ބީއެމްއެލް މުވައްޒަފުން މާލެ އާއި އައްޑޫ ސިޓީގައި ސާފުކުރުމުގެ ހަރަކާތްތަކެއް ބާއްވައިފި

ބީއެމްއެލް މުވައްޒަފުން އިސްނަގައިގެން ރަމަޟާން މަހަށް ތައްޔާރުވުމުގެ ގޮތުން މާލެ އަދި އައްޑޫ ސިޓީ ސަރަހައްދުގައި ސާފުކުރުމުގެ ހަރަކާތެއް މިއަދު ބާއްވައިފިއެވެ.

މި ހަރަކާތުގެ ތެރެއިން އެއްގަމާއި ފަޅުތެރެ ހިމެނޭހެން ފަސް ސަރަހައްދެއް ސާފުކޮށް މާލޭގެ މިސްކިތެއްގެ ބޭރުފާރުގައި ވަނީ ކުލަލާފައެވެ. ބީއެމްއެލް އިން ބުނެފައިވާ ގޮތުންށ ސާފުކުރި ހުރިހާ ސަރަހައްދަކުން 4 ޓަނުގެ ކުނި ނަގާފައިވެއެވެ. މީގެ ތެރެއިން 5 ޖަންބޯ ބޭގް ގެ ޕްލާސްޓިކް ރީސައިކަލް ކުރުމަށް ހަވާލުކޮށްފައިވާ ކަންވެސް ފާހަގަކޮށްފައިވެއެވެ.

މީގެ އިތުރުން ބީއެމްއެލް އިން ބުނީ، މި ހަރަކާތުގައި މާލެއިން ބީއެމްއެލް ގެ 200 އަށްވުރެ ގިނަ މުވައްޒަފުން ވަނީ ބައިވެރިވެފައިވާ ކަމަށެވެ. އަދި އެއީ މާލެ ސިޓީ ކައުންސިލް، މޯލްޑިވްސް އޯޝަން ޕްލާސްޓިކް އެލައަންސް (މޯޕާ) އަދި ޑައިވް ޑެސްކް އާ ގުޅިގެން ހިންގުނު ހަރަކާތެއް ކަމަށްވެސް ބުނެފައިވެއެވެ.

މި ހަފްތާގެ ފެށުނުއިރު، ބ. އޭދަފުށި، ރ. މީދޫ، ފ. ނިލަންދޫ އަދި މ. މުލި މުވައްޒަފުންވަނީ މި ހަރަކާތުގެ ތެރެއިން ރަމަޟާން މަހަށް ތައްޔާރުވުމުގެ ގޮތުން މި ރަށްތަކުގައި ސާފުކުރުމުގެ ހަރަކާތެއް ހިންގާފައެވެ.