ކޮންސެޓް އަދި ޕާޓީތައް ކުލަ ރޮދިން ސަޅިކޮށްލި ޝަމްޒޫނާގެ ތްރެޑްސް
ލިޔުންތެރިޔާ
ޝަފްރާޒް އަހްމަދު
ދިވެހި ވިޔަފާރީގެ މައިދާނުގައި އެންމެ ހީވާގިކޮށް ހަރަކާތްތެރިވާ އެއް ފަރާތަކަށް ވާނީ ހަމަގައިމުވެސް އަންހެން ކަނބަލުންނެވެ. ކުންފުނިތަކުގެ ސީއީއޯތަކުން ފަށައިގެން ލޯކަލް މާރުކޭޓުގައި އުނގު ވިޔަފާރި ކުރުމާއި ހަމައަށް އަންހެން ކަނބަލުން ދަނީ ހީވާގިކޮށް ހަރަކާތްތެރި ވަމުންނެވެ. ވާދަވެރި ވިޔަފާރީގެ މާހައުލެއްގައި އަންހެން ކަނބަލުން ހަރަކާތްތެރި ވަމުންދާއިރު، މީގެ ތެރެއިން ގިނަ ފަރާތްތަކަކީ ގޭގައި ތިބެގެން މަސައްކަތްކޮށް، އާމްދަނީ ހޯދަމުންދާ ފަރާތްތައް ކަން ފާާހަގަކޮށްލެވެއެވެ.
މިގޮތުން މިއަދުގެ ރިޕޯޓްގައި މި ބަލާލަނީ މިފަދަ ހީވާގި އަދި ކުޅަދާނަ އަންހެން ކަނބަލަކަށެވެ. އެކި ކުލަތަކުގެ ރޮދިންނާއި ފޮތިން ހެދުންތައް ފަހަމުން ގެންދާ ޝަމްޒޫނާ ލަބީބަށެވެ.
ވޮއިސްއަށް ދިން ހާއްސަ އިންޓަރވިއު އެއްގައި ޝަމްޒޫނާ ވަނީ އޭނާ ވިޔަފާރީގެ ދުނިޔެއަށް ވަންގޮތް، ތަފްސީލާއި އެކު ހިއްސާކޮށްފައެވެ.
ޝަމްޒޫނާއާއި އޭނާގެ ފިރިމީހާގެ ކައިވެންޏަށް ލިބުނު އަލަތު ދަރިފުޅާއި އެކު ޝަމްޒޫނާ ނިންމީ، ދަރިފުޅުގެ ގާތުގައި ހުރެގެން އާމްދަނީ ލިބޭނެ މަސައްކަތެއް ފަށާށެވެ.
“ކުރާނެ މަސައްކަތަކާއި މެދު ވަރަށް ގިނަ ދުވަހު ވިސްނުމަށްފަހު ހިތަށް އެރީ ރަށުގައި އަދި ނެތޭ އަލަށް އުފަންވާ ކުދިންގެ އެއްޗެހި ފަހާ މީހެއް. އެހެންވެ ނިއުބޯންގެ އެއްޗެހި ފަހަން ނިންމައިގެން ފެށީ" ޝަމްޒޫނާ ބުންޏެވެ.
ޝަމްޒޫނާާ އިތުރަށް ބުނި ގޮތުގައި އޭނާގެ މަންމައަކީ އެރަށުގެ މަޝްހޫރު ފަހާ މީހަކަށް ވުމުން، އޭނާ ބޭނުންވީ ފަހާނަމަ މަންމައާއި ތަފާތުގޮތަކަށް އެކަން ކުރާށެވެ.
އެގޮތުން ޝަމްޒޫނާ ފެހި ހެދުންތައް އެންމެ ފުރަތަމަ އޭނާ ޕޯސްޓްކުރީ އޭނާގެ އަމިއްލަ ސޯޝަލް މީޑިޔާގައެވެ. އެ ހެދުންތަކަށް އޭނާގެ ރައްޓެހިންގެ ފަރާތުން ބޮޑު ތަރުހީބެއް ލިބެމުންދިޔަ އިރު، ރައްޓެހިންގެ ހެދުންތައްވެސް ފަހަން ލިބުމުގެ ނަތީޖާއަކަށް ވެގެންދިޔައީ ވަކިން ޕޭޖެއް ހަދައި، ވިޔަފާރި އާ އުސްމިނަކަށް ގެންދިއުމެވެ.
ތްރެޑްސް ނަމުގައި ހުޅުވާފައިވާ މި ފޭސްބުކް އަދި އިންސްޓަގްރާމް ޕޭޖަށް ބޮޑު ތަރުހީބެއް ލިބޭކަމަށް އޭނާ ވަނީ ބުނެފައެވެ.
ސްކޫލް ކޮންސެޓް / ޕާޓީ ތަކަށް ހާއްސަ ހެދުން ތައްޔާރުކުރުން!
ތްރެޑްސް ޕޭޖުން ލިބޭ އުފެއްދުންތަކަށް ބަލާލާއިރު، ހުރިހާ ވައްތަރެއްގެ އަންހެން ހެދުން، ހުރިހާ އުމުރަކާއި ގުޅޭގޮތަށް ލިބެން ހުރެއެވެ. އަދި އެ ހެދުންތަކާއި ގުޅޭގޮތަށް ބޮލުގައި އަަޅާ ބޭންޑާއި ބޫޓުވެސް ހަދައިދޭކަމަށް ޝަމްޒޫނާ ވަނީ މައުލޫމާތު ދީފައެވެ. މީގެ އިތުރުންވެސް އަލަށް ފޮތުގައި ގަނޑު ލައްވައިދިނުމުގެ ހިދުމަތް ފައްޓާފައިވާ ކަމަށްވެސް އޭނާ ވަނީ ބުނެފައެވެ.
ފޭސްބުކް ޕޭޖް މެދުވެރިކޮށް، ޝަމްޒޫނާގެ ފަރުމާތަކުގައި ދެންއަޅައިގަތީ ސްކޫލްތަކުންނެވެ. އެގޮތުން އޭނާ ވަނީ ސްކޫލްތަކުގައި ކުރިއަށް ގެންދާ ކޮންސެޓް އައިޓަމްތަކަށް ވެސް ހެދުން ތައްޔާރުކުރަމުނެވެ. ސްކޫލްތަކުން މިހާރުވެސް އޯޑަރު އަންނަކަމަށް އޭނާ މައުލޫމާތު ދިނެވެ.
މީގެ އަހަރެއްހާ ދުވަސްކުރިން ހުޅުމާލެއަށް ހިޖުރަކުރި ޝަމްޒޫނާ މި މަސައްކަތް ކުރާތާ ގާތްގަނޑަކަށް ފަސް އަހަރު ވެދާނެކަމަށް ޝަމްޒޫނާ ވަނީ ބުނެފައެވެ. އައްޑޫ ސިޓީގެ ހިތަދޫއިން ހުޅުމާލެއަށް ހިޖުރަކުރި ފަހުން، ލިބޭ އޯޑަރތައް ގިނަކަމަށްވެސް ޝަމްޒޫނާ ވަނީ ބުނެފައެވެ.
ޝަމްޒޫނާ ބުނިގޮތުގައި އޭނާގެ މަސައްކަތްތައް ފުރިހަމައަށް ކުރުމުގައި އެންމެ ދަތިވާ އެއް ކަމަކީ ބޭނުންވާާާ އެއްޗެހި ހޯދުމެވެ. “ރަށުން ނުލިބޭ އެއްޗެހި ހަމަ މާލެއިން ގަންނަނީ. އަބަދުވެސް ފިރިމީހާގެ އެއްބާރުލުން ވަރަށް ލިބޭ. މާާލެއިން ގަނެދޭން ޖެހޭ އެއްޗެހި ގަނެދޭނެ. މިހާާރުވެސް ހުޅުމާލެއަކު ނުހުރޭ އެހާބޮޑަށް ބޭނުންވާ އެއްޗެހި. އެހެންވީމަ ހަމަ މާާލެ ގޮސްފަ ގަންނަނީ”, އޯޑަރަށް ހެދުން ފެހުމުގައި ކުރިމަތިވާ އުނދަގޫތައް ޝަމްޒޫނާ ފާހަގަކުރިއެވެ. އަދި ޝަމްޒޫނާ ވަނީ އޭނާގެ ފިރިމީހާ ކޮށްދޭ މި އަގުހުރި މަސައްކަތް ފާހަގަކޮށް، ޝުކުރު އަދާާކޮށްފައެވެ.
ޝަމްޒޫނާ ބުނިގޮތުގައި އޭނާގެ ވިސްނުން މިވަގުތު ހުރީ މި މަސައްކަތް އިތުރަށް ފުޅާކުރުމަށެވެ. އެގޮތުން ވީހާވެސް އަވަހަށް ފަހާތަނެއް ހުޅުވައި، އޭނާާގެ އުފެއްދުންތައް އިތުރުކުރުމަށް ވިސްނަމުންދާކަމަށްވެސް ޝަމްޒޫނާ ވަނީ ބުނެފައެވެ. ވޮއިސްގެ ޓީމުން އަބަދުވެސް އެދޭނީ ޝަމްޒޫނާ ފަދަ ހީވާގި ކަނބަލުންނަށް ފާގަތި، އަދި އުފާވެރި ދުވަސްތަކެކެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
