ފުރަތަމަ މެޗުންވެސް، ރޮނާލްޑޯގެ ސަޕޯޓަރުންނަށް މާޔޫސްކަން

ވަރލްޑްކަޕް ގްރޫޕް ކޭގައި މިރޭ ޕޯޗްގަލް އާއި ޑިމޮކްރަޓިކް ރިޕަބްލިކް އޮފް ކޮންގޯ ބައްދަލުކުރިމެޗް އެއްވަރުވެއްޖެއެވެ.

މިމެޗް ނިމުނީ އެކެއް އެކެއްގެ ނަތީޖާއަކުންނެވެ. މެޗްގެ ވަރަށް ކުރީކޮޅު ޕޯޗުގަލުން ވަނީ ލީޑް ނަގާފައެވެ. މި ލަނޑު ކާމިޔާބުކޮށްދިނީ ނެވޭސް އެވެ. ޕޯޗްގަލުން ލަނޑެއް ޖަހާފައިވަނިކޮށް ކޮންގޯއިން ވަނީ ފުރަތަމަ ހާފްގެ އިތުރުވަގުތުގެ ކުޅުމުގެ ތެރޭގައި ލަނޑެއް ޖަހައި މެޗްގެ ނަތީޖާ ހަމަހަމަކޮށްފައެވެ.

މިމެޗްގައި ޕޯޗްގަލްގެ ތަރި ކްރިސްޓިއާނޯ ރޮނާލްޑޯ ފަރާތުން އެދެވޭ ކުޅުމެއް ނުދެއްކުނުއިރު، ޕޯޗުގަލް އަށްވެސް އެޓީމްގެ އަސްލު ކުޅުން ނުދެއްކުނެވެ.  ރޮބާޓޯ މާޓިނޭޒްގެ އިރުޝާދުގެ ދަށުން ކުޅުނު މިމެޗްގައި ރޮނާލްޑޯއަށް ވަނީ ލަނޑުޖަހާނެ ރަނގަޅު ފުރުސަތުތައް ލިބި ބޭނުންނުކުރެވި ގޮސްފައެވެ.

ކޮންގޯއިން ވަނީ މިމެޗްގައި މޮޅު ކުޅުމެއް ދައްކައި ޕޯޗްގަލްގެ ގޯލަށް ނުރައްކާ ކޮށްފައެވެ. މެޗްގައި ކޮންގޯއަށް ކުޅޭ ނިއުކާސަލްގެ ޔޯން ވިސާ ވަނީ އެ ގައުމަށް ވޯލްޑް ކަޕްގެ ތާރީޚުގައި ފުރަތަމަ ލަނޑު ކާމިޔާބުކޮށްދީ، މުހިންމު ޕޮއިންޓެއް ހޯދައިދީފައެވެ. މިއީ 1974 ވަނަ އަހަރު "ޒަޔަރް" ގެ ނަމުގައި ވޯލްޑް ކަޕްގައި ވާދަކުރުމަށްފަހު، އެ ގައުމުން މި މުބާރާތުގައި ކުޅުނު ފުރަތަމަ ފަހަރުކަން ފާހަގަކޮށްލެވެއެވެ.