ބަޖެޓުން އެންމެ ފާހަގަކޮށްލެވެނީ، ސަބްސިޑީ ދޭ އުސޫލަށް ގެންނަ ހެޔޮ ބަދަލު

އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ ބަޖެޓަށް ބަލާއިރު، އެންމެ ފާހަގަކޮށްލެވެނީ ސަބްސިޑީ ދެމުން އަންނަ އުސޫލަށް ގެނައުމަށް ނިންމާފައިވާ ބަދަލެވެ. ރައްޔިތުންނަށް ބޭނުންވާ ކާޑުގެ ބާވަތްތަކާއި، ތެލުގެ ބާވަތްތަކަށް ދައުލަތުގެ ބަޖެޓުން ސަބްސިޑީ ދެމުން އަންނައިރު، މިހާރު ސަބްސިޑީއަށް ވާ ފައިސާ ސަރުކާރުން ދެނީ ސީދާ އެސްޓީއޯއަށެވެ.

އަންނަ އަހަރުގެ ބަޖެޓުގައި އެކަން ކުރުމަށް ނިންމާފައިވާ ގޮތް ހާމަކުރަމުން ބަޖެޓާގުޅޭ މައުލޫމާތު ފޮތުގައި ސަރުކާރުން ބުނެފައިވަނީ، އިންޑައިރެކްޓް ސަބްސިޑީގެ ހަރަދަކީ އަންނަ އަހަރާއި މެދުރާސްތާގެގައި އެންމެ ބޮޑު ބަދަލެއް އަންނާނޭކަމަށް ބެލެވޭ ހަރަދު ކަމަށެވެ. އެގޮތުން އަންނަ އައަހަރުގެ އޭޕްރިލްމަހުން ފެށިގެން ކަރަންޓް، ތެޔޮ، ކާޑު އަދި ނަރުދަމާގެ ހިދުމަތަށް ދެމުންދާ އިންޑައިރެކްޓް ސަބްސިޑީގެ ބަދަލުގައި ޓާގެޓެޑް، ޑައިރެކްޓް ކޭޝް ޓްރާންސްފަރ ނިޒާމަކަށް ބަދަލުކޮށް ތަންފީޒުކުރުމަށް ރާވާފައިވާކަމަށެވެ.

ސަރުކާރުން ބުނީ މިގޮތަށް ނިޒާމް ބަދަލުކުރުމުން އިޖުތިމާއީ ރައްކާތެރިކަމަށް އެންމެ ބޮޑަށް ބޭނުންޖެހިފައިވާ ފަރާތްތައް ފުރިހަމަޔަށް ހިމާޔަތްކުރެވި، ސަބްސިޑީ ލިބެމުންދާނީ އެންމެ ފުދުންތެރި ގޭބިސީތައް ފިޔަވައި އެހެން ހުރިހާ ގޭބިސީތަކަށް ކަމަށެވެ.

ސަރުކާރުން ލަފާކޮށްފައިވަނީ ސަބްސިޑިއަށް ގެންނަ ހެޔޮ ބަދަލާއެކު އަންނަ އަހަރުގެ ބަޖެޓުން 1.6 ބިލިއަން ރުފިޔާ ސަލާމަތްކުރެވޭނެ ކަމަށެވެ.

އިންޑައިރެކްޓް ސަބްސިޑީއަށް ހިނގާ ހަރަދު ރައްޔިތުންނަށް އެންމެ ފައިދާހުރި ގޮތުގައި ހޭދަކޮށް އަދި ދެމެހެއްޓެނިވި މިންގަނޑެއްގައި ހިފެހެއްޓުމަށް މިއަހަރުގެ ބަޖެޓްގައިވެސް، މި ނިޒާމަށް ބޮޑެތި އިސްލާހްތަކެއް ގެނައުމަށް ރާވާފައި ވެއެވެ.

އަންނަ އަހަަރު ކާޑު، ތެޔޮ، ކަރަންޓް އަދި ނަރުދަމާގެ އިންޑައިރެކްޓް ސަބްސިޑީތަކުގެ ބަދަލުގައި ސީދާ ގޭބިސީތަކަށް ފައިސާ ދިނުމަށް ސަރުކާރުން ވަނީ ބަޖެޓްގައި 900 މިލިއަން ރުފިޔާ ހިމަނާފައެވެ.

މިހާރު ރާއްޖޭގައި ދިރިއުޅެމުން އަންނަ ބިދޭސީންނަށާއި ހޮޓާ އަދި ރެސްޓޯރެންޓްތަކުގެ އިތުރުން އެނޫންވެސް ވިޔަފާރީގެ އުސޫލުން ހިދުމަތް ދެމުންދާ ތަންތަނަށް ސަބްސިޑީ އަގުގައި ކާޑުގެ ބާވަތްތައް ގަނެވޭއިރު، އަންނަ އަހަރުގެ އޭޕްރިލްމަހުން ފެށިގެން އެގޮތް ބަދަލުވެގެން ދާނެއެވެ.

ކާޑުގެ ސަބްސިޑީ މިހާރު ދެމުން އަންނަ އުސޫލަށް ބަދަލުގެނައުމަށް މީގެ ކުރިން އެކިފަހަރުމަތިން، އައިއެމްއެފް/ވަރލްޑް ބޭނުންކުން ވަނީ ރާއްޖެއަށް ލަފާދީފައެވެ. ނަމަވެސް މިހާތަނަށް އަދި އޮތީ އެކަން ނުވެއެވެ.