އިންތިޚާބީ ރައީސް ހުވާކުރެއްވުމުގެ ރަސްމިއްޔާތަށް މޯދީ ވަޑައިގަންނަވާ ކަމުގެ އިޝާާރާތެއް

2015 ވަނަ އަހަރު ރާއްޖެއަށް ވަޑައިގެންނެވުމަށް މޯދީ ހަމަޖެއްސެވި ދަތުރުފުޅު ކެންސަލް ކުރެއްވި ނަމަވެސް އިންތިހާބީ ރައީސް އިބްރާހިމް މުހައްމަދު ސޯލިހު ހުވާކުރެއްވުމުގެ ރަސްމިއްޔާތަށް އިންޑިއާގެ ބޮޑު ވަޒީރު ނަރެންދުރަ މޯދީ ވަޑައިގަންނަވާނެކަމުގެ ސިގްނަލްތައް ލިބެމުންދާ ކަމަށް އިންޑިއާގެ ނޫހެއް ކަމަށްވާ އިކޮނަމިކް ޓައިމްސްއިން ބުނެފިއެވެ.

މޯދީ މި ރަސމިއްޔާތައް ރާއްޖެ ވަޑަައިނުގަންނަވާނެ ކަމަށް މީގެ ކުރިން އިންޑިއާގެ ނޫސްތަކުން އައީ ބުނަމުންނެވެ.

އެގޮތުންް ހުވާކުރައްވާ ރަސްމިއްޔާތަށް ގިނަ ގައުމުތަކެއްގެ ވެރިން ވަޑައިގަންނަވާ ކަމަށްވާ ނަމަ މޯދީ އެރަސްމިއްޔާތަށް ވަޑައިނުގަންނަވާނެ ކަމަށާއި ހާއްސަކޮށް ޕާކިސްތާނުގެ ބޮޑުވަޒީރު އިމްރާން ޚާން ވަޑައިގަންނަވާ ނަމަ މޯދީ ރަސްމިއްޔާތަށް ވަޑައިނުގަންނަވާނެ ކަމަށް ބައެއް ރިޕޯޓްތައް ބުނެފައި ވެއެވެ.

ނަމަވެސް މިކަމާ ގުޅިގެން އިންޑިއާގެ ރަސްމީ އިދާރާއަކުން އަދި އެއްވެސް އެއްޗެއް ހާމަކޮށްފައެއް ނުވެއެވެ.

ރައީސް ސޯލިހު ހުވާ ކުރެއްވުމުގެ ރަސްމިއްޔާތު ބާއްވަން ހަމަޖެހިފައިވަނީ ނޮވެމްބަރު 17 ގައެވެ. އަދި މިރަސްމިއްޔާތުގައި ބޭރު ގައުމުތަކުގެ އިސްވެރިން ބައިވެރިވާނެކަމަށް ހަބަރުލިބެއެވެ. ނަމަވެސް އެ ހުރިހާ ބޭފުޅުންގެ މައުލޫމާތު އަދި ހިއްސާ ކޮއްފައެއް ނުވެއެވެ.