އެމްޑީޕީގެ އަމާޒަކީ މަޖިލީހުގެ ބޮޑު މެޖޯރިޓީ މުޅި ރާއްޖެއިން ނެގުން: ރަައީސް ޞާލިހު
ލިޔުންތެރިޔާ
ޚަދީޖާ އަރުފާ
އެމްޑީޕީގެ އަމާޒަކީ ކުރިއަށް އޮތް ރައްޔިތުންގެ މަޖިލީހުގެ ބޮޑު މެޖޯރިޓީއެއް އެމްޑީޕީން ހޯދުން ކަމަށް އިދިކޮޅު މައި ޕާޓީ އެމްޑީޕީގެ އެޑްވައިޒަރ އަދި ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ޅ. ހިންނަވަރުގައި ރޭ ކުރިޔަށްދިޔަ ކެމްޕެއިން ޖަލްސާގައި ވާހަކަދައްކަވަމުން ރައީސް ޞާލިހު ވިދާޅުވީ އެމްޑީޕީއަށް ކުރަން އޮތީ ބުރަ މަސައްކަތެއް ކަމަށެވެ. އެގޮތުން އެމްޑީޕީ ފެށިގެން އައު އިރުވެސް ކުރަންޖެހުނީ އެ މަސައްކަތް ކަމަށާ، އެއީ ރާައްޖެ ހަމަ މަގަށް އެޅުވުމުގެ މަސައްކަތް ކަމަށް އެމަނިކުފާނު ވިދާޅުވުއެވެ.
މިއާއެކު ރައީސް ޞާލިހު ވިދާޅުވީ، އެމަނިކުފާނު ބޭނުންފުޅު ނަމަ ހަމަޖެހިލައިގެން ގޭގައި އާއިލާ އާއި އެކު އުޅެވޭނެ ކަމަށެވެ. އެހެން ނަމަވެސް ރާައްޖެ މިހާރުދާ މިސްރާބުގެ ގޮތުން، ފަސް އަހަރު ވެރިކަންކުރި މީހެއްގެ ހައިސިއްޔަތުން އެފަދައިން އަރާމު ކުރަން އޮވެވެން ނެތް ކަމަށް އެމަނިކުފާނު ވަނީ ވިދާޅުވެފައެވެ.
އަދި ކުރިއަށް މަޖިލީހުގެ އިންތިޚާބުގެ ވޯޓުގެ، ނަތީޖާ ފޮރޮޅިގެންދާ ގޮތުން ހީނުކުރާ ވަރުގެ ދައްޗާއި އުނދަގޫ ކުރިމަތިލާން ޖެހިދާނެ ކަމަށާ، އެހެން ކަމުން އެމްޑީޕީގެ އަމާޒަކީ މަޖިލީހުގެ މެޖޯރިޓީ ހޯދުން ކަމަށް އެމަނިކުފާނު ވިދާޅުވިއެވެ.
އެހެން އެއްވެސް ސަބަބެއް ނެތް މި ކެންޕެއިންގައި ނުކުމެ މިހާ ބުރަކޮށް މަސައްކަތް ކުރަންޖެހޭ. މި އިންތިޚާބުގެ ވޯޓުލާ، ނަތީޖާ ފޮރޮޅިގެންދާ ގޮތުން އަޅުގަނޑުމެން ހީނުކުރާ ވަރުގެ ދައްޗާއި އުނދަގޫ އަޅުގަނޑުމެންނާ ކުރިމަތިލާނެ. އަޅުގަނޑުމެންގެ އަމާޒަކީ ކުރިއަށް މިއޮތް ރައއޔޮތުންގެ މަޖިލީހުގެ މެޖޯރިޓީ. الله ގެ ރަހުމަތާައެކު ބޮޑު މެޖޯރިޓީ މުޅި ރާއްޖެއިން ނެގުން.
ކުރީގެ ރައީސް އިބްރާހިމް މުހައްމަދު ޞާލިހު
އެހެންކަމުން، “ފޯކަސް” ގެއްލުވާނުލައި، ކުރިއަށް އޮތް ދުވަސް ތަކުގައި ކެންޕެއިން ކުރުމުގައި ކުރިއަށްދިޔުމަށް އެމަނިކުފާނު ވަނީ ޕާޓީގެ ކިބައިން އެދިވަޑައިގެންފައެވެ. އަދި ވާދަވެރި ކެންޕެއިން ކުރި ނަމަވެސް، ސުލްހަ ވެރިކަމާއެކު ކުރިއަށް ދިޔުމަށް އެމަނިކުފާނު ވަނީ އެދިވަޑައިގެންފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
