އެންމެ ބޮޑު އިސްކަމެއްދޭނީ އިގްތިސާދުގައި އަންހެނުން ހިއްސާވުން އިތުރުކުރުވަން: އަލައިކާ
މާލެސިޓީގެ މޭޔަރަކަށް ކުރިމަތިލުމުގެ އެންމެ ބޮޑު އެއް ބޭނުމަކީ، އަންހެނުން ބާރުވެރިކުރުވައި، އެމީހުންނަކީ އަމިއްލަ މަސައްކަތުން އުޅެވޭނޭ ބައެއްކަމުގައި ހެދުންކަމަށް ޕީއެންސީގެ ފަރާތުން އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާކަމަށް ވާދަކުރައްވާ ކެނޑިޑޭޓް، އަލްއުސްތާޛާ އާއިޝަތު އަލައިކާ އަދުނާން ވިދާޅުވެއްޖެއެވެ.
ބްރާސްފަތިދުވަހުގެ ރޭ ބޭއްވި ކެމްޕެއިން ޖަލްސާގައި ވާހަކަދައްކަވަމުން އަލައިކާ ވިދާޅުވީ، އަންހެނުންގެ ހިއްސާވުން ދިވެހި އިގްތިސާދުގައި އިތުރުކުރުވާ، އަންހެނުންނަށް އިގްތިސާދީ އަދި ވިޔަފާރިއާއި އުފެއްދުންތެރިކަމުގައި ކުރިއަރަން ފުރުސަތު ފަހިކޮށްދިނުމަކީ އޭނާގެ އެންމެ އިސްކަންދޭނޭ އެއް މަސައްކަތްކަމަށެވެ.
އަލައިކާ ވިދާޅުވީ އިގްތިސާދީގޮތުންނާއި، މާލީ ގޮތުންނާއި، ފުދުންތެރިކަމުގެ ގޮތުން އަބަދުވެސް އަންހެނުން ކޮންމެސް މީހަކަށް ބަރޯސާކޮށްފައި ބޭތިއްބުމަކީ ބޯދާ ވިސްނުމެއްކަމަށެވެ.
އަޅުގަނޑު ބޭނުންވަނީ މީހެއްގެ ގައިގައި ލައްނުވެ އަމިއްލަ މަސައްކަތުން، އަމިއްލަ ފައިމަތީގައި އާއިލާއެއް އަޅާލައިގެން އުފަލުގައި ގެންގުޅެވޭނެ އަންހެން އާބާދީއެއް، އަންހެން މުޖުތަމައެއް އުފައްދައިދޭން
އާއިޝަތު އަލައިކާ އަދުނާން
އޭނާ އިތުރަށް ވިދާޅުވީ އަންހެނުން ބޭނުންވަނީ އިގްތިސާދީ ހަމަހަމަ ފުރުސަތާއި، މާލީ ގޮތުން ހިންދެމިލާނެ ހަމަހަމަ ފުރުސަތުކަމަށެވެ. މިކަންކަން އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ތެރެއިން ކުރެވޭނޭކަން ފާހަގަކުރައްވަމުން އަލައިކާ ވަނީ ކޮމިޓީއާ ދޭތެރޭ މިހާތަނަށް ދެކެމުންއައި ގޮތް ބަދަލުކުރަންޖެހޭކަން ފާހަގަކުރައްވާފައެވެ.
އަދި މި ހަމަހަމަ ފުރުސަތު ފުޅާކޮށްދީ، ވާގިވެރި ކަމާއި ޖާގަ ފޯރުވައިދީފިނަމަ ޑަބްލިއުޑީސީގެ ތެރެއިން ދިވެހި އަންހެނުން ނުކުމެ ދިވެހި އިގްތިސާދު ކޮޅަށް ޖަހާނެކަމުގެ ޔަގީންކަން އަލައިކާ ވަނީ ދެއްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
