ކުޑަކުދިންގެ ޢަދުލުގެ ބިލުގެ ބަހުސް ކުރިއަށް ގެންގޮސްފި
ކުޑަކުދިންނަށް ހާއްސަ ފުލުހުންނާއި އަދި ހާއްސަ ޕްރޮސިކިއުޓަރުން އައްޔަން ކުރަންޖެހޭ ގޮތަށް ހުށަހަަޅާފައިވާ ކުޑަކުދިންގެ ޢަދުލުގެ ބިލުގެ ބަހުސް ރައްޔިތުންގެ މަޖިލީހުގެ މިއަދުގެ ޖަލްސާގައި ފަށައިފި އެވެ.
ރައްޔިތުންގެ މަޖިލީހަށް މި ބިލް ހުށަހަޅުއްވާފައި ވަނީ ރައީސް އިބްރާހިމް މުހައްމަދު ސޯލިހްގެ ސަރުކާރުގެ ފަރާތުން ކެޔޮދޫ ދާއިރާގެ މެންބަރު މޫސާ ނިޒާރެވެ.
މި ބިލްގައި ބުނެފައިވާ ގޮތުން ކުޑަކުދިންނާއި ގުޅުން ހުރި މައްސަލަތައް ތަހުގީގްކުރާނީ އެކަމަށް ފުލުހުންގެ ތެރޭގައި ގާއިމްކުރެވިގެންދާ ޚާއްސަ ޑިޕާޓްމަންޓަކުންނެވެ. އަދި ހަމަ އެހެންމެ ކުޑަކުދިންނަށް ޚާއްސަ ޕްރޮސެކިއުޓަރުން ހަމަޖެހިގެންދާއިރު ޕީޖީ އޮފީހުގައި އެކަމަށް ޚާއްސަ ޔުނިޓެއް ވެސް ޤާއިމްކުރެވޭނެއެވެ.
އަށްޑިހަ އަށް ވުރެ ގިނަ ސޮފްހާގެ މި ބިލްގައި ހިމެނޭ މުހިއްމު ކަންތައް ތަކުގެ ތެރޭގައި އެކަހެރިކޮށް ފަރުވާދޭންޖެހޭ ކުދިންނާއި އިސްލާހީ ފިޔަވަޅު އެޅުމުގެ ގޮތުން ބަންދުގައި ބައިތިއްބަން ޖެހޭ ކުދިންނަށް ޚާއްސަ ރެޒިޓެންޝަލް މަރުކަޒުތަކާއި ކުޑަކުދިންގެ ކަރެކްޝަނަލް މަރުކަޒުތައް ޤާއިމް ކުރެވޭނެއެވެ.
އަދި ކުށްތަކަށް އަރައިގަންނަ ކުޑަކުދިންނަށް އެހީތެރިކަން ފޯރުކޮށްދިނުމާއި ކުޑަކުދިންގެ މަންފާއަށް ޓަކައި މަސައްކަތްކޮށް ކުށުގެ ވެށިން ސަލާމަތްކޮށް އެކުދިން މުޖުތަމައަށް ރުޖޫއަ ކުރުމަށް އިސްދައުރެއް އަދާކުރާނެ އިދާރާއެއްގެ ގޮތުގައި، ޑިޕާޓްމަންޓް އޮފް ޖުވެނައިލް ޖަސްޓިސް އުފެއްދުމަށް ވެސް ބިލުުގައި ހިމަނާފައިވާ ކަން ފާހަގަކޮށްލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
