ޤާނޫނަށް ބަދަލު ގެނެސް ޖުޑީޝަލް ކައުންސިލް އަލުން އެކުލަވާލާނަން: ރައީސް މުޢިއްޒު
ލިޔުންތެރިޔާ
ޚަދީޖާ އަރުފާ
ޤާނޫނަށް ގެންނަންޖެހޭ ބަދަލުތައް ގެނެސްގެން ޖުޑީޝަލް ކައުންސިލް އަލުން އެކުލަވާލައްވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިއަދުގެ ނޫސްވެރިންގެ ބައްދަލުވުމުގައި ރައީސް ވިދާޅުވީ، ނިމިދިޔަ އެމްޑީޕީ ވެރިކަމުގައި ޖުޑިޝަރީއަށް ނުފޫޒް ފޯރުވުމަށް ގިނަ ކަންތައްތަކެއް ކޮށްފައިވާ ކަމަށެވެ. އެގޮތުން ޖޭއެސްސީގެ ދަށަށް ޖުޑީޝަލް އެޑްމިނިސްޓްރޭޝަން ގެނެސްފައިވާ ކަމަށާ، އެކަމުގެ ސަބަބުން ޖުޑީޝަރީގެ ތެރެއަށް ސަރުކާރުގެ ނުފޫޒު ފޯރުވުމުގެ ފުރުސަތު އޮންނަކަން ފާހަގަކުރެއްވިއެވެ.
އަދި ޖުޑީޝަރީ ރިފޯމް ކުރުމަށް މި ސަރުކާރުން ކުރުމަށް ނިންމާފައިވާ ކަންކަމުގެ ތެރެއިން، ޖޭއެސްސީގެ ދަށުގައި ޑީޖޭއޭ އޮންނަ އޮތުން ނިމުމަކަށް ގެނައުމަށް ނިންމަވާފައިވާ ކަމަށް ރައީސް ވިދާޅުވިއެވެ.
އެންމެ ފުރަތަމަ ޖުޑިޝަރީ ގާނޫނު ހެދުނުއިރު ޖުޑީޝަރީގެ ކަންކަން އޮތްގޮތަށް، ގާތްގަނޑަށް އެގޮތަށް ހެދުމުގެ ވިސްނުން އަޅުގަނޑުމެންގެ އެބައޮތް. އޭގެ ތެރޭގައި ޖުޑީޝަލް ކައުންސިލް ކިޔާ ކައުންސިލެއް އޭރު އޮތް. 2011 ވަނަ އަހަރު، އެމްޑީޕީ ވެރިކަމުގައި، ޖުޑީޝަލް ކައުންސިލް އެއީ ބާތިލް ކަމެއް ކަމަށް، އޭރު ކުރެވުނު ހުކުމެއްގެ ތެރެއިންހެން އަޅުގަނޑަށް ހީވަނީ، އޮތީ ބާތިލް ވެފައި.
ރައީސް މުޢިއްޒު
އެހެންނަމަވެސް އެ ކައުންސިލް އަލުން އުފެއްދުމަށް ކުރަންޖެހޭ ކަންކަންކޮށް، ޑިޖޭއޭ އެ ކައުންސިލްގެ ދަށަށް ގެނައުމަށް ނިންމަވާފައިވާ ކަމަށް ރައީސް ވިދާޅުވިއެވެ.
އެގޮތުން އުފައްދާ ޖުޑީޝަލް ކައުންސިލްގައި ހިމެނޭނީ،
1) އުއްތަމަ ފަނޑިޔާރު
2) ސްޕްރީމް ކޯޓުގެ ހުރިހާ ފަނޑިޔާރުން
3) ހައިކޯޓާ ސްޕީރިއާ ކޯޓުތަކުގެ އިސް ފަނޑިޔާރުން
އެހެންވީމާ ޖުޑީޝަލް ކައުންސިލް އަލުން ރީއިންސްޓޭޓް ކުރެވޭ ގޮތަށް ގާނޫނުތަކަށް ގެންނަންޖެހޭ ބަދަލުތައް ގެނައުމާ، އަދި އޭގެ އިތުރަށް އުއްތަމަ ފަނޑިޔާރާ ޖުޑީޝަލް ކައުންސިލްއަށް ޖަވާބުދާރީވާ ތަނަކަށް ޑީޖޭއޭ ބަދަލުވެގެން ދިޔުން. އަދި ޗީފް ޖުޑީޝަލް އެޑްމިނިސްޓއރޭޓާ ޖަވާބުދާރީވާންޖެހޭނީ ޖުޑީޝަލް ކައުންސިލްއަށް ކަމަށް ބަދަލުވުމަކީ ކޯޓުތަކުގެ ނިޒާމަށް އަންނަންޖެހޭ ރަނގަޅު ބަދަލެއް
ރައީސް މުޢިއްޒު
ރައީސް ވިދާޅުވީ، ނިމިދިޔަ ސަރުކާރުން ގެނައި ބަދަލާއެކު ކޯޓުތަކުގެ އެންމެ ބާރުގަދަ ފަރާތަކަށް ހުންނާނީ އެޑްމިނިސްޓްރޭޓާ ކަމަށާ އެހެންނަމަވެސް ސަރުކާރުން ގެންނަ ބަދަލާއެކު ކޯޓުތަކުގެ ފަނޑިޔާރުންނަށް ބާރުތައް ލިބިގެންދާނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
