ޤާނޫނީ އަދި ޕަބްލިކް ޕޮލިސީގެ ދާއިރާއިން މަތީ ތަޢުލީމް ހާސިލް ކުރައްވާފައިވާ އަލައިކާ ސްޓޭޓް މިނިސްޓަރު ކަމަށް
ލިޔުންތެރިޔާ
ޚަދީޖާ އަރުފާ
ޤާނޫނީ އަދި ޕަބްލިކް ޕޮލިސީގެ ދާއިރާއިން މަތީ ތަޢުލީމް ހާސިލްކުރައްވާފައިވާ އާސިޔަތު އަލައިކާ ޓޫރިޒަމް މިނިސްޓްރީގެ ސްޓޭޓް މިނިސްޓަރު ކަމަށް އައްޔަނުކޮށްފިއެވެ.
އަލައިކާ އެ މަގާމަށް އައްޔަނު ކޮށްފައިވަނީ މި ހަފްތާގައެވެ.
އަލައިކާއަކީ ގިނަ ދާއިރާ ތަކަކުން ތަޢުލީމު ހާސިލުކުރައްވާފައިވާ ތަޖުރިބާކާރު ބޭފުޅެކެވެ. އެގޮތުން، ޗައިނާގެ ޕީކިންގ ޔުނިވަރސިޓީން ޕަބްލިކް ޕޮލިސީގެ ދާއިރާއިން މާސްޓަރސް އޮފް މެނޭޖްމަންޓް ސައިންސް ހާސިލުކުރައްވާފައިވާއިރު، އިނގިރޭސިވިލާތުގެ ޔުނިވަރސިޓީ އޮފް ދަ ވެސްޓް އޮފް އިންގްލޭންޑުން ގްލޯބަލް ބިޒްނަސް އެންޑް ފައިނޭންސް ލޯއިން އެލް.އެލް.އެމް ފުރިހަމަކުރައްވާފައިވެއެވެ.
މީގެ އިތުރުން ޝަރީޢަތާއި ގާނޫނުގެ ދާއިރާއިން ބެޗްލަރސް ޑިގްރީ އަދި ޕަބްލިކް މެނޭޖްމަންޓުން އޮނަރސް ޑިގްރީވެސް އޭނާ ވަނީ ހާސިލުކުރައްވާފައެވެ.
ވޭތުވެދިޔަ 18 އަހަރު ދުވަހުގެ ތެރޭގައި އަލައިކާ ވަނީ ދައުލަތުގެ މުހިންމު އެކި މުއައްސަސާތަކުގައި އިސް މަގާމުތަކެއް ފުރުއްވާފައެވެ. އޭގެ ތެރޭގައި:
ހޯމް މިނިސްޓްރީގެ ސީނިއަރ ޕޮލިސީ ޑައިރެކްޓަރުކަން.
ރައީސުލްޖުމްހޫރިއްޔާގެ އޮފީހުގެ އެސިސްޓަންޓް ޑައިރެކްޓަރުކަން.
އޮޑިޓަރ ޖެނެރަލްގެ އޮފީހުގެ ކޮމްޕްލަޔަންސް އޮޑިޓަރުކަން.
ހިއުމަން ރައިޓްސް ކޮމިޝަންގެ ކޮމްޕްލެއިންޓްސް އޮފިސަރުކަން.
ޕޮލިޓެކްނިކް އަދި އެވިޑް ކޮލެޖްގެ ލެކްޗަރަރކަން.
ސިޔާސީ ދާއިރާގައިވެސް އަލައިކާއަކީ ހަރަކާތްތެރި ބޭފުޅެކެވެ. އެގޮތުން ދަ ޑިމޮކްރެޓްސްގެ ނައިބު ރައީސްކަން ކުރައްވާފައިވާއިރު، މިހާރު އޭނާއަކީ ޕީޕަލްސް ކޮންގްރެސް ޕާޓީގެ އަންހެނުންގެ ގޮފީގެ މެންބަރެކެވެ.
މީގެ އިތުރުން އަލައިކާއަކީ ޕަބްލިކް ޕޮލިސީ، ގަވަރނަންސް، ގާނޫނީ ދާއިރާ، އަދި ސްޓްރެޓީޖިކް ޕްލޭނިންގ ފަދަ ދާއިރާތަކުން ފަންނީ އެކްސްޕާޓެކެވެ. އޭނާ ވަނީ ލާމަރުކަޒީ ނިޒާމާއި، އަންހެނުންނަށް އިންސާފު ހޯދައިދިނުމާ ގުޅޭގޮތުން ތަފާތު ދިރާސީ ކަރުދާސްތައް ލިޔެ ޝާއިޢުކުރައްވާފައެވެ. ވަކިން ހާއްސަކޮށް، އަންހެނުންނަށް އިންސާފަށް ވާސިލުވުމަށް ހުރި ހުރަސްތަކާ ބެހޭގޮތުން އޭނާ ހުށަހެޅި ކަރުދާހަށް ބައިނަލްއަގުވާމީ ކޮންފަރެންސެއްގައި "ބެސްޓް ޕޭޕަރ ޕްރެޒެންޓަރ" ގެ އެވޯޑު ލިބިފައިވެއެވެ.
ޓޫރިޒަމް މިނިސްޓްރީގެ ސްޓޭޓް މިނިސްޓަރުގެ މަގާމަށް އަލައިކާ އައްޔަނުކޮށްފައިވާއިރު، ރައީސް ޑރ މުޙައްމަދު މުޢިއްޒު ވަނީ ސެޓޭޓް މިނިސްޓަރުންގެ މަގާމަށް އައްޔަނު ކުރައްވާނީ ތައުލީމީ ބޭފުޅުން ކަމަށް ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
