އެޗްޑީސީއިން ހުޅުމާލޭގައި ޖަހާފައިހުރި ދަގަނޑު ހޮޅިތައް ދޯންޏެއްގައި ގެންދަނިކޮށް ހުއްޓުވައިފި
ލިޔުންތެރިޔާ
ޝަފްރާޒް އަހްމަދު
ރިޔާސީ އިންތިހާބުގައި ރައީސް ޔާމީނަށް ތާއިދުއޮތްކަން ދައްކުވައިދިނުމަށް ކެމްޕޭން ދިދައާއި ދިދަ ފައްޗާއި ތަފާތު ބެނާތައް ދެމުމަށް ޓަކައި ހުޅުމާލޭގެ އެކި ހިސާބުތަކުގައި އެޗްޑީސީއިން ޖަހާފައިވާހުރި 3000 އަށްވުރެ ގިނަ އަދަދެއްގެ ދަގަނދު ހޮޅިތައް ކުއްޔައްނަގާފައި އޮތް ދޯންނަކަށް އަރުވައިގެން ހުޅުމާލެއިން ބޭރު ކުރަން އުޅެނިކޮށް ހިފަހައްޓައިފިއެވެ.
މިކަން ހުއްޓުވާފައި މިވަނީ އާންމުންގެ ބަޔަކަށް ފެނިގެން އެކަން ފުލުހުންނަށް އެންގުމުންނެވެ.
ހުޅުމާލޭގެ ހުރިހާ މަގެއްގައިހެން ހޮޅިދަނޑި ޖަހާ ރައީސް އަބްދުﷲ ޔާމީންގެ ކެމްޕޭން ދިދައާއި ދިދަ ފައްޗާއި ތަފާތު ބެނާތައް ދަމާފައިހުއްޓެވެ. އަދި އެތަކެތި ދެމުމުގައި ކެންޕޭން ދުވަސްވަރު މަސައްކަތް ކުރީ އެޗްޑީސީގެ މުވައްޒަފުން ކަމަށް އޭރު ބައެއް މީޑިއާތަކުން ތުހުމަތު ކުރިއެވެ.
މިހޮޅިތައް އިންތިހާބު ނިމުމުން ކުރީގެ ގެރިކޮށި ހުރި ތަނުގެ ތެރޭގައި ބަހައްޓާފައިހުރީ ކަމަށް އެޗްޑީސީގެ މުވައްޒަފަކު ވިދާޅުވިއެވެ. އަދި މިއަދު ބިދޭސީ މަސައްކަތު މީހުންތަކެއް ލައްވާ މިހޮޅިތައް ދޯންޏަގެންދިއައީކަމަށް ހަބަރު ލިބެއެވެ.
"އެތަކެތި ނެރެގެން ގެންދިއުމުގައި ބައިވެރިވި މަދު ދިވެހި މުވައްޒަފަކަށް ނޫނީ ނޭނގޭނެ. ދެން ތިބީ ހުސް ބިދޭސީ މަސައްކަތު މީހުން. އެމީހުން ލައްވާ އެޗްޑީސީގެ ލޮރީއެއްގައި އެތަނަށް ގެންގޮސް ދޯންޏަށް އަރުވަމުން ދިޔައީ. ވަރަށް ސިއްރުން އެކަމެއް ކުރަމުން ދަނިކޮށް ފުލުހުން ގޮސް ހުއްޓުވީ،" އެޗްޑީސީގެ މުވައްޒަފު މީހާ ސީއެންއެމުގައި ބުނެފައިވެއެވެ.
އެޗްޑީސީ އަށް ވަނީ މިނޫންވެސް އެތައް ތުހުމަތު ތަކެއް ރިޔާސީ އިންތިހާބައި ގުޅުވައިގެން ކުރެވެމުންނެވެ. އެގޮތުން ރިޔާސީ އިންތިހާބަށް ބޮޑެތި ހަރަދު ތަކެއްކޮށް އެ ކުންފުނި ބަނގުރޫޓުވެވަފައިވާކަމުގެ ތުހުމަތުތައް ދަނީ ކުރެވެމުންނެވެ.
ހަމައެހެންމެ ކެންޕޭން ޖަގަހައެއް ގޮތުގައި އަދި އެޗްޑީސީން ބޭނުންކުރި ޕްރީ ސުކޫލުގައި ހުރި ލިއުންތަކެއް ނައްތާލަން އުޅުނު މައްސަލައެއްގައި ވެސް އެކޯޕަރޭޝަންގެ މައްޗަށް ދަނީ ތުހުމަތު ކުރަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
