އަދާލަތު ޕާޓީ ބަދަލަކަށް!

އަދާލަތު ޕާޓީ އުފެދިގެން މި ފަހާއި ހަމަޔަށް އާދެވުނު އިރުވެސް ގިނަ ބަޔަކަށް އެޕާޓީ ސިފަވެފައި އޮތީ ހަމައެކަނި ދީނީ ޝިއާރު ކުރިއަރުވާ ޕާޓީއެއް ގޮތުގައެވެ. ސަރުކާރަށް ދީނީ ލަފާ އަރުވައި، ކަންކަން އިސްލާހު ކުރަން ގޮވާލާ ޕާޓީއެއްގޮތުގައެވެ.

ޝެއިޙު އިމްރާން 18 ޖުލައި 2011 ގައި ޕާޓީގެ ރައިސް ކަމުގެ ހުވާކުރުމާ ގުޅިގެން ހިންގުމުގެ އުސޫލުތަކަށް ބަދަލުތަކެއް ގެންނަން ފެށުނެވެ. މިގޮތުން ޕާޓީ ހިންގުމުގެ އެކި މަގާމުތަކަށް ހަމަ އެކަނި ދީނީ ބޭފުޅުންގެ ބަދަލުގައި އެކި ފަންނީ ބޭފުޅުން އިސްކުރަން ފެށުނެވެ.

އެމަނިކުފާނު ޒައާމަތުގައި އަދާލަތު ޕާޓީއަށް ދިމާވި އެންމެ ބޮޑު ގޮންޖެހުމަކަށްވީ ޕާޓީ ގާނޫނަށް 2012 ވަނަ އަހަރު ގެނެވުނު އިސްލާހެއް ކަމުގައިވާ ޕާޓީގެ މެމްބަރުންގެ އަދަދު 10،000 ވުރެއް މަދުވާ ޕާޓީ އުވާލަން ގެނެވުނު އިސްލާހެވެ. އޭރު އަދާލަތުގެ މެންބަރުންގެ އަދަދަކީ 5804 އެވެ. އަދާލަތުން ހިންގި ކެންޕޭންތަކުން އެއަދަދު ކުޑަދުވަސް ކޮޅެއްތެރޭ ހަމަކޮށް ލެވުނެވެ.

މޭޑޭ ނަމުގައި ބޭއްވުނު ބޮޑު މުޒާހިރައިގައި ޝެއިޙު އިމްރާން ހައްޔަރު ކުރެވުމާއި ހިސާބަށް އަދާލަތު ޕާޓީ ރީފޯމް ކުރުމުގެ ބޮޑެތި މަސައްކަތްތަކެއް ވަނީ ކުރެވިފައެވެ. އެގޮތުން ދާއިރާތަކެއް ކަޑައެޅި އެދާއިރާތަށް ވަރުގަދަ ކުރުމުގެ ގޮތުން ވަނީ ބޮޑެތި މަސައްކަތްތަކެއް ކުރެވިފައެވެ.

މިކަމުގައި ޕާޓީގެ އިސް ބޭފުޅުންގެ އެއްބާރުލުން ޝެއިޙު އިމްރާންނަށް ވަނީ ލިބިފައެވެ. މިކަމުގެ ހެއްކަކީ ޝެއިޙު އިމްރާން ހައްޔަރު ކުރުމުންވެސް އެޕާޓީގެ ހަރަކާތަކަށް އެއްވެސް މަޑުޖެހުމެއް ނެތި ކުރިއަށް ދިޔުމެވެ.

ޝެއިޙު އިމްރާންނާއި އެބޭފުޅާގެ ޓީމްގެ މަސައްކަތުން ކުރިއާއި ހިލާފަށް މިހާރު ޕާޓީއަށް ވަނަމުންދާ ގިނަ މެންބަރުންނަކީ ފަންނީ ބެފުޅުން ކަން ފާހަގަކުރެވެއެވެ.

ކުރީގައި ހަމައެކަނި ދީނީ އިލްމުވެރިންނަށް ބިނާވެފައިވާ ޕާޓީއަށް މިހާރު ސިވިލް އިންޖިނައަރުނާއި، މަސްވެރިންނާއި، ދަނޑުވެރިންނާއި، ވަޑިންނާއި، މާކެޓިންނާއި، ފައިނޭސްއާއި އަދިވެސް އިތުރު ދާއިރާތަކުގައި އުޅުއްވާ ބެފުޅުން ގުޅިވަޑައި ގަނަވަމުން ދާކަން ފާހަގަ ކުރެވެއެވެ.

މީގެކުރިން ވެސް އަދާލަތް ޕާޓީއަކީ އިލްމީ ގޮތުން ވަރަށް ހަރުދަނާ ބޭފުޅުން ލީޑް ކުރައްވަމުން ގެންދެވި ޕާޓީއެއްކަން ފާހަގަކޮށްލަންޖެހެއެވެ. އެގޮތުން މަރުހޫމް އަބްދުބާރީ އަބްދުﷲ އަދި ނިމިދިޔަ ރިޔާސީ އިންތިހަބުގައި ރައީސް ޔާމީންގެ ރަނިން މޭޓް ޑރ. ޝަހީމް އަލީ ސައީދް، މިހާރުގެ ހައުސިންގ މިނިސްޓަރ ޑރ މުއިއްޒުގެ ނަން ފާހަގަކޮށްލަން ޖެހެއެވެ.

ނަމަވެސް މިބޭބޭފުޅުން ވަނީ އަދާލަތް ޕާޓީ ދޫކުރައްވައި، އެހެން ޕާޓީތަކުގެ ޕްލެޓް ފޯމް ހިޔާރު ކުރައްވާފައެވެ. ވުމާއެކު މިކަމަކީ ދެންވެސް އަދާލަތް ޕާޓީން ވިސްނައި އިސްލާހު ކުރަން ޖެހޭކަމެެކެވެ. އިލްމީ ބޭފުޅުންން ޕާޓީގައި ހަރުލައްވައި، ޕާޓީގައި ބޮޑަށް ޝާމިލް ކުރުމުގެ ވިސްނުން ނެރެން ޖެހެއެވެ.

އަދާލަތް ޕާޓީއަކީ ސަރުކާރުގެ ދީނީ ސްްލޮޓް ފުރަން އޮންނަ ޕާޓީއެއްގެ ބަދަލުގައި، އަދާލަތް ޕާޓީ އަކީ ކެބިނެޓް ގެ ހުރިހާ މަޤާމަކަށް ކުރިމަތި ލުވުމުގެ ޤާބިލް ޓީމްއެއް އޮންނަަ ޕާޓީއެއް އަކަށް ވާން ވެސް ޖެހެއެވެ.

ސިޔާސީ ގޮތުން ޕާޓީތައް ދެމި އޮންނަނީ ސިޔާސީ ކުރިމަގަށް އަޅާ ހަރުދަނާ ފިޔަވަޅުތަކެއްގެ މައްޗަންކަން ފާހަގަކޮށްލަނަޖެހެއެވެ. އަދާލަތް ޕާޓީ އަކީ ހަށިފޮޅާފައި އިންތިހާބު ތަކުގައި ވާދަ ކޮށްލެވޭ ޕާޓީއަކަށް ވެގެން ނޫނީ ސިޔާސީ މަޝަރަހްގައި ކާމިޔާބީގެ އައްސޭރިއަކަށް ދިއުމަކީ ނާދިރުކަމެކެވެ.