މާޅެންދޫ ކައުންސިލާއި އ.ތ.މ ކޮމިޓީން ރައީސްއާއި ބައްދަލުކުރައްވައިފި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ނ. އަތޮޅަށް މިހާރުކުރައްވަމުން ގެންދަވާ ދަތުރުފުޅުގައި މާޅެންދޫ ކައުންސިލާއި، އ.ތ.މ ކޮމިޓީ އަދި ރަށުގެ ބައެއް މުއައްސަސާތަކުގެ އިސްވެރިންނާ ބައްދަލުކުރައްވައި ރައްޔިތުންނަށް އެންމެ މުހިންމު ކަންކަމާ ގުޅޭގޮތުން މަޝްވަރާކުރައްވައިފި އެވެ.
މިލަދުންމަޑުލު ދެކުނުބުރީ މާޅެންދޫ ކައުންސިލް އިދާރާގައި ކުރިއަށްދިޔަ މި ބައްދަލުކުރެއްވުމުގައި، ކައުންސިލްގެ ފަރާތުން ވަނީ ރަށުގެ ތަރައްޤީއާއި ގުޅޭ ކަންކަން ރައީސްއާއި ހިއްސާކުރައްވާފަ އެވެ.
އެގޮތުން މިބައްދަލުވުމުގައި އެ ރަށުގެ ގިރާ ސަރަޙައްދު ހިމާޔަތްކުރުމާއި، ޓާފް ދަނޑުގެ ވަށާފާރު ރޭނުމާއި، ސްކޫލުގެ އައު އިމާރާތުގެ މަސައްކަތް އަވަހަކަށް ނިންމާ ސްކޫލުގެ ކިޔެވުން އެއް ދަންފަޅިއަށް ބަދަލުކުރުމަށް ކުރަންޖެހޭ މަސައްކަތަކާގުޅޭ ގޮތުން ކައުންސިލުންވަނީ ރައީސްއާއި އެކު މަޝްވަރާކުރައްވާފަ އެވެ.
މީގެއިތުރުން އެ ރަށުގައި ޞިއްޙީ ޚިދުމަތް ފުޅާކުރުމަށް ބޭނުންވާ ވަސީލަތްތައް ގާއިމުކުރުމަށް ހުރި ގޮންޖެހުންތަކާ ގުޅޭގޮތުން ވެސް ކައުންސިލްގެ މެމްބަރުން ވަނީ ރައީސްއާއި މަޝްވަރާ ކުރައްވާފަ އެވެ. އަދި ހަމައެހެންމެ، ކައުންސިލުން ވަނީ އެރަށުގެ ބިމުގެ ޖާގައިގެ ދަތިކަން ހައްލުކުރުމަށާއި މާޅެންދޫގެ އިހުތިސޯސްގައި އެރަށް ކައިރީގައި އޮންނަ ތޮޅެންދޫ ހިމެނުމާއި ގުޅޭގޮތުން އެރަށު ކައުންސިލުން ވަނީ ރައީސްއާއި އެކު މަޝްވަރާ ކުރައްވާފަ އެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ކައުންސިލުން ފާހާގަކުރެއްވި ކަންކަން ބައްލަވާނެކަމުގައި ވިދާޅުވެފައެވެ. އަދި ބައްދަލަކުރެއްވުމުގައި ބައިވެރިވެވަޑައިގެންނެވި ވަޒީރުންނާއި، ދައުލަތުގެ ކުންފުނިތަކުގެ ވެރިން މެދުވެރިކުރައްވައި އެ މަނިކުފާނު ވަނީ ރަށުގައި ކުރިއަށްދާ މަޝްރޫޢުތަކުގެ އަދާހަމަ މަޢުލޫމާތު ހިއްސާކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
