އެކި ފަންނުތަކުގެ ތަޖުރިބާކާރުން ހިމެނޭ ޤައުމީ ލަފާދޭ މަޖިލީހެއް އެކުލަވައިލައްވަނީ
ލިޔުންތެރިޔާ
ސްޓާފް ރައިޓަރ
ތަފާތު ދާއިރާތަކުގެ 100 އަށްވުރެ ގިނަ ފަންނުވެރިން ހިމެނޭ ގޮތަށް ރައީސުލްޖުމްހޫރިއްޔާއަށް ލަފާ އެރުވުމަށް ޤައުމީ މަޖިލީހެއް އެކުލަވައިލައްވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޕީއެސްއެމްގެ "ނޭޝަން ޗެޓް" ޕޮޑްކާސްޓުގައި ވާހަކަފުޅު ދައްކަވަމުން ރައީސް ވިދާޅުވީ ޤައުމަށް ދިގު މުއްދަތަކަށް ޚިދުމަތް ކުރައްވާފައިވާ އެތައް ބޭފުޅުންނެއް ތިއްބެވި ކަމަށާއި އެ ބޭފުޅުންނަށް ޤައުމީ ކަންކަމުގައި ޚިޔާލު ހުށަހެޅޭނެ ރަސްމީ އޮނިގަނޑެއް ބޭނުންވާ ކަމަށެވެ. އެގޮތުން ޚިދުމަތްތެރިންގެ ޚާއްޞަ މަޝްވަރާ މަޖިލީހެއްގެ އިތުރުން ތަޢުލީމީ އަދި ފަންނީ ގޮތުން ތަޖުރިބާ ހޯއްދަވާފައިވާ ބޭފުޅުން ހިމެނޭ ވަކި ޤައުމީ ލަފާދޭ މަޖިލީހެއް ވެސް އުފައްދަވާނެ ކަމަށް ރައީސް ވިދާޅުވިއެވެ. މި ދެ މަޖިލީހުގެ ބޭނުމަކީ ނިޒާމީ ގޮތެއްގައި ބަދަލުތައް ގެނައުމަށް ބޭނުންވާ ލަފާ ހޯއްދެވުން ކަމަށް ވެސް އެ މަނިކުފާނު ވިދާޅުވިއެވެ.
ރައީސް ވިދާޅުވީ ގިނަ ދުވަސްތަކަކަށް ދައުލަތަށް އެކި ދާއިރާތަކުން ޚިދުމަތްކޮށްފައި ތިބި ފަރާތްތަކާއި މަތީ މަޤާމުތަކުގައި ގިނަ ދުވަސްތަކެއް ވަންދެން ތިބި ފަރާތްތަކެއް އެބަތިބި ކަމަށައި، ޤައުމުގެ ކަންކަމުގައި ބަސްބުނަން ބޭނުންވާނެ މީހުން އަދިވެސް ތިބޭނޭކަމަށެވެ.
އެފަދަ މީހުންގެ މައްޗަށް އެކުލެވޭ މަޝްވަރާ މަޖިލީހެއް މި އެކުލަވާލަނީ. އޭރުން އަޅުގަނޑު ބޭނުންވާ ހާލަތެއްގައާއި އެބޭފުޅުން އިސްނަގައިގެންވެސް ލަފާދެވޭނެ
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
ޤައުމީ ލަފާދޭ މަޖިލީހުގެ މެންބަރުންގެ ޢަދަދާ ގުޅޭ ގޮތުން ރައީސް ވިދާޅުވީ ޞިއްޙީ ދާއިރާ އާއި ތަޢުލީމީ ދާއިރާ އާއި ކާބޯތަކެތީގެ ދާއިރާ ފަދަ ތަފާތު ރޮނގުތަކުގެ ތަޖުރިބާކާރުން ހިމެނޭ ގޮތަށް 100 އާއި 150 އާ ދެމެދުގެ ޢަދަދެއް ހިމެނިދާނެ ކަމަށެވެ.
މި ޤައުމީ މަޖިލީހެއް އެކުލަވައިލެއްވުމުގެ ވިސްނުން ރައީސް ފުރަތަމަ ހާމަކުރެއްވީ މިނިވަން ދުވަހުގެ ރަސްމީ ޖަލްސާގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
