”ޣައްޒާގެ މައްސަލަ“ ހައްލުކޮށް، ސުލްހައިގެ މަޝްވަރާތައް އަލުން ފަށަން ޓްރަމްޕްގެ ބައިވެރިވުން މުހިންމު: ސައުދީ

ޣައްޒާގައި ހިނގަމުންދާ ”ކާރިސާއަށް“ ނިމުމެއް ގެނެސް، އިޒްރޭލާއި ފަލަސްޠީނާ ދެމެދު ސުލްހަ ގާއިމްކުރުމަށް، އެމެރިކާގެ ރައީސް ޑޮނަލްޑް ޓްރަމްޕް ސީދާކޮށް ބައިވެރިވުން، މުހިންމު ދައުރެއް އަދާކުރާނެ ކަމަށް ސައުދީ ޢަރަބިއްޔާގެ ޚާރިޖީ ވަޒީރު ޕްރިންސް ފައިސަލް ބިން ފަރްހާން ވިދާޅުވެއްޖެއެވެ.

ސައުދީ ޢަރަބިއްޔާ އާއި ފްރާންސުން އިސްވެ ނިއުޔޯކްގައި ފަލަސްޠީނުގެ ”ޓޫ ސްޓޭޓް ސޮލިޔުޝަން“އާ ބެހޭގޮތުން ބާއްވާ މަތީ ފަންތީގެ ކޮންފަރެންސެއްގައި ވާހަކަދައްކަވަމުން ޕްރިންސް ފައިސަލް ވަނީ މެދުއިރުމަތީގެ ސުލްހައިގެ މަސައްކަތްތަކުގައި ވޮޝިންގޓަންގެ މުހިންމު ދައުރު ފާހަގަކުރައްވާފައެވެ.

"މެދުއިރުމަތީގައި ސުލްހަ ގާއިމްކުރުމުގައި އެމެރިކާއަކީ މުހިންމު ބައިވެރިއެއް. ރައީސް ޓްރަމްޕް މި ދާއިރާއިން ކާމިޔާބީތަކެއް ހާސިލްކޮށްފައިވާއިރު، އެބޭފުޅާގެ ސީދާ ބައިވެރިވުމަކީ ކޮންމެހެން ބޭނުންތެރި ކަމެއް. ޓްރަމްޕް އަކީ ސުލްހައަށް ލޯބިކުރާ ބޭފުޅެއް އަދި ހަނގުރާމައާ ދެކޮޅު ބޭފުޅެއް. އެބޭފުޅާގެ ބައިވެރިވުން، ޣައްޒާގެ ކާރިސާއަށް ނިމުމެއް ގެނެސް، އިޒްރޭލާއި ފަލަސްޠީނާ ދެމެދު އޮތް ބޮޑު މައްސަލަ ހައްލުކުރުމަށް މަގުފަހިކޮށްދީފާނެ." ޕްރިންސް ފައިސަލް ވިދާޅުވިއެވެ.

މީގެ އިތުރުން ސައުދީ ޚާރިޖީ ވަޒީރު ވަނީ ފަލަސްޠީނުގެ ދައުލަތެއްގެ ގޮތުގައި ރަސްމީގޮތުން ބަލައިގަތުމަށް ތާއީދު ހޯދުމަށްޓަކައި، ޔޫރަޕާއި އޭޝިޔާގެ ގިނަ ގައުމުތަކަކާ މަޝްވަރާކުރަމުންދާކަން ހާމަކުރައްވާފައެވެ. އެގޮތުން، "ގިނަ ގައުމުތައް ވަނީ ފަލަސްޠީނުގެ ދައުލަތް ބަލައިގަންނަން ތައްޔާރުވެފައި،" ކަމަށް ވެސް ވިދާޅުވިއެވެ.

ނޫސްވެރިންގެ ބައްދަލުވުމުގައި ޕްރިންސް ފައިސަލް ވަނީ ފަލަސްޠީނުގެ ރައްޔިތުންގެ ހައްގުތަކަށް ސައުދީ ޢަރަބިއްޔާއިން ދެމުންދާ ވަރުގަދަ އެއްބާރުލުން ތަކުރާރުކުރައްވާފައެވެ. މިގޮތުން، މިނިވަން ފަލަސްޠީނުގެ ދައުލަތެއް އުފެއްދުމަކީ ފަލަސްތީނަށް އޮތް ހައްގެއް ކަމަށް އޭނާ ފާހަގަކުރެއްވިއެވެ.

މީގެ އިތުރުން ޕްރިންސް ފައިސަލް ވިދާޅުވީ، ޣައްޒާގެ ގަތުލް އާއްމު ނިމުމަކަށް ގެނައުމުގެ އެއްބަސްވުމެއް އަލުން އެކުލަވާލަން މިސްރާއި، ގަތަރާއި، އެމެރިކާއިން ކުރަމުންދާ މަސައްކަތްތަކަށް ސައުދީ ޢަރަބިއްޔާއިން ފުރިހަމައަށް ތާއީދުކުރާކަމަށާ، އެހެންނަމަވެސް، ޣައްޒާ އެކަހެރިކުރުމަށް ނުވަތަ ހިފަން ކުރާ ހުރިހާ މަސައްކަތަކާ ދެކޮޅު ހަދާނެ ކަމަށެވެ.