ވޭޕްގެ މުއާމަލާތްކޮށްގެން ޖޫރިމަނާ ކުރިކަން، ފޯނަށް ފޮނުވާ މެސެޖަކުން އަންގާނެ: ފުލުހުން
ލިޔުންތެރިޔާ
އަބްދުﷲ ހުސައިން
ދުންފަތް ކޮންޓްރޯލް ކުރުމާ ބެހޭ ޤާނޫނުގެ ދަށުން ވޭޕްގެ މުއާމަލާތެއް ހިންގައިފިނަމަ، ޖޫރިމަނާކުރިކަން މެސެޖަކުން އަންގާނޭކަމަށް މޯލްޑިވްސް ޕޮލިސް ސާވިސްއިން ބުނެފިއެވެ.
އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އެފަދަ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ދިވެހިރާއްޖެއަށް އެތެރެކުރުމާއި، ވިއްކުމާއި، ހިލޭ ބެހުމާއި، އެ ތަކެތި ބޭނުންކުރުން މަނާކުރުމުގެ ގޮތުން ދުންފަތް ކޮންޓްރޯލް ކުރުމާބެހޭ ޤާނޫނަށް ގެނެސްފައިވާ އިސްލާހް ރައީސުލްޖުމްހޫރިއްޔާ ތަސްދީގުކުރައްވާފައިވަނީ ނޮވެމްބަރުމަހުގެ 14 ވަނަ ދުވަހުއެވެ. އެ އިސްލާހަށް އަމަލުކުރަން ފަށާފައިވަނީ މިހިނގާ ޑިސެމްބަރުމަހުގެ 15 ވަނަ ދުވަހުން ފެށިގެންނެވެ.
ދުންފަތް ކޮންޓްރޯލް ކުރުމާ ބެހޭ ޤާނޫނަށް ގެނައި އިސްލާހަށް އަމަލުކުރަން ފެށުމާ ގުޅިގެން ފުލުހުން ނެރެފައިވާ ބަޔާނެއްގައި ބުނީ ޤާނޫނުގައިވާ ގޮތުގެ މަތިން ވޭޕްކުރުމަށް ބޭނުންކުރާ އާލާތްތައް ވިއްކުމާއި، ހިލޭ ދިނުމާއި، އަދި އެކަކު އަނެކަކަށްދޭ ފަރާތްތަކާމެދު ފުލުހުން ޤާނޫނީ ފިޔަވަޅުތައް އަޅައި ޖޫރިމަނާކުރަމުންގެންދާނޭކަމަށެވެ. ޖޫރިމަނާކުރެވޭ ފަރާތްތަކަށް އެކަމުގެ މައުލޫމާތު މޯބައިލްފޯނު މެދުވެރިކޮށް މެސެޖަކުން ފޮނުވަމުންދާއިރު، މެސެޖުގައި ޖޫރިމަނާ ދެއްކުމަށް ވާރު ޕޭގެ ޕޭމަންޓް ލިންކެއް ހިމެނޭނޭކަމަށް ފުލުހުން ބުންޏެވެ.
ފުލުހުން ވަނީ ދުންފަތް ކޮންޓްރޯލް ކުރުމާ ބެހޭ ޤާނޫނަށް ގެނައި އެ އިސްލާހަށް ހުރިހާ ފަރާތްތަކަކުންވެސް އަމަލުކުރެއްވުމަށް އިލްތިމާސްކޮށްފައެވެ. އަދި އެ ޤާނޫނު ތަންފީޒުކުރުމުގައި އެއްބާރުލުން ދިނުމަށްވެސް ފުލުހުންގެ އިދާރާއިން ވަނީ އެދިފައެވެ. މި ޤާނޫނަށް އަލަށް ގެނައި އިސްލާހުގައިވާގޮތުން އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އެފަދަ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ދިވެހިރާއްޖެއަށް އެތެރެކުރުމާއި، ވިއްކުމާއި، ހިލޭ ބެހުމާއި، އެ ތަކެތި ބޭނުންކުރުމަކީ މަނާކަމެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
