ފެނަކައަށް ހެޑް އޮފީހެއް، ކުއްޔަށް ހިފަން ދެވަނަ ފަހަރަށް އިއުލާނުކޮށްފި
ލިޔުންތެރިޔާ
އަބްދުﷲ ހުސައިން
ފެނަކަ ކޯޕަރޭޝަނަށް ހެޑް އޮފީހެއް ހޯދުމަށް އެކުންފުނިން ދެވަނަ ފަހަރަށް އިއުލާނުކޮށްފިއެވެ.
ފެނަކައިން މިއަދު ގެޒެޓްކުރި އިއުލާނުގައި ބުނެފައިވަނީ، އެކުންފުނީގެ ހެޑް އޮފީސް ހިންގުމަށް އިމާރާތެއް ކުއްޔަން ހިފުމަށް ކުރިން ކުރި އިއުލާނަށް އެދެވޭ ތަރުހީބެއް ލިބިފައިނުވާތީވެ، ހެޑް އޮފީހެއް ކުއްޔަށް ހިފުމަށް އެފުރުސަތު ހުޅުވާލާކަމަށެވެ. ފެނަކައިން އިމާރާތެއް ކުއްޔަށް ހިފަން ބޭނުންވަނީ 5 އަހަރުގެ މުއްދަތަކަށެވެ.
ފެނަކައިން ކުރި އިއުލާނުގައިވާގޮތުން އެކަމަށް ކުރިމަތިލާ ފަރާތްތަކުން 100،000 ރުފިޔާ، ބިޑް ސެކިއުރިޓީގެ ގޮތުގައި ހުށަހަޅަން ޖެހެއެވެ. ފެނަކައިން ބޭނުންވަނީ 10،000 އަކަފޫޓަށްވުރެ ކުޑަ ނޫން އިމާރާތެކެވެ. ޕޮއިންޓް ދިނުމަށް ހަމަޖެހިފައިވާ އުސޫލްތަކަށް ބަލާއިރު، އެންމެ ގިނަ މާކްސް ލިބެނީ އެންމެ ކުޑަ އަގެއް ހުށަހަޅާ ފަރާތަށެވެ. އެއީ 90 އިންސައްތަ މާކުހެވެ. އިމާރާތުގެ އުމުރަށް ކަނޑައަޅާފައިވަނީ 10 މާކުހެވެ.
ފެނަކަ ހެޑްއޮފީސް ހިންގުމަށް އިމާރާތެއް ހޯދުމަށް އިއުލާނުކޮށްފައިވާއިރު، ފެނަކައަކީ ސަރުކާރު ކުންފުނިތަކުގެ ތެރެއިން މާލީ ހާލަތު މިވަގުތު އެންމެ ގޯސް އެއް ކުންފުންޏެވެ. ފެނަކަ ހެޑް އޮފީސް މިހާރު ހިންގަމުންގެންދަނީ ޕޯޓް ކޮމްޕްލެކްސް އިމާރާތުގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
