ބޮޑު ތުހުމަތެއް: ތުރުކީން ގިނައަދަދެއްގެ ދިވެހިން ބްލެކްލިސްޓްކޮށްފައިވޭ
ތުުރުކީގެ ކަމާއިބެހޭ ފަރާތްތަކުން ގިނައަދަދެއްގެ ދިވެހިން ބްލެކްލިސްޓްކޮށްފައިވާކަމަށް ތުހުމަތުކޮށްފިއެވެ.
މިފަދައިން ތުހުމަތުކޮށްފައިވަނީ ގަތަރުގެ މަޝްހޫރު ޓީވީ ޗެނަލެއްކަމުގައިވާ އަލްޖަޒީރާގެ "ވަން އޯ ވަން އީސްޓް" ޕްރޮގްރާމުން ދިވެހިރާއްޖޭގައި ހަރުކަށި ފިކުރުތައް ބާރުމިނެއްގައި ފެތުރި، ގިނަ އަދަދެއްގެ ދިވެހިން ސީރިޔާއަށް ގޮސްފައިވާކަމަށްބުނެ ނެރުނު އެޕިސޯޑެއްގައެވެ. މި އެޕިސޯޑް ނެރެފައިވަނީ އޮކްޓޯބަރ މަހުގެ 31ވަނަ ދުވަހުގައެވެ.
މި ޕްރޮގްރާމްގައި ތުރުކީގެ ކަމާއިބެހޭ ފަރާތްތަކާއި ހަވާލާދީ ބުނެފައިވާ ގޮތުގައި އެގައުމުން ވަނީ ހަނގުރާމަ ހިނގާ ސަރަހައްދުތަކާއި ގުޅުން އޮތްކަމުގެ ތުހުމަތުގައި 25ދިވެއްސަކު ޑީޕޯޓްކޮށްފައެެވެ. މީގެ އިތުރުން އެގައުމުން 134 ދިވެއްސަކު ބްލެކްލިސްްޓްކޮށްފައިވާކަމަށްވެސް ވަނީ ބުނެފައެވެ.
މީގެ ކުރިން ޗެނަލް ނިއުސް އޭޝިޔާއިން ތައްޔާރުކުރި ޑޮކިއުމެންޓްރީއެއްގެ މަންޒަރުތައްވެސް ހިމަނައިގެން ތައްޔާރުކޮށްފައިވާ މި އެޕިސޯޑްގައި ބުނާގޮތުގައި އެކި ސަބަބުތަކާއި ހުރެ ގިނަ އަދަދެއްގެ ދިވެހި ޒުވާނުން ދަނީ ސީރިޔާގައި ހިނގަމުންދާ ހަނގުރާމައިގައި ބައިވެރިވުމަށް ދަމުންނެވެ.
އެގޮތުން މިކަމަށް ބާރުދިނުމަށް މި އެޕިސޯޑްގައި ވަނީ ގިނަ އަދަދެއްގެ ފަރާތްތަކެއްގެ އިންޓަރވިއުވެސް ހިމަނާފައެވެ.
އޭގެ ތެރޭގައި މަންދު ކޮލެޖްގެ ޗެއަރމަން އިބްރާހިމް އިސްމާއިލް، ދިއްދޫ ކައުންސިލްގެ ކުރީގެ ރައީސް އަލީ ހާޝިމް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ސީރިޔާއަށްގޮސް މަރުވިކަމަށް ބުނާ ދިވެހި ޒުވާނެއްގެ މަންމަ، ސީރިޔާއަށް ދިޔަކަމަށް ބުނާ ދިވެއްސެއްގެ ރަހުމަތްތެރިން، ނޭޝަނަލް ކައުންޓަރ ޓެރަރިޒަމް ސެންޓަރގެ ޑިރެކްޓަރ ބްރިގޭޑިއަރ ޖެނެރަލް ޒަކަރިއްޔާ މަންސޫރު، ކުރީގެ ހޯމް މިނިސްޓަރ އުމަރު ނަސީރު ފަދަ ފަރާތްތައް ފާހަގަކޮށްލެވެއެވެ.
މި ޕްރޮގްރާމްގެ ތުހުމަތުތަކާއި ގުޅިގެން ދިވެހި ސަރުކާރުން މިހާތަނަށް ރަސްމީ ސިފައެއްގައި އެއްޗެއް ބުނެފައެއް ނުވެއެވެ. ވަން އޯ ވަން އީސްޓް އަކީ އޭޝިޔާ އަދި ޕެސިފިކް ސަރަހައްދުގައި ހިނގަމުންދާ މުހިންމު ކަންކަމުގެ މައްޗަށް ކުރެވޭ ތަހުގީގީ ނޫސްވެރިކަމަށް ބިނާކޮށް ތައްޔާރުކުރެވޭ ޕްރޮގްރާމެކެވެ. މެލޭޝިޔާގެ ވެރިރަށް ކުއަލަ ލަންޕޫރުގައިވާ އަލްޖަޒީރާގެ ބިއުރޯއިން ގެނެސްދެވޭ މި ޕްރޮގްރާމަކީ ގިނަ އަދަދެއްގެ އެވޯޑް ހޯދާފައިވާ އާންމުންގެ މެދުގައި މަގުބޫލު ޕްރޮގްރާާމެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
