އެޗްޑީސީގެ މާލީ ހާލަތު ދަށްވެގެން މަސައްކަތު ގަޑިތަކަށް ބަދަލު ގެނެސްފި

އެޗްޑީސީގެ މަސައްކަތު ގަޑިތަކަށް މިއަދުން ފެށިގެން ބަދަލު ގެނެސްފައިވާކަން މިއަދު އެތާނގެ ހުރިހާ މުވައްޒަފުންނަށް ފޮނުވި އިންޓާނަލް މެމޯއަކުން އަންގައިފިއެވެ.

އެޗްޑީސީގެ މެނޭޖިންގ ޑައިރެކްޓަރ އަހްމަދު އާސިފް ސޮއިކޮށްފައިވާ މި މެމޯގައި ވަނީ އެކުންފުނީގެ ކޭޝް ފުލޯގެ ހާލަތު ހުރިގޮތުން ރަސްމީ މަސައްކަތު ގަޑި ހަވީރު 6 ޖަހަންދެން އެކަނި ކުރިއަށް ގެންދިޔުމަށް މެނޭޖްމެންޓުން ނިންމާފައިވާ ކަމަށެވެ.

ހުރިހާ މުވައްޒަފުންވެސް އިތުރުގަޑީގެ ގޮތުގައި މަސައްކަތް ކުރުން މަދު ކުރުމަށާއި ރަސްމީ ގަޑި ނޫން ގަޑިތަކުގައި ކުރާ މަސައްކަތްތައްވެސް މަދު ކުރުމަށް މި މެމޯގައި އަންގައިފައިވެއެވެ. ނަމަވެސް ޝިފްޓް ޑިއުޓީގެ އުސޫލުން މަސައްކަތްކުރާ މުވައްޒަފުންގެ ގަޑިތަކަށް އެއްވެސް ބަދަލެއް އައިސްފާ ނުވާނެ ކަމަށް މި މެމޯގައި ބަޔާންކޮށްފައިވއެވެ.

ހަވީރު 6 އެއްގެ ފަހުން އެއްވެސް މަސައްކަތެއް ކުރެވޭނީ އެ މަސައްކަތެއް ކުރަން އެދޭ ޑިޕާޓްމެންޓުގެ އިސްވެރިޔާ، ހިއުމަން ރިސޯސަސްގެ އެންމެ އިސްވެރިޔާގެ ހުއްދަ ހޯދައިގެން ކަމަށްވެސް މި މެމޯގައި އިތުރަށް ބުނެފައިވެއެވެ.