މަޝްރޫއުތައް ހުއްޓާލާފައިވާ ކަމަށް ބުނާތީ، ރައީސް މުޢިއްޒު ރައްދު ދެއްވީ ހެއްކާއެކު އަދަދު ތަކުން!

މިސަރުކާރުން އައިސް މަޝްރޫއުތައް ހުއްޓާލާފައިވާ ކަމަށް އިދިކޮޅު ފަރާތްތަކުން ބުނަމުންދާތީ، އެފަރާތްތަކަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ރައްދު ދެއްވައިފިއެވެ.

ޕްރޮގްރެސިވް ކޮންގްރެސް ކޯލިޝަނުން ރޭ ހުޅުމާލޭ ހިޔާ ސަރަހައްދުގައި ބޭއްވި ކެމްޕެއިން ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ އެމަނިކުފާނު ދައްކަވާ ހުރިހާ ވާހަކައަކީވެސް އޭގެ ޒިންމާ އެމަނިކުފާނު ނަންގަވާނެ ވާހަކަ ކަމަށެވެ. އެހެންކަމުން، އެމަނިކުފާނު ދައްކަވާ ހުރިހާ ވާހަކައެއްގެ ތެދުވެރިކަން ސާބިތު ނުކުރެވޭނެ ވާހަކައެއް ނުދައްކަވާނެ ކަމަށެވެ.

މިއާއެކު އެމަނިކުފާނު ވިދާޅުވީ، މި ސަރުކާރުން ވެރިކަމާއި ހަވާލުވެވަޑައިގެންނެވުމުގެ ކުރީން، ރިޔާސީ އިންތިޚާބުގެ ކެންޕެއިން ތެރެއިން ރަށް ރަށަށް ވަޑައިގެންނެވިއިރު، އެ ރަށް ރަށުގައި، ކުރީ ސަރުކާރުން ހިންގަމުންދިޔަ މަޝްރޫއުތައް ހުރީ ހުއްޓިފައި ކަމަށެވެ. އަދި މި ސަރުކާރުން ވެރިކަމަށް އައިސް އެ މަސައްކަތްތައް ހުއްޓިފައި ހުރި ސަބަބުތައް ބެލިއިރު، މަޝްރޫއު ހުއްޓިފައި ހުރީ އެ މަސައްކަތް ކުރާ ކުންފުނިތަކަށް ފައިސާ ނުދިނުމުންކަން ފާހަގަވިކަމަށްވެސް ވިދާޅުވިއެވެ. އެކަން ހިސާބުތަކުން ފެންނަން ހުރިކަމަށް ރައީސް ވިދާޅުވިއެވެ.

އެގޮތުން 9000 މިލިއަން ރުފިޔާ ރައްޔިތުންގެ ކުންފުނިތަކަށް ދޭން ހުރި ކަމަށާ، މަސައްޖަތްތައް ހުއްޓުފައިހުރީ އެ ފައިސާ ނުދޭތީ ކަމަށް އެމަނިކުފާނު ވިދާޅުވިއެވެ. އަދި މި ސަރުކާރުން އައިސް އެ ކުންފުނިތަކަށް ފައިސާ ދީ މަސައްކަތް މިހާރު ފެށިފައިވާކަން ފާހަގަކުރައްވައި ރައީސް ވަނީ އެގޮތުން ފެށުނު މަޝްރޫއު ތަކުގެ އަދަދާއި އެކު ތަފްސީލް ދެއްވާފައެވެ.

އެގޮތުން ރައީސް ވިދާޅުވީ:

* ފެނާއި ނަރުދަމާގެ މަޝްރޫއުތަކުގެ 27 ހުއްޓިފައި ހުރި ކަމަށާއި ނަމަވެސް މި ސަރުކާރުން އެ މަޝްރޫއުތަކާއެކު ޖުމްލަ 74 ފެނާއި ނަރުދަމާގެ މަޝްރޫއުތައް ފަށާފައިވާ ކަމަށް

* ބަނދަރު ހެދުމާއި ބިން ހިއްކުމާއި ބަނދަރު ތޮށި ލުމުގެ 30 މަޝްރޫއު ހުއްޓިފައި ހުރި ނަަމަވެސް މި ސަރުކާރުން ބަނދަރު ހެދުމާއި ބިން ހިއްކުމާއި ބަނދަރު ތޮށި ލުމުގެ 90 މަޝްރޫއު ފަށާފައިވާ ކަމަށް

* އެއަރޕޯޓް ހެދުމުގެ މަޝްރޫއު 7 ރަށުގައި ހުއްޓިފައި އޮތް ނަމަވެސް އެ 7 މަޝްރޫއު މިހާރު ކުރިއަށްދާ ކަމަށް

* މަގު ހެދުމުގެ މަޝްރޫއު 17 ހުއްޓިފައި ހުރި ނަމަވެސް މި މަޝްރޫއުތައް ފަށާ 26 ރަށުގައި މަގު ހެދުމުގެ މަޝްރޫއު މިހާރު ކުރިއަށްދާ ކަމަށް

* ދަނޑުތަކާއި ކޯޓުތައް ހެދުމުގެ 87 މަޝްރޫއު ހުއްޓިފައި ހުރި ނަމަވެސް 71 މަޝްރޫއު ފަށާ ބައެއް މަޝްރޫއުތައް ވަނީ މިހާރު ނިމިފައިވާ ކަމަށް

* މިސްކިތްތަކުގެ 20 މަޝްރޫއު ހުއްޓިފައި ހުރި ނަމަވެސް 42 މިސްކިތުގެ މަޝްރޫއު ހިނގާކަމަށް

* ތައުލީމީ ދާއިރާގެ 90 މަޝްރޫއު ހުއްޓިފައި ހުރި ނަމަވެސް 217 މަޝްރޫއު ސަރުކާރުން މިހާރު ހިންގާ ކަމަށް

މި ހިސާބު ދޮގެއް ނުހަދާނެ، ބެއްލެވޭނެ. އަޅުގަނޑު މިރޭ، މިހުރިހާ މައުލޫމާތެއް މިދެނީ، މިކަންކަން، ތަކުރާރުކޮށް ދޮގުހަދައި، ތަކުރާރުކޮށް ރައްޔިތުންނަށް އޮޅުވާލަން އެކުރާ މަސައްކަތަށް ރައްޔިތުން ފައިސަލާ ކުރުމަށްޓަކައި.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް އިތުރަށް ވިދާޅުވީ މި ސަރުކާރުން ވެރިކަމަށް އައިސް، އަލަށް ގެދޮރުވެރިކަމުގެ ދާއިރާ 11 ރަށެއްގައި މަޝްރޫއު ފަށާފައިވާ ކަމަށެވެ. އަދި ކަރަންޓް އަޕްގްރޭޑް ކުރުމުގެ މަޝްރޫއު އާއި އެނޫންވެސް ގިނަ މަޝްރޫއުތައް ކުރިއަށްދާ ކަމަށް ރައީސް ވިދާޅުވިއެވެ.

މިހުރިހާ މަޝްރޫއު ތަކާއި އެކީގައި، 527 މަޝްރޫޢު އެކި ދާއިރާތަކުން ރާއްޖޭގެ އެކި ކަންކޮޅުގައު މިހާރު އެބަ ހިނގާ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް ވިދާޅުވީ އެ މަޝްރޫއުތައް މި ސަރުކާރުން ކުރިއަށް ގެންދަނީ ފައިސާ ޗާޕު ނުކޮށް ކަމަށާއި ކުރިއަށް ގެންދާނީ ވެސް އެގޮތަށް ކަމަށެވެ. އެބޭފުޅުންނަށް ހަޖަމް ނުވަންޏާ ނުވާންވީ ކަމަށް ވެސް ރައީސް ވިދާޅުވިއެވެ.

ރައީސް ވިދާޅުވީ ފުރަތަމަ ފަހަރަށް ރާއްޖޭގައި ސްޕެޝަލް އިކޮނޮމިކް ޒޯން ޤާއިމުކުރެވިގެންދާނެ ކަމަށާއި އެ ޒޯން ޤާއިމުކުރުމުން ރާއްޖެއަށް ބޮޑެތި އިންވެސްޓްމަންޓްތައް އަންނާނެ ކަމަށެވެ