މަސްދުވަހުގެ ތެރޭގައި 104 މަސާޖުޕާލާ ބަންދުކޮށްފިން: ރައީސް
ލިޔުންތެރިޔާ
އަބްދުﷲ ހުސައިން
ގަވާއިދާ ހިލާފަށް ހުއްދަނެތި ހިންގާ މަސާޖްޕާލާތައް ބަންދުކުރުމަށް ކުރަމުންގެންދާ މަސައްކަތްތަކުގެ ދަށުން ވޭތުވެދިޔަ މަހެއްހާ ދުވަހުގެ ތެރޭގައި 104 މަސާޖު ޕާލާއެއް ބަންދުކުރެވިފައިވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އާޓިފިޝަލް ބީޗް ސަރަހައްދުގައި މިރޭ ޕީއެންސީ ޖަގަހަ ހުޅުވައިދެއްވުމަށްފަހު ވާހަކަދައްކަވަމުން ރައީސް ވިދާޅުވީ، ދިވެހި މުޖުތަމައުގައި ހުރި ނޭދެވޭ އެތައް ކަންތައްތަކެއް ރައްޔިތުންގެ ހިޔާލާ މަޝްވަރާއާއެކު ނައްތާލުމުގެ މަސައްކަތް ސަރުކާރުން ފަށާފައިވާކަމަށެވެ.
އިސްލާމްދީނުގެ އުސޫލްތަކާ ހިލާފަށް އަދި ޤާނޫނީ އިމުން ބޭރުން ހިންގަމުންދާ މަސާޖްޕާލާތައް ބަންދުކުރުމަކީ އެކަމަށް ގިނަ އަދަދެއްގެ ރައްޔިތުންވެސް އެދެމުންދާ ކަމެއްކަން ފާހަގަކުރައްވަމުން ރައީސް ވިދާޅުވީ، އެފަދަ މަސާޖްޕާލާތައް ބަންދުކުރުމުގެ މަސައްކަތް ފެށިފަހުން މިވީ މަސްދުވަހުގެ ތެރޭގައި 104 މަސާޖުޕާލާ ބަންދުކުރެވިފައިވާކަމަށެވެ.
މިކަމަކީ މީގެ ކުރީ ސަރުކާރުތަކުންވެސް ކުރަން ފެށި ކަމެއްކަމަށާއި، އެހެންނަމަވެސް އެއްވެސްގޮތަކަށް އަމަލީސިފަ އައިސްފައިނުވާ ކަމެއްކަން ރައީސްގެ ވާހަކަފުޅުގައި ފާހަގަކުރެއްވިއެވެ.
ރައީސް ވިދާޅުވީ 104 މަސާޖުޕާލާ ހަމައެކަނި މާލެސިޓީން އެކަނި ބަންދުކޮށްފައިވާއިރު، މިއީ ވަރަށް ބޮޑު އަދަދެއް ކަމަށާއި، އެތަންތަން އެގޮތަށް ހިންގަމުން ގެންގޮސްފައިވަނީ އެކަން ކުރަން ފުރުސަތު އޮތުމުންކަމަށެވެ.
ރައީސް ވިދާޅުވީ މުޖުތަމައުގައި ހުރި އެފަދަ ނުބައި ކަންކަން ނައްތާލުމުގެ ރޫހު އަށަގަންނަ ބަޔަކަށް އަޅުގަނޑުމެން އެންމެން ވާންޖެހޭކަމަށާއި، ޤައުމެއްގެ ކަންކަން އިސްލާހްވާނީ، އެ ޤައުމެއްގައި އުޅޭ ރައްޔިތުންގެ ހިތްތަކުގައި އެފަދަ ކަންކަން ރަނގަޅުކުރުމުގެ ރޫހު އަށަގަނެގެންކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
