އިންޑިއާގެ ގައުމީ ސަލާމަތާ ބެހޭ މުޝީރު ޗައިނާގައި
ލިޔުންތެރިޔާ
ސްޓާފް ރައިޓަރ
އިންޑިއާއާއި ޗައިނާގެ ސަރަހައްދީ އިމުގެ މައްސަލައާ ގުޅޭގޮތުން މަޝްވަރާކުރުމަށް އިންޑިއާގެ ޤައުމީ ސަލާމަތާ ބެހޭ މުޝީރު އަޖީތު ދޯވާލް ޗައިނާގެ ވެރިރަށް ބެއިޖިންއަށް ވަޑައިގެންފިއެވެ.
ދެ ދުވަހުގެ މި ރަސްމީ ދަތުރުފުޅުގައި ދޯވާލް، ޗައިނާގެ ޚާރިޖީ ވަޒީރު ވާންގް ޔީއާ ބައްދަލުކުރެއްވުމަށް ހަމަޖެހިފައިވަނީ ދެ ގައުމުގެ ޚާއްޞަ މަންދޫބުންގެ ފެންވަރުގައި ބާއްވާ ބޯޑަރު މަޝްވަރާތަކުގެ ތެރެއިންނެވެ. މިއީ އަންނަ ސެޕްޓެމްބަރު މަހު ނިއުދެއްލީގައި ބޭއްވުމަށް ހަމަޖެހިފައިވާ ބްރިކްސް ސަމިޓަށް ޗައިނާގެ ރައީސް ޝީ ޖިންޕިންގް އިންޑިއާއަށް ކުރައްވާނެ ކަމަށް ބެލެވޭ ދަތުރުފުޅުގެ ކުރިން، ދެ ގައުމުގެ ގުޅުން ހަމައަކަށް އަޅުވައި ގުޅުން ބަދަހިކުރުމަށް ކުރެވޭ މުހިންމު މަސައްކަތެކެވެ.
މި ބައްދަލުވުމުގައި ދެ ގައުމުގެ އިމުގެ މައްސަލައިގެ އިތުރުން ސަރަހައްދީ އަދި ބައިނަލްއަގުވާމީ މުހިންމު ކަންކަމާ މެދު ފުޅާ ދާއިރާއެއްގައި މަޝްވަރާކުރާނެ ކަމަށް ޗައިނާގެ ޚާރިޖީ ވުޒާރާއިން ވަނީ ބުނެފައެވެ. 2020 ވަނަ އަހަރު ގަލްވާން ވާދީގައި ހިނގި ކުރިމަތިލުންތަކަށްފަހު ދެ ގައުމުގެ ގުޅުން ވަރަށް ބޮޑަށް ގޯސްވެފައިވީ ނަމަވެސް، ފަހަކަށް އައިސް ދެ ގައުމުންވެސް އަންނަނީ ސަރަހައްދީ ހަމަޖެހުން ގާއިމުކުރުމަށް މަސައްކަތްކުރަމުންނެވެ. ނަމަވެސް، އަރުނާޗަލް ޕްރަދޭޝްއާ ގުޅޭގޮތުން ދެ ގައުމުގެ މެދުގައި އުފެދިފައިވާ ޚިޔާލުތަފާތުވުންތައް އަދިވެސް ދެމިއޮތްއިރު، އިންޑިއާއިން ބުނަމުންދަނީ ދެ ގައުމުގެ ގުޅުން ރަނގަޅުވުމުގެ އެންމެ ބޮޑު ޝަރުތަކީ ބޯޑަރު ސަރަހައްދުގެ އަމަންއަމާންކަން ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
