ކަމެއްނެތި ދަންވަރު ބޭރުގައި އުޅޭ ބިދޭސީންގެ މައްސަލަ ހައްލުކުރުން: ހަފްތާއެއްގެ ތެރޭ 102 މީހުންނާ ސުވާލުކޮށްފި

ދަންވަރުގެ ވަގުތުތަކުގައި ބޭނުމެއްނެތި ބޭރުގައި އުޅޭ ބިދޭސީން ހުއްޓުވައި މައުލޫމާތު ސާފުކުރުމުގެ މަސައްކަތް މިމަހު 17 ވަނަ ދުވަހު ފަށާފައިވާ ކަމަށާ ، މިހާތަނަށް 102 މީހަކާ ސުވާލުކޮށްފައިވާ ކަމަށް ފުލުހުން ބުނެފިއެވެ.

ރާއްޖޭގައި އުޅެމުންދާ ބިދޭސީންގެ ތެރެއިން ބައެއް ފަރާތްތަކުން ރޭގަނޑުގެ ދަންވަރު ވަގުތުތަކުގައި ރަށުތެރޭގެ އާއްމު މަސްލަހަތު ގެއްލޭ ފަދަ ކަންކަން ކުރަމުންދާތީ އާއި އާއްމު އިޖްތިމާއީ މިންގަނޑުތަކާއި ހިލާފަށް އުޅެމުންދާތީ ދަންވަރު 12:00 އިން ފެށިގެން ހެނދުނު 06:00 އާއި ހަމައަށް އާންމު ތަންތަނުގައާއި މަގުމަތީގައި އުޅޭ ބިދޭސީން ހުއްޓުވާ ސުވާލުކުރާނެ ކަމަށް ރައީސް މުޙައްމަދު މުއިއްޒު ވަނީ އިއުލާން ކުރައްވާފައެވެ.

އެއާއެކު އެ މަސައްކަތް ފުލުހުން ފަށާފައިވާއިރު، މާލެ ސަރަހައްދުގައި ފުލުހުން ކުރިއަށް ގެންދެވުނު މަސައްކަތުގެ އަދާހަމަތައް މިއަދު އޮތް ފުލުހުންގެ ބައްދަލުވުމުގައި ވަނީ ހާމަކޮށްފައެވެ.

ރޭގަނޑު ދަންވަރު ބާރައިގެފަހުން މަގުމަތީގައި (އުޅުނު ބިދޭސީންގެ ތެރެއިން) ގަވާއިދާ ޚިލާފަށް އުޅޭ ބާރަ ބިދޭސީން ހުއްޓުވައި ސުވާލުކުރެވި، އަދި ގަވާއިދާ ޚިލާފް ވިޔަފާރި މުއާމަލާތްކުރާ ބިދޭސީންގެ ތެރެއިން 4 މީހެއްގެ މައުލޫމާތު ނެގި، އޭގެ ތެރެއިން ބައެއް މީހުން ވާނީ އިމިގްރޭޝަނާ ހަވާލު ކުރެވިފައި. އަދި ޖުމްލަ 102 މީހަކާ ވާނީ ސުވާލު ކުރެވިފައި.

ފުލުހުން

ފުލުހުން މީގެ ކުރިން ނެރުނު ބަޔާނެއްގައި ވަނީ މިމަހު 17 ވަނަ ދުވަހުން ފެށިގެން ކޮންމެ ރެއަކު 00:00 އިން ހެނދުނު 06:00 އަށް މަގުމަތީގައި އުޅޭ ބިދޭސީން ބަލައިފާސްކުރުމުގެ މަސައްކަތް ފުލުހުން ކުރިއަށް ގެންދާނެ ކަމަށް ބުނެފައެވެ. އަދި މި މަސައްލަތް މާލެއާ ހުޅުމާާލޭގެ އިތުރުން ރާއްޖޭގެ މީހުން ދިރިއުޅޭ ހުރިހާ ރަށެއްގައިވެސް ކުރިއަށް ގެންދެވޭނެ ކަމަށްވެސް ބުނެފައިވެއެވެ.

މި މަސައްކަތުގެ ދަށުން ދަންވަރުގެ ވަގުތުތަކުގައި ބޭނުމެއްނެތި ބޭރުގައި އުޅޭ ބިދޭސީން ހުއްޓުވައި މައުލޫމާތު ސާފުކުރުމަށް ހަމަޖެހިފައިވާ ކަމަށާ ޚާއްސަކޮށް މާލެއާ ހުޅުމާލޭގެ އާންމު ތަންތަނުގައި ނިދާ ބިދޭސީންގެ ހާލަތު ބަލައި އެ މީހުން ރާއްޖޭގައި ދިރިއުޅެނީ ޤަވާއިދާ އެއްގޮތަށްތޯ ބެލުމުގެ މަސައްކަތް ކުރިއަށް ގެންދާނެ ކަމަށް ފުލުހުން ބުނެއެވެ.

މިގޮތަށް ބިދޭސީން ބަލައިފާސްކުރުމުގެ ތެރެއިން ފާހަގަ ކުރެވޭ ކަންކަމާއި ގުޅޭގޮތުން އަޅަން ޖެހޭ ފިޔަވަޅުތައް އެޅުމަށާއި ގަވާއިދާ ހިލާފަށް ދިރިއުޅޭ ބިދޭސީންނާއިމެދު ގާނޫނާއި ގަވާއިދުތަކާއި އެއްގޮތްވާ ގޮތުގެ މަތީން ފިޔަވަޅު އެޅުމަށް އެފަދަ މީހުން މޯލްޑިވްސް އިމިގްރޭޝަނާއި ހަވާލުކުރުމަށް ހަމަޖެހިފައިވާ ކަމަށް ވެސް ފުލުހުން ބުންޏެވެ.