބޯޓު އައީ ރާއްޖޭގައި އޮތް ބޭރުގެ އެހެން ފްލައިޓަކަށް ބޭނުންވާ ސްޕެއާ ހިފައިގެން ކަމަށް ޤައުމީ ދިފާއީ ބާރުން ބުނެފިއެވެ.

އެމްއެންޑީއެފްގެ އިންފޮމޭޝަން އޮފިސަރ، ކެޕްޓަމް އިބްރާހީމް އާޒިމް ވިދާޅުވީ ވެލާނާ އިންޓަނޭޝަނަލް އެއާޕޯޓަށް ޖެއްސި ޔޫކޭގެ ފްލައިޓަކީ އޭގެ ކުރިން ތެޔޮއަޅަން ރާއްޖޭގައި ޖެއްސި ފްލައިޓަކަށް ދިމާވި ޓެކްނިކަލް މައްސަލައެއްގައި ގްރައުންޑް ވެފައި އޮތް ފްލައިޓެއް ރަނގަޅު ކުރަން ބޭނުންވާ ސްޕެއާ ހިފައިގެން އައި ފްލައިޓެއް ކަމަށެވެ.

އާޒިމް ވިދާޅުވީ 8 އޮކްޓޯބަރުގައި ރާއްޖޭގައި ޖެއްސި އިނގިރޭސި އަސްކަރީ ފްލައިޓަކީ އިންޑޮނޭޝިއާއަށް އިންސާނީ އެހީ ފޯރުކޮށްދިނުމަށް ޙަރަކާތްތެރިވި ފްލައިޓެއް ކަމަށެވެ.

އިނގިރޭސި ރޯޔަލް އެއާފޯސްގެ މަތިންދާ ބޯޓެއް މިއަދު ވެލާނާ އިންޓަނޭޝަނަލް އެއާޕޯޓަށް ޖައްސާފައި ވަނީ މެންދުރުފަހުގެ ވަގުތެއްގައެވެ. އެއަށްފަހު ބޯޓު ފުރާފައި ވަނީ މިއަދު އިރުއޮއްސި 6:41 ގައެވެ.

އަޝްކަރީ ބޯޓާ ބެހޭ މައުލޫމާތު ދިފާއި ބާރުން ހާމަކޮށްފައި މިވަނީ ރާއްޖޭގެ ސިޔާސީ ހާލަތު ހުރި ގޮތުން އެމެރިކާއިން ރާއްޖެ ފޮނުވި ބޯޓެއް ކަމަށް ދޭހަވާ ގޮތަކަށް، މަޖްލިސް މެންބަރު މުސްތަފާ ކުރެއްވި ޓުވީޓަކާ ގުޅިގެންނެވެ.

މުސްތަފާ ކުރެއްވި ޓްވީޓެއްގައި ވިދާޅުވެފައިވަނީ ރައްޔިތުންގެ ނިންމުން ޤަބޫލު ނުކޮށް، ރައްޔިތުންނަށް ގޮންޖައްސަވަންޏާ އެމެރިކާގެ މިލިޓަރީ މެދުވެރިކޮށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމް ހައްޔަރު ކުރަން ޖެހިދާނެ ކަމަށެވެ.