ސްކޮޓްލޭންޑުން ވަރލްޑްކަޕަށް ކުރަމުން އައި އިންތިޒާރު ނިމުމަކަށް

ކުރިއަށްއޮތް ވަރލްޑްކަޕުން ޖާގައެއް ހޯދުމަށް ސްކޮޓްލޭންޑުން ކުރަމުން އައި އިންތިޒާރު އެންމެފަހުން ކާމިޔާބުކަމާއެކު ނިންމާލައިފިއެވެ.

ވަރލްޑްކަޕް ކޮލިފައިންގައި ރޭ ޑެންމާކާ ދެކޮޅަށް ނިކުތުމުގެ ކުރިން މުޅި ސްކޮޓްލޭންޑްގެ ނަޒަރު ހުއްޓިފައިވަނީ މި މެޗަށެވެ. ސަބަބަކީ 1998 ގެ ވަރލްޑްކަޕަށްފަހު އެޤައުމު އަދި މިހާތަނަކަށް އެ މުބާރާތަށް ކޮލިފައިއެއް ނުވެއެވެ. އެހެންކަމުން ރޭގެ މެޗް ސްކޮޓްލޭންޑުން ނެގީ ވަރަށް ސީރިއަސް މެޗެއްގެ ގޮތުގައެވެ.

ސްކޮޓްލޭންޑްގެ އަމިއްލަ ދަނޑުގައި ޑެންމާކާ ދެކޮޅަށް ކުޅުނު މިމެޗް އެޓީމުން ކާމިޔާބުކުރީ 2-4 ގެ ނަތީޖާއަކުންނެވެ. މެޗް ފަށައިގެން ތިންވަނަ މިނެޓް ތެރޭގައި ސްކޮޓްލޭންޑްގެ ޓޮމިނޭ ވަނީ ލަނޑެއް ކާމިޔާބުކޮށްފައެވެ. މެޗްގެ ފުރަތަމަ ހާފް އެ ނަތީޖާގައި އޮވެގެން ނިމުނުއިރު، ދެވަނަ ހާފް ފަށައިގެން 57 ވަނަ މިނެޓް ތެރޭގައި ޑެންމާކުން ވަނީ މެޗްގެ ނަތީޖާ ހަމަހަމަ ކޮށްފައެވެ.

މެޗުން ދެވަނަ ފަހަރަށް ސްކޮޓްލޭންޑުން ލީޑް ނަގާފައިވަނީ 78 ވަނަ މިނެޓް ތެރޭގައެވެ. އޭގެ ކުރިން ޑެންމާކްގެ ކްރިސްޓެންސެން އަށް ވަނީ ދެވަނަ ރީނދޫކާޑަކާއެކު ރަތްކާޑެއް ދައްކައި ދަނޑުން ފޮނުވާލާފައެވެ. ސްކޮޓްލޭންޑުން ލީޑް ނެގިތާ ފަސްމިނެޓް ނުވެ ޑެންމާކުން މެޗް އެއްވަރުކުރިއިރު، ތިންވަނަ ފަހަރަށް ސްކޮޓްލޭންޑަށް ލީޑް ނަގައިދިނީ އާސެނަލްގެ ކުރީގެ ޑިފެންޑަރު އަދި މިހާރު ސެލްޓިކަށް ކުޅެމުްނ އަންނަ ކިއެރަން ޓިއާނޭ އެވެ. އަދި މެޗްގެ އިތުރުވަގުތުގެ ކުޅުމުގެ ތެރޭގައި މެކްލީން ވަނީ އިތުރު ލަނޑެއް ޖަހައި ވަރލްޑްކަޕްގެ ޖާގައެއް ސްކޮޓްލޭންޑަށް ކަށަވަރުކޮށްދީފައެވެ.

ރޭގެ މެޗުން ލިބުނު މޮޅާއެކު ގްރޫޕްގެ އެއްވަނާގައި ސްކޮޓްލޭންޑް އޮތީ 13 ޕޮއިންޓާއެކުގައެވެ. ދެވަނާގައި އޮތް ޑެންމާކަށް ލިބިފައިވަނީ 11 ޕޮއިންޓެވެ. ވަރލްޑްކަޕްގެ ޖާގައެއް ޑެންމާކަށް ލިބުން އޮތީ ޕްލޭއޮފުން މޮޅޫވެގެންނެވެ.