މެކްސިކޯ ބަލިކޮށް، އިނގިރޭސިން ކުއާޓާ ފައިނަލަށް

ވަރލްޑްކަޕް ކުއާޓާ ފައިނަލުގެ ޖާގައެއް މުބާރާތް ބާއްވާ އެއްޤައުމުކަމަށްވާ މެކްސިކޯ ބަލިކޮށް އިނގިރޭސިން ހޯދައިފިއެވެ.

ނޮކްއައުޓް ސްޓޭޖްގައި މިއަދު މެކްސިކޯ އާއި އިންގްލެންޑް ބައްދަލުކުރިމެޗް އިންގްލެންޑުން ކާމިޔާބުކުރީ 3-2 ގެ ނަތީޖާއިންނެވެ. ފޯރިގަދަ ކުޅުމެއް ފެނިގެންދިޔަ މިމެޗްގައި އިނގިރޭސިންނަށް ގޯލް ހުޅުވާލަދިނީ 36 ވަނަ މިނެޓް ތެރޭގައި ބެލިންހަމްއެވެ. އޭގެ މިނެޓެއްފަހުން ބެލިންހަމް ވަނީ އިތުރު ލަނޑެއް ޖަހައި މެޗްގެ ނަތީޖާ ދެ ލީޑަށް ފުޅާކޮށްފައެވެ. އިނގިރޭސިން ދެ ލަނޑުގެ ލީޑެއް ނަގާފައިވަނިކޮށް މެކްސިކޯއިން ވަނީ ފުރަތަމަ ހާފް ނިމުމުގެ ކުރިން ލަނޑެއް ޖަހައި އުއްމީދު އާކޮށްފައެވެ. މި ލަނޑު ޖަހައިދިނީ، ލިބުނު ހިލޭ ޖެހުމަކުން ޖޫލިއަން ކީނޯނޭޒް އެވެ.

ދެވަނަ ހާފް ފަށައިގެން އެންމެ ފުރަތަަމަ ނުރައްކާތެރި ހަމަލާއެއް އުފެއްދީ މެކްސިކޯއެވެ. އެގޮތުން ނިކޯ އޯރިލީ ފޮނުވާލި ހަމަލާ އަމާޒްވީ، ގޯލުގެ ދަނޑީގައެވެ. މެޗްގެ 54 ވަނަ މިނެޓުގައި އިންގްލެންޑްގެ ކަނާތް ފަޅިން ކުޅެމުންދިޔަ ޖަރެލް ކުއަންސާ ކުރި ނުރައްކާތެރި ފައުލަކާ ގުޅިގެން، ވީއޭއާރް ބެލުމަށްފަހު ރެފްރީ އަލީރޭޒާ ފަގާނީ އޭނާއަށް ރަތްކާޑެއް ދައްކައި ދަނޑުން ފޮނުވާލާފައެވެ. އެހެންކަމުން މެޗްގެ ބާކީ ބައި އިނގިރޭސިން ފުރިހަމަ ކުރީ 10 ކުޅުންތެރިންނާއެކުގައެވެ.

އެއްކުޅުންތެރިއަކު މަދުކޮށް ކުޅުނުނަމަވެސް ހެރީ ކޭން ވަނީ 60 ވަނަ މިނެޓް ތެރޭގައި ޕެނަލްޓީއަކުން ލަނޑެއް ޖަހައި ކމެޗްގެ ނަތީޖާ 3-1 ކަށް ބަދަލުކޮށްފައެވެ. މެޗްގައި ފެނިގެންދިޔަ ފަހު ލަނޑު، މެކްސިކޯއަށް ޖަހައިދިނީ، ރައުލް ހިމެނޭޒް އެވެ.

ވަރލްޑްކަޕް ކުއާޓާ ފައިނަލުގައި އިންގްލެންޑް ނިކުންނާނީ ނޯވޭ އާ ދެކޮޅަށެވެ. ނޯވޭ ކުއާޓާ ފައިނަލަށް ދަތުރުކުރީ ބްރެޒިލް ބަލިކުރުމަށްފަހުގައެވެ.