ރާއްޖެއާއި ލަންކާއާ ދެމެދު ރަަސްމީ މަޝްވަރާތައް: ގިނަ ދާއިރާ ތަކަކުން އެއްބާރުލުން ދިނުމަށް މަޝްވަރާކުރެވުނު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ސްރީލަންކާގެ ރައީސް އަނޫރާ ކުމާރަ ދިސާނަޔަކައާ ބައްދަލުކުރައްވައި، ދެ ޤައުމުގެ ދެމެދުގައި ރަސްމީ ވާހަކަފުޅުތައް މިއަދު ވަނީ ބާއްވަވައިފިއެވެ.

މި ބައްދަލުކުރެއްވުން ބާއްވާފައިވަނީ ރައީސުލްޖުމްހޫރިއްޔާ ސްރީލަންކާއަށް ކުރައްވަމުންދާ ދައުލަތުގެ ދަތުރުފުޅުގެ ތެރެއިން، ކޮލަމްބޯގައި ހުންނަ ސްރީލަންކާގެ ޕްރެސިޑެންޝިއަލް ސެކްރެޓޭރިއަޓްގައެވެ.

މި ވާހަކަފުޅުތަކުގައި، ދެ ޤައުމުގެ ދެމެދުގައި އޮތް ޒަމާންވީ އަދި ގާތް ގުޅުމުގެ މައްޗަށް ދެ ޤައުމުގެ ރައީސުން އަލިއަޅުއްވާލެއްވިއެވެ. ވަކިން ޚާއްޞަކޮށް، 2025 ވަނަ އަހަރުގެ ޖުލައި މަހު ދެ ޤައުމުގެ ދެމެދުގައި ރަސްމީކޮށް ސިޔާސީ ގުޅުން ޤާއިމުކުރިތާ 60 އަހަރު ފުރުނުކަން ފާހަގަކުރެއްވިއެވެ.

މީގެ އިތުރުން، ދެ ޤައުމުގެ ރައްޔިތުންގެ ދެމެދުގައި އޮތް ބަދަހި ގުޅުމާއި، ދެ ޤައުމުގެ ތަރައްޤީގައި ދެ ޤައުމުގެ ރައްޔިތުން އަދާކުރާ މުހިންމު ދައުރު ފާހަގަކުރައްވައި، އެކަމުގެ އަގު ވަޒަންކުރެއްވިއެވެ.

މި ބައްދަލުވުމުގައި، ދެ ޤައުމުގެ ދެމެދުގައި މިހާރު އޮތް އެއްބާރުލުން އިތުރަށް ހަރުދަނާކުރުމަށް ދެ ބޭފުޅުން ވަނީ އެއްބަސްވެވަޑައިގެންފައެވެ. އެގޮތުން އިޤްތިޞާދީ ދާއިރާއާއި، ޒުވާނުން ބާރުވެރިކުރުވުމާއި، ތަޢުލީމާއި، ސަގާފަތާއި ތަރިކަ، ޞިއްޙީ ދާއިރާ، ސަލާމަތީ ކަންކަން އަދި މަސްވެރިކަން ހިމެނޭހެން ގިނަ ދާއިރާތަކަކުން ގުޅުން ބަދަހިކުރުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރެއްވިއެވެ.

މި ރަސްމީ ވާހަކަފުޅުތަކުގައި ދިވެހިރާއްޖެއާއި ސްރީލަންކާގެ ކެބިނެޓް މިނިސްޓަރުންނާއި ސަރުކާރުގެ އިސް ބޭފުޅުން ބައިވެރިވެވަޑައިގެންނެވިއެވެ.