ހަސީނާގެ އިސްތިއުފާއިން ސާފުވީ ރައްޔިތުންގެ ބާރުވެރިކަން: ޠާރިޤް

ބަންގްލަދޭޝްގެ ބޮޑުވަޒީރު ސެއިހް ހަސީނާ އިސްތިއުފާދެއްވުމަށްފަހު ޤައުމު ދޫކޮށް ފިއްލަވައި ވަޑައިގަތުމުން ސާފުވެގެންދިޔައީ ރައްޔިތުންގެ ބާރުވެރިކަން ކަމަށް ބަންގްލަދޭޝް ނޭޝަނަލިސްޓް ޕާޓީ (ބީއެންޕީ)ގެ ވެރިޔާ ޠާރިޤް އަލް-ރަޙްމާން ވިދާޅުވެއްޖެއެވެ.

ބަންގާޅުގައި ސަރުކާރާ ދެކޮޅަށް ކުރަމުންދިޔަ ވަރުގަދަ މުޒާހަރާތަކަށްފަހު އެޤައުމުގެ ބޮޑުވަޒީރު ސެއިހް ހަސީނާ ވަނީ މިއަދު ހެނދުނުގެ ވަގުތެއްގައި މަޤާމުން އިސްތިއުފާ ދެއްވުމަށްފަހު، އަމިއްލަ ވަޒަންދޫކޮށް ސިއްރިޔާތުގައި އަވައްޓެރި އިންޑިއާއަށް ވަޑައިގެންފައެވެ. ބަންގާޅުގެ ވެރިކަން މަގުމައްޗަށް ދޫކޮށްލެއްވުމަށްފަހު ޤައުމު ދޫކޮށް ދިޔަ ދިއުމާ ގުޅޭގޮތުން އިދިކޮޅު ބީއެންޕީގެ އެކްޓިން ޗެއާޕާސަން ވިދާޅުވީ، ހަސީނާގެ އިސްތިއުފާއިން ފެނިގެންދިޔައީ ރައްޔިތުންގެ ބާރުވެރިކަން ކަމަށެވެ.

މުޒާހަރާއަށް ނިކުތް ރައްޔިތުންގެ ހިތްވަރުން ދައްކައިދިނީ، އަނިޔާވެރިންގެ މައްޗަށް ކުރި ހޯދޭނޭކަން ކަމަށާއި، މިއީ ތާރީހުގައި ލިޔެވިގެންދާނޭ ނަމޫނާ އެއްކަމަށެވެ.

މުޖުތަމައުގެ ހުރިހާ ފަންތިއަކަށް ނިސްބަތްވާ މީހުން މުޒާހަރާގައި ބައިވެރިވިއިރު، ޠާރިޤް ވަނީ އެ ހުރިހާ ފަރާތްތަކަށް ތަހުނިޔާ ވިދާޅުވެފައެވެ.

"މިއޮތީ ރައްޔިތުން އެކައްޗެއް ކިޔައި ޑިމޮކްރެޓިކް ހަމަތަކުގެ މަތިން ޤައުމު ކުރިއަށްގެންދިއުމަށް އެންމެނަށް ފުރުސަތު ލިބިފައި" ބީއެންޕީގެ ޗެއާމަން ޠާރިޤް އަލް-ރަޙްމާން ވިދާޅުވިއެވެ.

ޠާރިޤަކީ ބަންގާޅުގައި މިފަހުން މުޒާހަރާތައް ފެށިގެން މިއަދާހަމަޔަށް އާއިރު، އެކަމުގައި ކުރިއަށްދިއުމަށް އެންމެބޮޑަށް ގޮވާލެއްވި އެއް ސިޔާސީ ލީޑަރެވެ.

ޔުނިވަރސިޓީ އަދި ކޮލެޖްގައި ކިޔަވާކުދިންގެ ބޮޑު ހިއްސާއަކާއެކު ބަންގާޅުގައި ކުރިއަށްދިޔަ މުޒާހަރާތަކުގައި ގިނަ އަދަދެއްގެ ދަރިވަރުން ވަނީ މަރުވެފައެވެ.