ނަތަންޔާހޫގެ އަންހެނުންނާ ދެކޮޅަށް ޖިނާއީ ތަޙުޤީޤެއް ފަށައިފި

ހައްދުފަހަނައަޅާފައިވާ އިސްރާއީލު ޖަމާޢަތުގެ ބޮޑުވަޒީރު ބެންޖަމިން ނަތަންޔާހޫގެ އަންހެނުން ސާރާ ނަތަންޔާހޫއާ ދެކޮޅަށް ޖިނާއީ ތަޙުޤީޤެއް ފަށައިފިކަމަށް އިސްރާއީލުގެ ސްޓޭޓް އެޓަރނީ އޮފީހުން އާދިއްތަ ދުވަހު ހާމަކޮށްފިއެވެ.

އިސްރާއީލުގެ އިދިކޮޅު ޕާޓީގެ މެންބަރެއް ކަމަށްވާ ނައާމާ ލަޒިމީ އޭނާގެ އެކްސް އެކައުންޓްގައި ހާމަކޮށްފައިވާ ގޮތުގައި، މި ތަޙުޤީޤު ފެށިފައިވަނީ 26 ޑިސެމްބަރު 2023 ގައި ކަމަށެވެ.

މި ތަޙުޤީޤު ފެށިފައިވަނީ އިސްރާއީލުގެ ޗެނަލް 12 ގެ "އުވްދާ" ނިއުސް ޕްރޮގްރާމުން ޑިސެމްބަރު މަހު ގެނެސްދިން ރިޕޯޓެއްގެ ފަހުންނެވެ. އެ ރިޕޯޓުގައި ބުނެފައިވަނީ ސާރާ ނަތަންޔާހޫ އޭނާގެ ފިރިމީހާގެ ކޮރަޕްޝަން މައްސަލައިގެ މުހިންމު ހެއްކަކަށް ބިރުދެއްކުމަށް މަސައްކަތްކޮށްފައިވާ ކަމަށެވެ. އަދި އެޓަރނީ ޖެނެރަލްއާއި އޭނާގެ ނައިބު އަދި ބެންޖަމިން ނަތަންޔާހޫއާ ދެކޮޅު އެހެން އިސް މީހުންނާ ދެކޮޅަށް މުޒާހަރާތައް އިންތިޒާމުކޮށްފައިވާ ކަމަށްވެސް އެ ރިޕޯޓުގައި ބުނެފައިވެއެވެ.

ސްޓޭޓް އެޓަރނީ އޮފީހުން ބުނެފައިވާ ގޮތުގައި މި މައްސަލަ ބަލަމުން ގެންދަނީ އިސްރާއީލު ފުލުހުންނާއި އެޓަރނީ އޮފީހުގެ ސައިބަރ ޑިޕާޓްމަންޓުންނެވެ.

މިހާރުވެސް ބެންޖަމިން ނަތަންޔާހޫއާ ދެކޮޅަށް ރިޝްވަތު ހިފުމާއި، ފްރޯޑް އަދި ޚިޔާނާތްތެރިވުމުގެ ދަޢުވާތަކެއް އުފުލައި، ޝަރީޢަތް ހިނގަމުންދާކަން ފާހަގަކޮށްލެވެއެވެ.