ކުލަބު ވޯލްޑްކަޕް: ސުއަރޭޒްގެ މޮޅު ކުޅުމާއެކު އިންޓަ މިއާމީ ދެވަނަ ބުރުން ޖާގަ ހޯދައިފި

އެމެރިކާގައި މިހާރު ކުރިއަށްދާ ފީފާ ކުލަބު ވޯލްޑްކަޕް ފުޓްބޯޅަ މުބާރާތުގެ ގުރޫޕް އޭގައި މިއަދު ހެނދުނު ޕަލްމެއިރަސް އާއި އިންޓަ މިއާމީ ވާދަކުރި މެޗު 2-2 ގެ ނަތީޖާއަކުން އެއްވަރުވެ ދެޓީމު ވެސް މުބާރާތުގެ ދެވަނަ ބުރަށް ކޮލިފައިވެއްޖެއެވެ.

މުބާރާތުގައި އިންޓަ މިއާމީ ކުޅުނު ފުރަތަމަ މެޗުގައި އަލް އަހްލީ އާއި ވާދަކޮށް 0-0 ގެ ނަތީޖާއަކުން އެއްވަރުވި ނަމަވެސް ދެވަނަ މެޗުގައި އެޓީމުން ވަނީ 2-1 ގެ ނަތީޖާއަކުން ޕޯޓޯ ބަލިކޮށްފައެވެ. އަދި ޕަލްމެއިރަސްގެ ފުރަތަމަ މެޗުގައި ޕޯޓޯ އާއި ވާދަކޮށް 0-0 ގެ ނަތީޖާއަކުން އެއްވަރުވި ނަމަވެސް ދެވަނަ މެޗުގައި އެޓީމުން ވަނީ 2-0 ގެ ނަތީޖާއަކުން އަލް އަހްލީ ބަލިކޮށްފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު މިމެޗުގައި ފުރަތަމަ ލަނޑުޖަހައި ކުރިހޯދީ އިންޓަ މިއާމީ އިންނެވެ. މިލަނޑު ފުރަތަމަ ހާފުގެ 16 ވަނަ މިނެޓުގައި ކާމިޔާބުކޮށްދިނީ ފޯވާޑް ޓަޑިއޯ އެލެންޑޭ އެވެ. މިއީ އެޓީމުގެ ތަޖުރިބާކާރު ފޯވާޑް ލުއިސް ސުއަރޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަަމަ ހާފުގެ ކުޅުން ނިމިގެންދިޔައޫ ދެޓީމުން ކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން އިންޓަ މިއާމީ ކުރީގައި އޮވެގެންނެވެ.

މެޗުގެ ދެވަނަ ހާފު ވެސް ވަރުގަދަކޮށް ފެށީ އިންޓަ މިއާމީ އިންނެވެ. ނަތީޖާއެއްގެ ގޮތުން ދެވަނަ ހާފުގެ 65 ވަނަ މިނެޓުގައި އެޓީމުން ވަނީ އިރުތު ލަނޑެއް ކާމިޔާބުކޮށް ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ލުއިސް ސުއަރޭޒް އެވެ.

އިންޓަ މިއާމީން ދެލަނޑުގެ ލީޑެއް ހޯދުމާއެކު ޕަލްމެއިރަސް އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. އަދި މެޗުގެ ފަހު 10 މިނެޓް ތެރޭގައި އެޓީމުން ވަނީ ދެލަނޑު ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ.

އެގޮތުން އެޓީމުން ފަރަގު ކުޑަކުރި ލަނޑު މެޗުގެ 80 ވަނަ މިނެޓުގައި ޕައުލީނިއޯ ކާމިޔާބުކުރިއިރު، އޭގެ ހަތް މިނެޓުފަހުން އެޓީމަށް ނަތީޖާ އެއްވަރުކޮށްދިނީ މިޑްފީލްޑަރު މޮރީސިއޯ އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ތިން މެޗުން މިދެޓީމަށް ވެސް ފަސް ޕޮއިންޓް ލިބިފައިވާއިރު، ލަނޑުގެ ތަފާތުން ގުރޫޕްގެ އެއްވަނަ ލިބުނީ ޕަލްމެއިރަސް އަށެވެ. އަދި ގުރޫޕްގެ ދެވަނަ ޓީމުގެ ގޮތުގައި އިންޓަ މިއާމީ އަށް ވެސް ވަނީ މުބާރާތުގެ ދެވަނަ ބުރުން ފުރުސަތު ލިބިފައެވެ.