ސައުދީ ސަފީރުކަމަށް ސަރީރު އައްޔަންކުރުމަށް މަޖިލީހުން ރުހުންދީފި
ދިވެހިރާއްޖެއިން ސައުދީ އަރަބިއްޔާއަށް ކަނޑައަޅުއްވާ ސަފީރު ކަމަށް މ. ވެސްޓްސައިޑް އަހުމަދު ސަރީރު އައްޔަންކުރުމަށް ރައްޔިތުންގެ މަޖިލީހުން ރުހުންދީފިއެވެ.
ސަރީރަށް މަޖިލީހުން ރުހުން ދީފައިވަނީ މިއަދުގެ ޖަލްސާގައި ނެގި ވޯޓުގައި ވޯޓުދެއްވި 86 މެންބަރުންގެ އިއްތިފާގުންނެވެ.
ސައުދީ ސަފީރުގެ މަގާމުގައި ކުރިން ހުންނެވި މުހައްމަދު ތާހާ، ޕާކިސްތާން ސަފީރަކަށް ބަދަލުކުރުމާ ގުޅިގެން ސައުދީ ސަފީރަކަށް ސަރީރު އައްޔަންކުރުމަށް އެދިވަޑައިގެން ރައީސް ޑރ.މުޙައްމަދު މުޢިއްޒު ފޮނުއްވި ސިޓީފުޅު އިއްވީ މިމަހުގެ 15 ވަނަ ދުވަހު އޮތް ރައްޔިތުންގެ މަޖިލީހުގެ ޖަލްސާގައެވެ
އެއާއިއެކު، އެ މައްސަލަ ދިރާސާކުރުމަށް ހަމަ އެ ދުވަހު މަޖިލީހުގެ ޚާރިޖީ ގުޅުންތަކުގެ ކޮމިޓީއަށް ވަނީ ފޮނުވާފައެވެ.
ސައުދީ ސަފީރުކަމަށް އައްޔަނުކުރުމަށް މަޖިލީހުން ރުހުން ދެއްވި ސަރީރަކީ މީގެ ކުރިން ރާއްޖޭގެ ޚާރިޖީ ދާއިރާގެ އެކި މަގާމުތަކާއި، ރާއްޖޭގެ ޑިޕްލޮމެޓިކް މިޝަންތަކުގެ އެކި ފެންވަރުގެ މަގާމުތައް ވެސް އަދާކުރައްވާފައިވާ ބޭފުޅެއްކަން ފާހަގަކޮށްލަން ޖެހެއެވެ.
ކުރިން ފޮރިން ސެކްރެޓަރީގެ މަޤާމު އަދާކުރެއްވި ސަރީރު ވަނީ އދ. އަށް ރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބުގެ މަޤާމާއި އެމެރިކާއަށް ރާއްޖެއިން ކަނޑައަޅުއްވާފައި ހުންނަވާ ސަފީރުގެ މަޤާމުވެސް ފުރުއްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
