ވޯޓު ކަރުދާސް ނަައްތާލި މައްސަލައިގައި ފުލުހުން ޒިންމާވޭ: އަދުރޭ
ލިޔުންތެރިޔާ
ޝަފްރާޒް އަހްމަދު
ނިމިދިޔަ ސެޕްޓެމްބަރ މަހުގެ 23 ވަނަ ދުވަހު ބޭއްވުނު ރިޔާސީ އިންތިހާބުގެ ވޯޓު ކަރުދާސްތައް ނަައްތާލި މައްސަލައިގައި ފުލުހުން އެކަން ބެލުމަށް ނުކުޅެދިފައިވާ ކަމަށް ޕީޕީއެމްގެ ނައިބު ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އަބްދުއްރަހީމް މިހެން ވިދާޅުވީ ޕީޕީއެމްގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ. އަދުރޭ ވިދާޅުވީ ވޯޓު ކަރުދާސްތައް ނައްތާލި މައްސަލަ ބެލުމަށް ދައުލަތުގެ ބައެއް މުއައްސަސާތައް ނުކުޅެދިފައިވާކަމަށެވެ. އެބޭފުޅާ ވިދާޅުވީ ވޯޓު ކަރުދާސްތައް ފުލުހުންގެ ބެލުމުގެ ދަށުގައި ހުއްޓާ، އެތަކެތި ނައްތާލިގޮތް ފުލުހުން ކިޔައިދޭން ޖެހޭނެކަމަށެވެ.
"ފުލުހުން މައްސަލައެއް ތަހުގީގު ކުރަމުން ދަނިކޮށް، އެ މައްސަލައާ ގުޅުން ހުރި އެއްޗެއް ނައްތައިލެވިގެން ދާއިރު ނައްތައިލެވިގެން ދިޔައީ ކީއްވެގެންކަން އެންމެ ކުޑަމިނުން ރައްޔިތުންނަށް އެބަޖެހޭ ކަމާބެހޭ މުއައްސަސާއަކުން ހާމަކޮށްދޭން،" އަބްދުއްރަހީމް ވިދާޅުވިއެވެ.
އަދި ވޯޓު ކަރުދާސްތައް ނައްތާލުމަކީ ޕީޕީއެމްއިން ހުށައަޅާފައިވާ މައްސަލައިގެ ތަހުގީގަށް ބޭނުންވާ ހެކި ނައްތާލުމުގެ ގޮތުގައިވެސް އެބޭފުޅާ ފާހަގަކުރެއްވިއެވެ.
މި ނޫސްވެރިންގެ ބައްދަލުވުމުގައި އަބްދުއްރަހީމް ވަނީ އިދިކޮޅު ކޯލިޝަނަށްވެސް ވަރަށް ބޮޑަށް ފާޅުވިދާޅުވެފައެވެ. އެގޮތުން ރައީސުލްޖުމްހޫރިއްޔާ އަކީ ކާކުކަންވެސް އޮޅިފައިވާކަމަށް އަބްދުއްރަހީމް ވަނީ ވިދާޅުވެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
